ନୂଆଦିଲ୍ଲୀ: ଗାୟକ ଜୁବୀନ ଗର୍ଗଙ୍କ ମୃତ୍ୟୁ ଏକ ହତ୍ୟା ମାମଲା।ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ସର୍ମା ମଙ୍ଗଳବାର ବିଧାନସଭାରେ କହିଛନ୍ତି।
ତେବେ ସିଙ୍ଗାପୁର ସମୁଦ୍ରରେ ପହଁରିବା ସମୟରେ ଗାୟକଙ୍କ ମୃତ୍ୟୁର ତଦନ୍ତ କରୁଥିବା ସ୍ୱତନ୍ତ୍ର ତଦନ୍ତ ଦଳ (SIT) ଏହି ମାମଲାରେ ହତ୍ୟା ଅଭିଯୋଗ ମଧ୍ୟ ଯୋଡିଛି।
ଗାୟକଙ୍କ ମୃତ୍ୟୁ ଉପରେ ବିଧାନସଭାରେ ବିରୋଧୀ ଦଳ ଦ୍ୱାରା ଆଗତ ଏକ ମୁଲତବୀ ପ୍ରସ୍ତାବ ଉପରେ ଆଲୋଚନା ସମୟରେ ହିମନ୍ତ ବିଶ୍ୱ ସର୍ମା ଏହି କଥା କହିଥିଲେ। ସେ ଆହୁରି କହିଛନ୍ତି, “ପ୍ରାଥମିକ ତଦନ୍ତ ପରେ ଆସାମ ପୋଲିସ ଅନୁଭବ କରିଛି ଯେ ଏହା ଆକସ୍ମିକ ମୃତ୍ୟୁ ନୁହେଁ ବରଂ ହତ୍ୟା। ତେଣୁ ତାଙ୍କ ମୃତ୍ୟୁର ତିନି ଦିନ ମଧ୍ୟରେ BNS ର ଧାରା ୧୦୩ ମାମଲାରେ ଯୋଡା ଯାଇଛି।”
“ରାଜ୍ୟ ପୋଲିସ CID ଅଧୀନରେ SIT ଏପର୍ଯ୍ୟନ୍ତ ସାତ ଜଣଙ୍କୁ ଗିରଫ କରିଛି। ୨୫୨ ଜଣ ସାକ୍ଷୀଙ୍କୁ ପଚରାଉଚରା କରାଯାଇଥିବା ବେଳେ ମାମଲା ସହିତ ଜଡିତ ୨୯ ଜିନିଷ ଜବତ କରିଛି। ଅଭିଯୁକ୍ତମାନଙ୍କ ମଧ୍ୟରୁ ଜଣେ ଜୁବୀନ ଗର୍ଗଙ୍କୁ ହତ୍ୟା କରିଥିବା ବେଳେ ଅନ୍ୟମାନେ ତାଙ୍କୁ ସହାୟତା କରିଛନ୍ତି।” ହତ୍ୟା ମାମଲାରେ ଚାରିରୁ ପାଞ୍ଚ ଜଣଙ୍କ ବିରୁଦ୍ଧରେ ମାମଲା ରୁଜୁ କରାଯାଉଛି।
ସେ ଆହୁରି ମଧ୍ୟ କହିଛନ୍ତି ଯେ, “ଡିସେମ୍ବରରେ ହତ୍ୟା ମାମଲାରେ ଚାର୍ଜସିଟ୍ ଦାଖଲ ହେବା ପରେ ତଦନ୍ତକୁ ଅବହେଳା ଏବଂ ଅନ୍ୟାନ୍ୟ ଦିଗଗୁଡ଼ିକୁ ଅନ୍ତର୍ଭୁକ୍ତ କରି ବିସ୍ତାର କରାଯିବ।” ସେ ଦାବି କରିଥିଲେ ଯେ SIT ଏକ ଦୃଢ଼ ଚାର୍ଜସିଟ୍ ଦାଖଲ କରିବ ଏବଂ ଅପରାଧ ପଛରେ ଥିବା ଉଦ୍ଦେଶ୍ୟ ରାଜ୍ୟବାସୀଙ୍କୁ ଚକିତ କରିବ। ସେପ୍ଟେମ୍ବର ୧୯ ତାରିଖରେ ସିଙ୍ଗାପୁରରେ ପହଁରିବା ସମୟରେ ଜୁବୀନ୍ ଗର୍ଗଙ୍କ ହଠାତ୍ ମୃତ୍ୟୁ ହୋଇଥିଲା।
Comments are closed.