ଆସିଲା ଅହମ୍ମଦାବାଦ ବିମାନ ଦୁର୍ଘଟଣାର ପ୍ରାଥମିକ ତଦନ୍ତ ରିପୋର୍ଟ

ନୂଆଦିଲ୍ଲୀ: ଆସିଲା ଅହମ୍ମଦାବାଦ ବିମାନ ଦୁର୍ଘଟଣାର ପ୍ରାଥମିକ ତଦନ୍ତ ରିପୋର୍ଟ । ଭାରତର ବିମାନ ଦୁର୍ଘଟଣା ତଦନ୍ତ ବ୍ୟୁରୋ (AAIB) ଦ୍ୱାରା କରାଯାଇଥିବା ଏକ ତଦନ୍ତରୁ ଜଣାପଡିଛି ଯେ, ଏୟାର ଇଣ୍ଡିଆର ବୋଇଂ 787-8 ବିମାନଟି ଅହମ୍ମଦାବାଦରୁ ଉଡ଼ାଣ ଭରିବା ମାତ୍ରେ ପ୍ରାୟ ୯୦ ସେକେଣ୍ଡ ବ୍ୟବଧାନରେ ବନ୍ଦ ହୋଇଯାଇଥିଲା । ଇଞ୍ଜିନ୍‌ ଫେଲ୍‌ ହେବାରୁ ଦ୍ବନ୍ଦ୍ବରେ ପଡ଼ିଯାଇଥିଲେ ପାଇଲଟ୍‌ । ଜଣେ ଆଉ ଜଣଙ୍କୁ ଇଞ୍ଜିନ୍‌ ବନ୍ଦ ନେଇ ପଚାରିଥିଲେ । ବ୍ଲାକବକ୍ସରେ ପାଇଲଟ୍‌ଙ୍କ କଥାବାର୍ତ୍ତା ରେକର୍ଡ ହୋଇଛି । ଯାହା ଫଳରେ ଏହି ଦୁର୍ଘଟଣା ଘଟିଥିଲା ।

ଜୁନ୍ ୧୨ ତାରିଖରେ ଅହମ୍ମଦାବାଦରେ ଘଟିଥିବା ଏୟାର ଇଣ୍ଡିଆ ଦୁର୍ଘଟଣା ସହିତ ଜଡିତ ୧୫ ପୃଷ୍ଠାର ଏକ ପ୍ରାଥମିକ ରିପୋର୍ଟ ବିମାନ ଦୁର୍ଘଟଣା ତଦନ୍ତ ବ୍ୟୁରୋ (AAIB) ପ୍ରକାଶ କରିଛି ।

AAIB ବୋଇଂ 787-8 ବିମାନ କିମ୍ବା GE GEnx-1B ଇଞ୍ଜିନର ଅପରେଟର ଏବଂ ନିର୍ମାତାମାନଙ୍କୁ କୌଣସି ସୁରକ୍ଷା ସୁପାରିଶ ଜାରି କରିନାହିଁ ।

୧୫ ପୃଷ୍ଠାର AAIB ରିପୋର୍ଟ ଅନୁଯାୟୀ, ଜଣେ ପାଇଲଟ୍ ଅନ୍ୟ ଜଣଙ୍କୁ ପଚାରିଥିଲେ “ତୁମେ କାହିଁକି ଇନ୍ଧନ ବନ୍ଦ କଲ?” ବୋଲି ପଚାରୁଥିବା ଶୁଣାଗଲା, ଯାହାର ଉତ୍ତରରେ ଅନ୍ୟ ଜଣେ ଉତ୍ତର ଦେଲେ, “ମୁଁ କରିନାହିଁ।” ଏହି କଥାବାର୍ତ୍ତା ସେତେବେଳେ ହୋଇଥିଲା ଯେତେବେଳେ ଉଭୟ ଇଞ୍ଜିନର ଇନ୍ଧନ କଟଅଫ୍ ସ୍ୱିଚ୍ ‘ରନ୍’ ରୁ ‘କଟଅଫ୍’ କୁ ପରିବର୍ତ୍ତନ ହୋଇଥିଲା, ଏହି ସମୟରେ ବୋଇଂ ୭୮୭-୮ ଡ୍ରିମଲାଇନର ସର୍ବାଧିକ ୧୮୦ ନଟସର ଅଧିକ ବେଗରେ ପହଞ୍ଚିଥିଲା ।

