ରାଧାକୃଷ୍ଣନଙ୍କୁ ସମର୍ଥନ କରିବାକୁ ବିରୋଧୀ ଦଳକୁ ଅପିଲ୍ କଲେ ମୋଦି, ଏମିତି ପ୍ରତିକ୍ରିୟା ରଖିଲେ ବିରୋଧୀ ଦଳ…..

ନୂଆଦିଲ୍ଲୀ: ବିଜେପି ସମର୍ଥିତ ଏନଡିଏ ଉପରାଷ୍ଟ୍ରପତି ନିର୍ବାଚନ ପାଇଁ ପ୍ରାର୍ଥୀ ଘୋଷଣା କରିସାରିଛି । ଆଉ ମଙ୍ଗଳବାର ଏହାକୁ ନେଇ ଏନଡିଏ ସଂସଦୀୟ ଦଳ ବୈଠକ ପରେ, କେନ୍ଦ୍ର ମନ୍ତ୍ରୀ କିରନ ରିଜିଜୁ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିରୋଧୀ ଦଳ ସମେତ ସମସ୍ତ ସାଂସଦଙ୍କୁ ଉପରାଷ୍ଟ୍ରପତି ନିର୍ବାଚନରେ ସିପି ରାଧାକୃଷ୍ଣନଙ୍କୁ ସମର୍ଥନ କରିବାକୁ ନିବେଦନ କରିଛନ୍ତି । ରିଜିଜୁ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦି ବୈଠକରେ ଗୃହର ନେତାମାନଙ୍କ ସହ ସିପି ରାଧାକୃଷ୍ଣନଙ୍କୁ ପରିଚୟ କରାଇଥିଲେ । ଏନଡିଏ ସାଂସଦ, ଗୃହର ନେତାମାନେ ସିପି ରାଧାକୃଷ୍ଣନଙ୍କୁ ଉଷ୍ମ ସ୍ୱାଗତ କରିଥିଲେ, ତାଙ୍କୁ ଅଭିନନ୍ଦନ ଜଣାଇଥିଲେ ଏବଂ ପ୍ରଧାନମନ୍ତ୍ରୀଙ୍କ ପ୍ରତି କୃତଜ୍ଞତା ପ୍ରକାଶ କରିଥିଲେ। ପ୍ରଧାନମନ୍ତ୍ରୀ ମୋଦି ମଧ୍ୟ ଏନଡିଏ ବୈଠକରେ ରାଧାକୃଷ୍ଣନଙ୍କୁ ଉତ୍ତରୀୟ ସହ ସମ୍ମାନୀତ କରିଥିଲେ ।

ପ୍ରଧାନମନ୍ତ୍ରୀ ମୋଦି ଆଜିର ସଂସଦୀୟ ଦଳ ବୈଠକରେ କହିଛନ୍ତି ଯେ ସମସ୍ତ ଦଳ ସହିତ ଆଲୋଚନା କରାଯାଉଛି ଯାହା ଦ୍ୱାରା ସର୍ବସମ୍ମତିକ୍ରମେ ଉପରାଷ୍ଟ୍ରପତିଙ୍କୁ ଚୟନ କରାଯାଇପାରିବ । ଏନଡିଏରେ ଅନ୍ତର୍ଭୁକ୍ତ ସମସ୍ତ ଦଳର ପାରସ୍ପରିକ ସହମତିରେ ବିଜେପି ରାଧାକୃଷ୍ଣନଙ୍କୁ ଏହି ପଦବୀ ପାଇଁ ପ୍ରାର୍ଥୀ ଭାବରେ ବାଛିଛି ।

ଯାହାକୁ ନେଇ ବିରୋଧି ଦଳର ପ୍ରତିକ୍ରିୟା ସାମ୍ନାକୁ ଆସିଛି । ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ମହାରାଷ୍ଟ୍ର ରାଜ୍ୟପାଳ ସିପି ରାଧାକୃଷ୍ଣନଙ୍କୁ ଉପରାଷ୍ଟ୍ରପତି ପ୍ରାର୍ଥୀ ଭାବରେ ଘୋଷଣା କରିବା ଉପରେ କହିଛନ୍ତି, ଆମର ଇଣ୍ଡି ମେଣ୍ଟର ଲୋକମାନେ ମଧ୍ୟ ଏକାଠି କିଛି ନିଷ୍ପତ୍ତି ନେଇଛନ୍ତି, ଆପଣ ଖୁବ୍ ଶୀଘ୍ର ସୂଚନା ପାଇବେ ।

ଏନସିପି ନେତା ପ୍ରଫୁଲ ପଟେଲ କହିଛନ୍ତି, ସିପି ରାଧାକୃଷ୍ଣନ ଜଣେ ବହୁତ ଭଲ ବ୍ୟକ୍ତି, ସେ ମହାରାଷ୍ଟ୍ରର ରାଜ୍ୟପାଳ ମଧ୍ୟ। ତାଙ୍କର ଦୀର୍ଘ ସାର୍ବଜନୀନ ଜୀବନ ରହିଛି, ସେ ଦୁଇଥର ଲୋକସଭା ସଦସ୍ୟ ଅଛନ୍ତି । ସେ ଜଣେ ଭଲ ବ୍ୟକ୍ତି ଏବଂ ବିଶେଷକରି ଭାରତ ଭଳି ଏକ ବଡ଼ ଦେଶରେ, ତାମିଲନାଡୁକୁ ମଧ୍ୟ ଆଜି ପ୍ରତିନିଧିତ୍ୱ ମିଳୁଛି, ଯାହାକୁ ସ୍ୱାଗତ କରାଯିବା ଉଚିତ ।

ସେହି ସମୟରେ, ଉପରାଷ୍ଟ୍ରପତି ପଦ ପାଇଁ ବିରୋଧୀ ଦଳର ପ୍ରାର୍ଥୀ ସମ୍ପର୍କରେ କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେଙ୍କ ବାସଭବନରେ ବିରୋଧୀ ଦଳଗୁଡ଼ିକର ବୈଠକରେ, ଏସପି ସାଂସଦ ଅବଧେଶ ପ୍ରସାଦ କହିଛନ୍ତି, ଇଣ୍ଡି ମେଣ୍ଟ ଯାହା ନିଷ୍ପତ୍ତି ନେବ, ଆମେ ତା ସହିତ ଅଛୁ ।

ତେବେ କହିରଖୁଚୁ, ଇଣ୍ଡି ମେଣ୍ଟ ଆଜି ତାର ଉପରାଷ୍ଟ୍ରପତି ପ୍ରାର୍ଥୀ ପାଇଁ ନାମ ଦେଇପାରେ । ଏନେଇ ମଲ୍ଲିକାର୍ଜୁନ ଖଡଗେଙ୍କ ବାସଭବନରେ ଇଣ୍ଡି ମେଣ୍ଟ ସହଯୋଗୀ ଦଳକୁ ନେଇ ଏକ ବୈଠକ କରିଛି ।