ପୁଣି ତେଜିଲା ମସ୍କ-ଟ୍ରମ୍ପ କଳି: ‘ବିଗ ବିୟୁଟିଫୁଲ୍ ବିଲ’କୁ ନେଇ ଧମକ ଦେଲେ ଏଲନ୍, ରାଷ୍ଟ୍ରପତି କହିଲେ….

ନୂଆଦିଲ୍ଲୀ: କୋଟିପତି ବ୍ୟବସାୟୀ ଏଲନ ମସ୍କ ଏବଂ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ ପୁଣି ଥରେ ବିବାଦ ଆରମ୍ଭ ହୋଇଛି। ଏଲୋନ ମସ୍କ ପୁଣି ଥରେ ଟ୍ରମ୍ପଙ୍କ ‘ବିଗ୍ ବିୟୁଟିଫ୍ ବିଲ୍’କୁ ଟାର୍ଗେଟ କରିଛନ୍ତି ଏବଂ ଏହାକୁ ପାଗଳାମି ବୋଲି କହିଛନ୍ତି। ଏହା ସହିତ, ଏଲୋନ୍ ମସ୍କ ଡୋନାଲ୍ଡ ଟ୍ରମ୍ପଙ୍କୁ ଏକ ବଡ଼ ଚେତାବନୀ ମଧ୍ୟ ଦେଇଛନ୍ତି। ମସ୍କ କହିଛନ୍ତି ଯେ ଯଦି ଏହି ବିଲ୍ ପାସ୍ ହୁଏ, ତେବେ ପରଦିନ ‘ଆମେରିକା ପାର୍ଟି’ ଗଠନ ହେବ । ଯାହାକୁ ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମସ୍କଙ୍କୁ କଢଡା ନିଶାନା ସାଧିଛନ୍ତି । ଦାବି କରିଛନ୍ତି ଯେ ଏଲନ ମସ୍କ “ଇତିହାସର ଯେକୌଣସି ମଣିଷ ଅପେକ୍ଷା ଅଧିକ ସବସିଡି ପାଇଛନ୍ତି”  ।  ଏହା ବିନା, ତାଙ୍କୁ ଦୋକାନ ବନ୍ଦ କରି ଦକ୍ଷିଣ ଆଫ୍ରିକା ଫେରିବାକୁ ପଡ଼ିପାରେ ବୋଲି କହିଛନ୍ତି ଟ୍ରମ୍ପ ।

ତେବେ ମସ୍କ ସମ୍ପ୍ରତି ଏକ୍ସରେ ଏକ ପୋଲ କରିଥିଲେ ଏବଂ ଆମେରିକୀୟ ଲୋକଙ୍କୁ ଏକ ନୂତନ ଦଳ ବିଷୟରେ ମତାମତ ମାଗିଥିଲେ। ପୋଲରେ ବଡ଼ ଧରଣର ସମର୍ଥନ ପାଇବା ପରେ, ମସ୍କ ଆମେରିକା ପାର୍ଟିର ନାମ ଘୋଷଣା କରିଥିଲେ । ସେପଟେ ବିଗ୍ ବିୟୁଟିଫୁଲ୍ ବିଲ୍ ପାସ୍ ପାଇଁ ସେନେଟରେ ଅଣାଯାଇଛି। ଏ ସମ୍ପର୍କରେ, ଏଲନ୍ ମସ୍କ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଚେତାବନୀ ଦେଇ ଏକ୍ସରେ ଟ୍ୱିଟ୍ କରିଛନ୍ତି, କହିଛନ୍ତି, ଯଦି ଏହି ପାଗଳ ଖର୍ଚ୍ଚ ବିଲ୍ ପାସ୍ ହୁଏ, ତେବେ ପରଦିନ ଆମେରିକା ପାର୍ଟି ଗଠନ ହେବ। ଆମ ଦେଶକୁ ଡେମୋକ୍ରାଟ୍-ରିପବ୍ଲିକାନ୍ ୟୁନିପାର୍ଟିର ଏକ ବିକଳ୍ପ ଆବଶ୍ୟକ ଯାହା ଦ୍ୱାରା ଜନସାଧାରଣ ପ୍ରକୃତ ସ୍ୱର ପାଇପାରିବେ ।