ଦୁର୍ଘଟଣା ସମୟରେ, ଦୁଇ ଜଣ ପାଇଲଟ୍ ଫ୍ଲାଇଟ୍ ନମ୍ବର AI171 ର ନିୟନ୍ତ୍ରଣରେ ଥିଲେ, କ୍ୟାପ୍ଟେନ୍ ସୁମିତ ସବରୱାଲ୍ ଏବଂ ପ୍ରଥମ ଅଧିକାରୀ କ୍ଲାଇଭ୍ କୁନ୍ଦର୍ । ୫୬ ବର୍ଷୀୟ କ୍ୟାପ୍ଟେନ୍ ସବରୱାଲ୍ ଜଣେ ଅତ୍ୟନ୍ତ ଅଭିଜ୍ଞ ପାଇଲଟ୍ ଥିଲେ ତାଙ୍କ ପାଖରେ ୧୫,୬୦୦ ରୁ ଅଧିକ ଉଡ଼ାଣର ସମୟ ଥିଲା, ଯେଉଁଥିରେ ବୋଇଂ ୭୮୭ ରେ ୮,୫୦୦ ରୁ ଅଧିକ ଉଡ଼ାଣ ସମୟ ମଧ୍ୟ ସାମିଲ ଥିଲା । ଏହା ବ୍ୟତୀତ, ୩୨ ବର୍ଷୀୟ ପ୍ରଥମ ଅଧିକାରୀ କୁନ୍ଦର ୩,୪୦୦ ରୁ ଅଧିକ ଉଡ଼ାଣ ସମୟ ହାସଲ କରିଥିଲେ ଏବଂ ୨୦୧୭ରୁ ଏୟାର ଇଣ୍ଡିଆରେ ଥିଲେ । ଉଭୟଙ୍କ ପାଖରେ ବୋଇଂ ୭୮୭ ବିମାନ ଉଡ଼ାଣ ପାଇଁ ଲାଇସେନ୍ସ ଏବଂ ଯୋଗ୍ୟତା ଥିଲା ।

ଗତ ମାସ ଜୁନ୍ ୧୨ ତାରିଖରେ ଅହମ୍ମଦାବାଦରେ ଏୟାର ଇଣ୍ଡିଆର ଏକ ବିମାନ ଉଡ଼ାଣ ଭରିବା ପରେ ଦୁର୍ଘଟଣାଗ୍ରସ୍ତ ହୋଇଥିଲା । ବିମାନଟି ଭାରତୀୟ ସମୟ ଅନୁସାରେ ଅପରାହ୍ନ ୧ଟା ୩୮ରେ ଉଡ଼ାଣ କରିଥିଲା ଏବଂ ୧ଟ୨ ୩୯ରେ ଜଣେ ପାଇଲଟ୍ ‘ମେଡେ-ମେଡେ-ମେଡେ’ ବାର୍ତ୍ତା ଦେଇଥିଲେ । ଏହି ଦୁର୍ଘଟଣାକୁ ଦଶନ୍ଧି ମଧ୍ୟରେ ଭାରତରେ ହୋଇଥିବା ସବୁଠାରୁ ଖରାପ ବିମାନ ଦୁର୍ଘଟଣା ମଧ୍ୟରୁ ଗୋଟିଏ ବୋଲି ବିବେଚନା କରାଯାଉଛି ଏବଂ ଏହା ବୋଇଂ ୭୮୭ ସହିତ ଜଡିତ ପ୍ରଥମ ଘଟଣା ଥିଲା ଯେଉଁଥିରେ ବିମାନଟି ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା । ଏହି ଦୁର୍ଘଟଣାରେ ୨୬୦ ଜଣଙ୍କର ମୃତ୍ୟୁ ହୋଇଥିଲା । ବିମାନରେ ଥିବା ୨୪୨ ଜଣଙ୍କ ମଧ୍ୟରୁ କେବଳ ଜଣେ ବଞ୍ଚି ଯାଇଥିଲେ ।