India rejects Bangladesh media’s report: ବାଂଲାଦେଶର ‘ବିଭ୍ରାନ୍ତିକର ପ୍ରଚାର’କୁ ଭାରତ କଲା ପ୍ରତ୍ୟାଖ୍ୟାନ;ଜାଣନ୍ତୁ କେଉଁ ମିଛ ପ୍ରଚାର କରୁଛନ୍ତି…
ନୂଆଦିଲ୍ଲୀ: ବାଂଲାଦେଶରେ ଚାଲିଥିବା ଗଣମାଧ୍ୟମ ରିପୋର୍ଟକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରି ଏହାକୁ “ବିଭ୍ରାନ୍ତିକର ପ୍ରଚାର” ବୋଲି କହିଛି ଭାରତ । ଦିଲ୍ଲୀରେ ବାଂଲାଦେଶୀ ହାଇକମିଶନ ବାହାରେ ହୋଇଥିବା ପ୍ରତିବାଦ ସମ୍ପର୍କରେ ବାଂଲାଦେଶରେ ପ୍ରଦର୍ଶିତ ହେଉଥିବା ମିଡିଆ ରିପୋର୍ଟ ଉପରେ ଭାରତୀୟ ବୈଦେଶିକ ମନ୍ତ୍ରଣାଳୟ ପ୍ରତିକ୍ରିୟା ଦେଇଛି। ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ ରବିବାର କହିଛନ୍ତି ଯେ ବାଂଲାଦେଶ ହାଇକମିଶନର ବାଡ଼ ଭାଙ୍ଗିବାକୁ କୌଣସି ଚେଷ୍ଟା କରାଯାଇ ନାହିଁ। ଘଟଣାସ୍ଥଳରେ ନିୟୋଜିତ ପୋଲିସ କିଛି ମିନିଟ୍ ମଧ୍ୟରେ ଏକତ୍ରିତ ହୋଇଥିବା ଭିଡ଼କୁ ଘଉଡ଼ାଇ ଦେଇଥିଲା।
ବାଂଲାଦେଶୀ ଗଣମାଧ୍ୟମରେ ପ୍ରକାଶିତ କିଛି ରିପୋର୍ଟରେ ଦାବି କରାଯାଇଛି ଯେ ବାଂଲାଦେଶୀ ହାଇକମିଶନ ବାହାରେ ପ୍ରତିବାଦ କରୁଥିବା ଯୁବକମାନେ ପରିସରରେ ସୁରକ୍ଷା ବ୍ୟବସ୍ଥା ଭଙ୍ଗ କରିବାକୁ ଚେଷ୍ଟା କରିଥିଲେ। ବୈଦେଶିକ ମନ୍ତ୍ରଣାଳୟ କହିଛି ଯେ “ବାଡ଼ ଭାଙ୍ଗିବା କିମ୍ବା ସୁରକ୍ଷା ପରିସ୍ଥିତିକୁ ବିପର୍ଯ୍ୟସ୍ତ କରିବା ପାଇଁ କୌଣସି ସମୟରେ ଚେଷ୍ଟା କରାଯାଇ ନାହିଁ।”
ବୈଦେଶିକ ମନ୍ତ୍ରଣାଳୟ ଏହି ରିପୋର୍ଟଗୁଡ଼ିକୁ ଭ୍ରାମକ ବୋଲି କହି ଖାରଜ କରିଦେଇଛି। ମନ୍ତ୍ରଣାଳୟ ଆହୁରି ମଧ୍ୟ କହିଛି ଯେ ପ୍ରତିବାଦ ଛୋଟ ଏବଂ ଶାନ୍ତିପୂର୍ଣ୍ଣ ଥିଲା, ଏବଂ ପୋଲିସ ଏହାକୁ ଶୀଘ୍ର ଘଉଡ଼ାଇ ଦେଇଥିଲା। ପ୍ରତିବାଦ କୌଣସି ସୁରକ୍ଷା ବିପଦ ସୃଷ୍ଟି କରିନାହିଁ।
ଗଣମାଧ୍ୟମର ପ୍ରଶ୍ନର ଉତ୍ତର ଦେଇ, ବୈଦେଶିକ ମନ୍ତ୍ରଣାଳୟ (MEA) ମୁଖପାତ୍ର ରଣଧୀର ଜୟସୱାଲ କହିଛନ୍ତି ଯେ ବାଂଲାଦେଶର ମୈମନସିଂରେ ଦୀପୁ ଚନ୍ଦ୍ର ଦାସଙ୍କ ନିର୍ମମ ହତ୍ୟା ଏବଂ ପଡ଼ୋଶୀ ଦେଶରେ ସଂଖ୍ୟାଲଘୁଙ୍କ ସୁରକ୍ଷା ଦାବି କରିବା ପାଇଁ ଡିସେମ୍ବର ୨୦ ତାରିଖରେ ୨୦-୨୫ ଜଣ ଯୁବକ ଉଚ୍ଚାୟୋଗ ବାହାରେ ଏକତ୍ରିତ ହୋଇଥିଲେ। ପ୍ରତିବାଦକାରୀମାନେ ପୀଡିତାଙ୍କ ପାଇଁ ନ୍ୟାୟ ଏବଂ ବାଂଲାଦେଶରେ ସଂଖ୍ୟାଲଘୁଙ୍କ ସୁରକ୍ଷା ଦାବି କରି ସ୍ଲୋଗାନ ଦେଇଥିଲେ।
ସେ ଆହୁରି କହିଛନ୍ତି ଯେ ଘଟଣାର ଦୃଶ୍ୟ ପ୍ରମାଣ ସାର୍ବଜନୀନ ଭାବରେ ଉପଲବ୍ଧ ଏବଂ ସୁରକ୍ଷା ବଳୟ ଭାଙ୍ଗିବା ପାଇଁ ଚେଷ୍ଟା କରାଯାଉଥିବା ଦାବିକୁ ଖଣ୍ଡନ କରୁଛୁ ।
ଜୟସୱାଲ ଭିଏନା ଚୁକ୍ତି ଅନୁଯାୟୀ, ନିଜ ଅଞ୍ଚଳରେ ଅବସ୍ଥିତ ବିଦେଶୀ କୂଟନୈତିକ ମିଶନର ସୁରକ୍ଷା ସୁନିଶ୍ଚିତ କରିବା ପାଇଁ ଭାରତର ପ୍ରତିବଦ୍ଧତାକୁ ଦୋହରାଇଥିଲେ।
ଜୟସୱାଲ କହିଛନ୍ତି, “ଭାରତ ବାଂଲାଦେଶରେ ସୃଷ୍ଟି ହେଉଥିବା ପରିସ୍ଥିତି ଉପରେ ନିରନ୍ତର ନଜର ରଖିଛି। ଆମର ଅଧିକାରୀମାନେ ବାଂଲାଦେଶୀ କର୍ତ୍ତୃପକ୍ଷଙ୍କ ସହ ଯୋଗାଯୋଗରେ ଅଛନ୍ତି, ଏବଂ ଆମେ ସଂଖ୍ୟାଲଘୁଙ୍କ ଉପରେ ହେଉଥିବା ଆକ୍ରମଣ ସମ୍ପର୍କରେ ସେମାନଙ୍କ ସହ ଆମର ଗଭୀର ଚିନ୍ତା ପ୍ରକାଶ କରିଛୁ।ଦାସଙ୍କ ହତ୍ୟା ପାଇଁ ଦାୟୀ ଲୋକଙ୍କୁ ତୁରନ୍ତ ଚିହ୍ନଟ କରି ଦଣ୍ଡିତ କରିବାକୁ ଭାରତ ଅନୁରୋଧ କରିଛି।”
ସୂଚନାଥାଉକି, ଗୁରୁବାର ବାଂଲାଦେଶର ମୈମନସିଂ ସହରରେ ଦୀପୁ ଚନ୍ଦ୍ର ଦାସ (୨୫)ଙ୍କୁ ଏକ ଭିଡ଼ ପିଟି ପିଟି ହତ୍ୟା କରିଛି। ଛାତ୍ର ନେତା ସରିଫ ଓସମାନ ହାଦିଙ୍କ ମୃତ୍ୟୁ ପରେ ବାଂଲାଦେଶରେ ଅଶାନ୍ତି ଜାରି ରହିଛି। ଶେଖ ହାସିନାଙ୍କ ସରକାରର ପତନ ପାଇଁ ହୋଇଥିବା ସରକାର ବିରୋଧୀ ପ୍ରତିବାଦରେ ହାଦି ଜଣେ ପ୍ରମୁଖ ବ୍ୟକ୍ତି ଥିଲେ।