Terror plot in Faridabad: ଡାକ୍ତରଙ୍କ ଘରୁ ୩୬୦ କିଲୋ ବିସ୍ଫୋରକ, AK-47 ଜବତ; ଆତଙ୍କବାଦୀ କନେକ୍ସନ ସନ୍ଦେହ

ନୂଆଦିଲ୍ଲୀ: ଦେଶରେ ଏକ ବଡ଼ ଆତଙ୍କବାଦୀ ଷଡ଼ଯନ୍ତ୍ରର ପର୍ଦ୍ଦାଫାଶ ହୋଇଛି। ଦିଲ୍ଲୀ ସଂଲଗ୍ନ ଫରିଦାବାଦରେ ଥିବା ଜଣେ ଡାକ୍ତରଙ୍କ ଘରୁ ଅସ୍ତ୍ରଶସ୍ତ୍ର ଏବଂ ବିସ୍ଫୋରକ ଜବତ କରାଯାଇଛି। ଜମ୍ମୁ ଏବଂ କାଶ୍ମୀର ପୋଲିସ ଫରିଦାବାଦରେ ଜଣେ ଡାକ୍ତରଙ୍କ ଘରେ ଚଢାଉ କରିଛି। ଚଢାଉ ସମୟରେ ପୋଲିସ ୩୬୦ କିଲୋଗ୍ରାମ ବିସ୍ଫୋରକ (ସନ୍ଦିଗ୍ଧ ଆମୋନିୟମ୍ ନାଇଟ୍ରେଟ୍), ଏକ ଆସଲ୍ଟ ରାଇଫଲ୍ ଏବଂ ଗୁଳି ଜବତ କରିଛି।

ଫରିଦାବାଦ ପୋଲିସର ସୂଚନା ଅନୁଯାୟୀ, ଜମ୍ମୁ ଏବଂ କାଶ୍ମୀରର ଅନନ୍ତନାଗର ବାସିନ୍ଦା ଡାକ୍ତର ଆଦିଲ ଅହମ୍ମଦଙ୍କ ସୂଚନା ଆଧାରରେ ଫରିଦାବାଦରେ ଚଢାଉ କରାଯାଇଥିଲା। ତାଙ୍କୁ ନଭେମ୍ବର ୭ତାରିଖରେ ଉତ୍ତରପ୍ରଦେଶର ସହାରନପୁରରୁ ଜମ୍ମୁ ଏବଂ କାଶ୍ମୀର ପୋଲିସ ଗିରଫ କରିଥିଲା। ଆଦିଲକୁ ପଚରାଉଚରା ଚାଲିଛି। ସେ ଫରିଦାବାଦରେ ବିସ୍ଫୋରକ ରଖିଥିବା ସ୍ୱୀକାର କରିଛି।

ଫରିଦାବାଦ ପୋଲିସ କମିଶନର ସତେନ୍ଦ୍ର କୁମାର ଏକ ସାମ୍ବାଦିକ ସମ୍ମିଳନୀ ସମୟରେ କହିଛନ୍ତି, “ଏହା ହରିୟାଣା ପୋଲିସ ଏବଂ ଜମ୍ମୁ କାଶ୍ମୀର ପୋଲିସର ଏକ ମିଳିତ ଅଭିଯାନ। ଅଭିଯୁକ୍ତ ଜଣକ ହେଲେ ଡାକ୍ତର ମୁଜାମ୍ମିଲ । ତାଙ୍କୁ ଗିରଫ କରାଯାଇଛି। ଗତକାଲି ୩୬୦ କିଲୋଗ୍ରାମ ଜ୍ୱଳନଶୀଳ ସାମଗ୍ରୀ ଉଦ୍ଧାର କରାଯାଇଥିଲା, ସମ୍ଭବତଃ ଆମୋନିୟମ୍ ନାଇଟ୍ରେଟ୍। ଏହା RDX ନୁହେଁ। ପୋଲିସ ଏକ ଆସଲ୍ଟ ରାଇଫଲ୍, ୫ ଲିଟର ରାସାୟନିକ ପଦାର୍ଥ, ୮୪ଟି କାର୍ଟ୍ରିଜ୍ ଏବଂ ଦୁଇଟି ସ୍ୱୟଂଚାଳିତ ପିସ୍ତଲ ମଧ୍ୟ ଜବତ କରିଛି।”

ପୋଲିସ କହିଛି ଯେ, ମୁଜାମ୍ମିଲକୁ ଗିରଫ କରାଯାଇଛି। ଅଭିଯୁକ୍ତ ଫରିଦାବାଦର ଅଲ୍-ଫଲାହ ବିଶ୍ୱବିଦ୍ୟାଳୟରେ ପଢଉଥିଲା। ବର୍ତ୍ତମାନ ସର୍ଚ୍ଚ ଅପରେସନ୍ ଚାଲିଛି। ତଦନ୍ତ ସମୟରେ ଉଦ୍ଧାର ହୋଇଥିବା ସାମଗ୍ରୀଗୁଡ଼ିକର ପୁଙ୍ଖାନୁପୁଙ୍ଖ ଯାଞ୍ଚ କରାଯାଉଛି।

ଜମ୍ମୁ କାଶ୍ମୀର ପୋଲିସ ଆତଙ୍କବାଦୀ ସମର୍ଥନ ନେଟୱାର୍କକୁ ଭାଙ୍ଗିବା ପାଇଁ ଚଢାଉ କରୁଛି। ଏପର୍ଯ୍ୟନ୍ତ କାଶ୍ମୀରରେ ପଚରାଉଚରା ପାଇଁ ଶହେ ରୁ ଅଧିକ ଲୋକଙ୍କୁ ଅଟକ ରଖାଯାଇଛି।