Sharp Weapons Recovered:ଘରୁ ମିଳିଲା ୪,୦୦୦ ରୁ ଅଧିକ ଖଣ୍ଡା ଏବଂ ଧାରୁଆ ଅସ୍ତ୍ରଶସ୍ତ୍ର;ମୋଟ ମୂଲ୍ୟ ୪୩ ଲକ୍ଷରୁ ଅଧିକ

ମହାରାଷ୍ଟ୍ର:ମହାରାଷ୍ଟ୍ରର ନାନ୍ଦେଡ଼ରେ ପୋଲିସ ବିପୁଳ ପରିମାଣର ଅବୈଧ ଅସ୍ତ୍ରଶସ୍ତ୍ର ଜବତ । ସହରର ୱଜିରାବାଦ ଅଞ୍ଚଳର ରାମଦାସ ନଗରରେ ଏକ ଘରେ ଚଢାଉ ସମୟରେ ପୋଲିସକୁ ବିପୁଳ ପରିମାଣର ଖଣ୍ଡା,ଭୁଜାଲି ଏବଂ ଅନ୍ୟାନ୍ୟ ଧାରୁଆ ଅସ୍ତ୍ରଶସ୍ତ୍ର ମିଳିଥିଲା। ଉଦ୍ଧାର ହୋଇଥିବା ଅସ୍ତ୍ରଶସ୍ତ୍ରର ସଂଖ୍ୟା ଏବଂ ପରିମାଣ ଦେଖି ପୋଲିସ ଅଧିକାରୀମାନେ ମଧ୍ୟ ଚକିତ ହୋଇଯାଇଥିଲେ। ପୋଲିସ ପ୍ରାୟ ୪,୭୯୬ଟି ଧାରୁଆ ଅସ୍ତ୍ର ଜବତ କରିଛି ।

ରିପୋର୍ଟ ଅନୁସାରେ, ନାନ୍ଦେଡ଼ ଗ୍ରାମୀଣ ପୋଲିସ ଷ୍ଟେସନର ଏକ ଦଳ ରାମଦାସ ନଗର ଅଞ୍ଚଳରେ ବେଆଇନ ଅସ୍ତ୍ରଶସ୍ତ୍ର ସଂରକ୍ଷଣ କରୁଥିବାର ବିଷୟରେ ସୂଚନା ପାଇଥିଲା। ସୂଚନା ଆଧାରରେ, ପୋଲିସ ସମ୍ପୃକ୍ତ ଘର ଉପରେ ଚଢାଉ କରିଥିଲା।

ଜବତ ହୋଇଥିବା ଅସ୍ତ୍ରଶସ୍ତ୍ରର ମୋଟ ମୂଲ୍ୟ ପ୍ରାୟ ₹୪୩ ଲକ୍ଷ ୫0ହଜାର ହେବ ବୋଲି ଆକଳନ କରାଯାଇଛି। ଏହି ମାମଲାରେ ପୋଲିସ ଅଭିଯୁକ୍ତ ୫୦ ବର୍ଷୀୟ ଜସୱନ୍ତ ସିଂହ ପ୍ରକାଶ ସିଂହ ସୁଖମଣିଙ୍କୁ ଗିରଫ କରିଛି।

ପ୍ରାଥମିକ ତଦନ୍ତରୁ ଜଣାପଡିଛି ଯେ ଅଭିଯୁକ୍ତ ଏହି ଅସ୍ତ୍ରଶସ୍ତ୍ରଗୁଡ଼ିକୁ ବିକ୍ରି ପାଇଁ ଆଣିଥିଲେ ଏବଂ ବିଭିନ୍ନ ସ୍ଥାନରେ ଯୋଗାଇବାକୁ ପ୍ରସ୍ତୁତ ହେଉଥିଲେ। ପୋଲିସ ଦଳ ଘଟଣାସ୍ଥଳରୁ ବିପୁଳ ପରିମାଣର ଅସ୍ତ୍ରଶସ୍ତ୍ର ଜବତ କରି ଅଧିକ ତଦନ୍ତ ଆରମ୍ଭ କରିଛି।

ଏତେ ପରିମାଣର ଅସ୍ତ୍ରଶସ୍ତ୍ର କେଉଁଠାରୁ ଆସିଲା ଏବଂ କାହାକୁ ଯୋଗାଇବାକୁ ଉଦ୍ଦିଷ୍ଟ ଥିଲା ତାହା ପୋଲିସ ଏବେ ଖୋଜାଖୋଜି କରୁଛି।

ନାନ୍ଦେଡ଼ ପୋଲିସ ଅଧିକ୍ଷକ ପୋଲିସ ଟିମ୍ କୁ ପ୍ରଶଂସା କରିଛନ୍ତି । ସେ କହିଛନ୍ତି ଯେ ଅବୈଧ ଅସ୍ତ୍ରଶସ୍ତ୍ର କାରବାର ବିରୋଧରେ ପୋଲିସ ଅଭିଯାନ ଜାରି ରହିବ। ଆଇନ ଶୃଙ୍ଖଳା ବିପର୍ଯ୍ୟସ୍ତ କରିବାକୁ ଚେଷ୍ଟା କରୁଥିବା ଲୋକଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।