ସେପଟେ ଏହାକୁ ନେଇ ପୁଣି ମସ୍କଙ୍କ ଉପରେ ବର୍ଷିଛନ୍ତି ରାଷ୍ଟ୍ରପତି ଟ୍ରମ୍ପ । ଏନେଇ ନିଜ ଟ୍ରୁଥ୍ ସୋସିଆଲରେ ଲେଖିଛନ୍ତି, ଏଲୋନ ଇତିହାସର ଯେକୌଣସି ମଣିଷ ଅପେକ୍ଷା ଅଧିକ ସବସିଡି ପାଇଛନ୍ତି । ସବସିଡି ବିନା, ଏଲୋନଙ୍କୁ ସମ୍ଭବତଃ ଦୋକାନ ବନ୍ଦ କରି ଦକ୍ଷିଣ ଆଫ୍ରିକା ଫେରିବାକୁ ପଡ଼ିପାରେ । ଆଉ କୌଣସି ରକେଟ୍ ଲଞ୍ଚ, ଉପଗ୍ରହ, କିମ୍ବା ବୈଦ୍ୟୁତିକ କାର ଉତ୍ପାଦନ ହେବ ନାହିଁ, ଏବଂ ଆମ ଦେଶ ବହୁତ ଧନ ବଞ୍ଚାଇବ । ହୁଏତ ଆମକୁ ଡିଓଜିଇକୁ ଭଲ ଭାବରେ ଦେଖିବା ଉଚିତ୍, କଠିନ ପରିଶ୍ରମ କରିବା ଉଚିତ୍? ବହୁତ ଟଙ୍କା ବଞ୍ଚାଇବାକୁ ପଡିବ ! ବୋଲି ଟ୍ରମ୍ପ କହିଛନ୍ତି ।

ସୂଚନାଯୋଗ୍ୟ, ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଏଜେଣ୍ଡା ଏବଂ ତାଙ୍କ ନିର୍ବାଚନ ପ୍ରତିଶ୍ରୁତିକୁ କାର୍ଯ୍ୟକାରୀ କରିବା ପାଇଁ ବିଗ୍ ବିୟୁଟିଫୁଲ୍ ବିଲ୍ ଅଣାଯାଇଛି। ଏହା ଏକ ବ୍ୟାପକ ବିଲ୍ ଯାହାର ଲକ୍ଷ୍ୟ ଟିକସ ହ୍ରାସ, ସୀମା ସୁରକ୍ଷା ଉପରେ ଖର୍ଚ୍ଚ ବୃଦ୍ଧି ଏବଂ କିଛି ସରକାରୀ କାର୍ଯ୍ୟକ୍ରମକୁ କାଟିବା। ତଥାପି, ଏହି ବିଲ୍‌ର ଆର୍ଥିକ ଏବଂ ସାମାଜିକ ପ୍ରଭାବ ବିଷୟରେ ବହୁତ ବିତର୍କ ଚାଲିଛି।

