ନୂଆଦିଲ୍ଲୀ: କିଛି କରିପାରିଲେନି ଟ୍ରମ୍ପ
ବିଫଳ ହେଲା ସବୁ ଚାଲ
ରେକର୍ଡ ସୃଷ୍ଟି କଲା ଭାରତ
ଗୋଟିଏ ବର୍ଷରେ ୪୧ ଲକ୍ଷ କୋଟିର ରପ୍ତାନି
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଅଗଷ୍ଟ ୭, ୨୦୨୫ ରୁ ଭାରତୀୟ ରପ୍ତାନି ଉପରେ ଶୁଳ୍କ ଲାଗୁ କରିଥିଲେ। ପ୍ରାରମ୍ଭରେ, ଏହା ୨୫ ପ୍ରତିଶତ ଥିଲା, କିନ୍ତୁ ପରେ ଟ୍ରମ୍ପ ଏହାକୁ ୫୦ ପ୍ରତିଶତକୁ ବୃଦ୍ଧି କରିଥିଲେ। ରୁଷରୁ ଅଶୋଧିତ ତେଲ କିଣିବା ଉପରେ ଅତିରିକ୍ତ ୨୫ ପ୍ରତିଶତ ଶୁଳ୍କ ଲାଗୁ କରାଯାଇଥିଲା। ରପ୍ତାନି ଉପରେ ଶୁଳ୍କର ପ୍ରଭାବ ଏତେ ଥିଲା ଯେ ଭାରତର ଆମେରିକା ବଜାରକୁ ରପ୍ତାନି ହ୍ରାସ ପାଇଲା। ଏହା ଦେଶର ସାମଗ୍ରିକ ରପ୍ତାନିରେ ହ୍ରାସର ସମ୍ଭାବନା ମଧ୍ୟ ବୃଦ୍ଧି କରିଥିଲା। ତଥାପି ରପ୍ତାନି ସଂଖ୍ୟା ଉପରେ କୌଣସି ନକାରାତ୍ମକ ପ୍ରଭାବ ଏଡାଇବା ପାଇଁ, ସରକାର ଅନେକ ଦେଶ ସହିତ ମୁକ୍ତ ବାଣିଜ୍ୟ ଚୁକ୍ତିନାମା (FTA) ମଧ୍ୟ ସ୍ୱାକ୍ଷର କରିଥିଲେ। ଯାହା ଫଳରେ ଟ୍ରମ୍ପଙ୍କ ଶୁଳ୍କ ସତ୍ତ୍ୱେ, ଭାରତୀୟ ରପ୍ତାନିରେ ଏକ ଉଲ୍ଲେଖନୀୟ ବୃଦ୍ଧି ଘଟୁଛି।
ଆର୍ଥିକ ବର୍ଷ ୨୦୨୫-୨୬ ରେ, ଦେଶ ୪୪୧.୧ ବିଲିୟନ ଡଲାର୍, ଭାରତୀୟ ମୁଦ୍ରାରେ ପ୍ରାୟ ୪୧ ଲକ୍ଷ କୋଟି ଟଙ୍କା ମୂଲ୍ୟର ସାମଗ୍ରୀ ରପ୍ତାନି କରିଥିଲା। ଏହା ପୂର୍ବ ବର୍ଷ ତୁଳନାରେ ୧ ପ୍ରତିଶତ ଅଧିକ। ପଶ୍ଚିମ ଏସିଆରେ ଚାଲିଥିବା ଦ୍ୱନ୍ଦ୍ୱ ଏବଂ ଗତ ତ୍ରୟମାସରେ ଆମେରିକାର ଶୁଳ୍କ ରପ୍ତାନିକୁ ନକାରାତ୍ମକ ଭାବରେ ପ୍ରଭାବିତ କରିବା ସତ୍ତ୍ୱେ ମଧ୍ୟ ଭାରତ ଏହି ରେକର୍ଡ଼ ସ୍ତରୀୟ ସଫଳତା ହାସଲ କରିଛି। ଯାହା ତ୍ରୁମ୍ପଙ୍କ ଶୁଳ୍କ ଚାଲ୍ ପ୍ରତି ଏକ ଶକ୍ତ ଚାପୁଡ଼ା। ଏହା ସତ୍ତ୍ୱେ, ଦେଶର ରପ୍ତାନି ସମ୍ଭାବନା ମଧ୍ୟ ଦୃଢ଼ ରହିଛି। ଏହି ସମୟରେ, ଭାରତୀୟ ଆମଦାନିରେ ମଧ୍ୟ ୭.୫ ପ୍ରତିଶତ ବୃଦ୍ଧି ଘଟିଛି, ଯାହା ୭୭୫ ବିଲିୟନ ଡଲାରରେ ପହଞ୍ଚିଛି।
ତେବେ ଏଥିରେ ସବୁଠୁ ଅଧିକ କାରବାର ହୋଇଛି ସୁନା ଏବଂ ରୂପା। ସୁନା ଏବଂ ରୂପା ମୂଲ୍ୟରେ ବୃଦ୍ଧି ଏବଂ ଅଧିକ କ୍ରୟ ଦ୍ୱାରା ଭାରତୀୟ ଆମଦାନିରେ ବୃଦ୍ଧି ଘଟିଛି। ଏହା ଫଳରେ ଦେଶର ବାଣିଜ୍ୟ ନିଅଣ୍ଟ ୩୩୩ ବିଲିୟନ ଡଲାରକୁ ବୃଦ୍ଧି ପାଇଛି। ତଥାପି, ମାର୍ଚ୍ଚରେ ପରିସ୍ଥିତିରେ ସାମାନ୍ୟ ଉନ୍ନତି ଘଟିଛି। ରପ୍ତାନି ୭.୬% ହ୍ରାସ ପାଇ ୩୮.୯ ବିଲିୟନ ଡଲାର ହୋଇଛି, ଯେତେବେଳେ ଆମଦାନି ୬.୪ ପ୍ରତିଶତ ହ୍ରାସ ପାଇ ୫୯.୬ ବିଲିୟନ ଡଲାର ହୋଇଛି। ଏହା ଫଳରେ ବାଣିଜ୍ୟ ନିଅଣ୍ଟ ନଅ ମାସର ସର୍ବନିମ୍ନ ୨୦.୭ ବିଲିୟନ ଡଲାରକୁ ହ୍ରାସ ପାଇଛି।
ଆଉ ଯଦି ଏହା ସହିତ ସେବା ରପ୍ତାନିକୁ ଅନ୍ତର୍ଭୁକ୍ତ କରାଯାଏ, ମୋଟ ରପ୍ତାନି ୪ ପ୍ରତିଶତ ବୃଦ୍ଧି ପାଇ ୮୬୦.୧ ବିଲିୟନ ଡଲାର ରେକର୍ଡ କରିଛି। ମୋଟ ଆମଦାନି ୬.୪ ପ୍ରତିଶତ ବୃଦ୍ଧି ପାଇ ପ୍ରାୟ ୯୨୦ ବିଲିୟନ ଡଲାର ହୋଇଛି। ବାଣିଜ୍ୟ ଏବଂ ଶିଳ୍ପ ମନ୍ତ୍ରୀ ପୀୟୁଷ ଗୋୟଲ ସୋସିଆଲ ମିଡିଆରେ ଲେଖିଛନ୍ତି, “ଭାରତ ଏକ ନୂତନ ରପ୍ତାନି ରେକର୍ଡ ସ୍ଥାପନ କରିଛି! ୨୦୨୫-୨୬ ଆର୍ଥିକ ବର୍ଷରେ ୮୬୦ ବିଲିୟନ ଡଲାର ପାଇଁ ଗର୍ବିତ।” ଯାହା ଭାରତ ପାଇଁ ବେଶ୍ ଖୁସିର ଖବର।