ଏହାକୁ ନେଇ ଏଲନ୍ ମସ୍କ ଦାବି କରିଛନ୍ତି ଯେ ରିପବ୍ଲିକାନ୍ ପାର୍ଟିର ସାଂସଦମାନେ ଯେଉଁ ବିଲ୍ ପାସ୍ କରିବାକୁ ଚେଷ୍ଟା କରୁଛନ୍ତି ତାହା ଚାକିରି ନଷ୍ଟ କରିବ ଏବଂ ଉଦୀୟମାନ ଶିଳ୍ପଗୁଡ଼ିକୁ ଅଟକାଇ ଦେବ। ମସ୍କ କହିଛନ୍ତି ଯେ ଏହି ବିଲ୍ ଆମେରିକାରେ ଲକ୍ଷ ଲକ୍ଷ ଚାକିରି ନଷ୍ଟ କରିବ ଏବଂ ବିଶାଳ ରଣନୈତିକ କ୍ଷତି କରିବ। ଏହା ପୁରୁଣା ଶିଳ୍ପଗୁଡ଼ିକୁ ଲାଭ ଦେବ, କିନ୍ତୁ ଏହା ଉଦୀୟମାନ ଶିଳ୍ପଗୁଡ଼ିକୁ ଗୁରୁତର କ୍ଷତି ପହଞ୍ଚାଇବ। ଏହି ବିଲ୍ ଋଣ ସୀମାକୁ ରେକର୍ଡ ୫ ଟ୍ରିଲିୟନ ଡଲାରକୁ ବୃଦ୍ଧି କରିବ। ଏକ ନୂତନ ରାଜନୈତିକ ଦଳ ପାଇଁ ସମୟ ଆସିଛି ଯାହା ପ୍ରକୃତରେ ଲୋକଙ୍କ ବିଷୟରେ ଚିନ୍ତା କରେ।

କିଛି ସମୟ ପୂର୍ବରୁ, ମସ୍କ ରାଷ୍ଟ୍ରପତି ଟ୍ରମ୍ପଙ୍କ ଜଣେ ଦୃଢ଼ ସମର୍ଥକ ଥିଲେ। ତଥାପି, ଉଭୟଙ୍କ ମଧ୍ୟରେ ସମ୍ପର୍କ ଏବେ ବହୁତ ତିକ୍ତ। ନିର୍ବାଚନ ଜିତିବା ପରେ, ଟ୍ରମ୍ପ ଏଲୋନ୍ ମସ୍କଙ୍କୁ ରାଜ୍ୟ ଖର୍ଚ୍ଚ ବିଭାଗ (DOGE) ରେ ନିଯୁକ୍ତ କରିଥିଲେ। ତଥାପି, ବିବାଦ ବଢ଼ିବା ପରେ ମସ୍କ ତାଙ୍କ ପଦରୁ ଇସ୍ତଫା ଦେଇଥିଲେ। ସେବେଠାରୁ, ଏଲୋନ୍ ମସ୍କ ଖୋଲାଖୋଲି ଭାବରେ ଟ୍ରମ୍ପଙ୍କ ନୀତି ଉପରେ ପ୍ରଶ୍ନ ଉଠାଇ ଆସୁଛନ୍ତି। ଟ୍ରମ୍ପ ଏଲୋନ୍ ମସ୍କଙ୍କ ବୟାନ ଉପରେ ନିରାଶା ପ୍ରକାଶ କରିଥିଲେ ଏବଂ ମସ୍କଙ୍କ ‘ଟ୍ରମ୍ପ୍ ଡିରେଞ୍ଜମେଣ୍ଟ ସିଣ୍ଡ୍ରୋମ୍’ ଥିବା ଉଲ୍ଲେଖ କରିଥିଲେ। ଏଲୋନ ମସ୍କ ଟ୍ରମ୍ପଙ୍କୁ କୃତଘ୍ନ ବୋଲି କହିଥିଲେ ଏବଂ କହିଥିଲେ ଯେ ତାଙ୍କ ସାହାଯ୍ୟ ବିନା ଟ୍ରମ୍ପ ରାଷ୍ଟ୍ରପତି ନିର୍ବାଚନରେ ​​ହାରିଯାଇଥାନ୍ତେ। ତଥାପି, କିଛି ଦିନ ପରେ ମସ୍କ ମଧ୍ୟ ତାଙ୍କ ବକ୍ତବ୍ୟ ପାଇଁ ଦୁଃଖ ପ୍ରକାଶ କରିଥିଲେ। ହେଲେ ଏବେ ପୁଣି ବିଲକୁ ନେଇ ମସ୍କ ମୁହଁ ଖୋଲିବା ପରେ ପୁଣି ବଢିଛି ମସ୍କ ଟ୍ରମ୍ପ କଳି ।