ୱେଲିଂଟନ : ୱେଲିଂଟନର ସ୍କାଏ ଷ୍ଟାଡିୟମ୍ରେ ଖେଳାଯାଇଥିବା ବର୍ଷାବାଧିତ ଦ୍ୱିତୀୟ ଏକଦିବସୀୟ ମ୍ୟାଚ୍ରେ ଭାରତୀୟ ଦଳ ନ୍ୟୁଜିଲାଣ୍ଡକୁ ଡକ୍ୱର୍ଥ-ଲୁଇସ ନିୟମ ଅନୁସାରେ ୪ ରନ୍ରେ ପରାସ୍ତ କରିଛି । ଏହି ସଂଘର୍ଷପୂର୍ଣ୍ଣ ବିଜୟ ସହ ଭାରତ ୩ ମ୍ୟାଚ୍ ବିଶିଷ୍ଟ ସିରିଜ୍ରେ ୨-୦ରେ ଆଗୁଆ ରହି ସିରିଜ୍ ନିଜ ନାମରେ କରିନେଇଛି । ଟସ୍ ଜିତି ଭାରତ ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା । ଭାରତୀୟ ପେସର୍ ଗୁରନୁର ବ୍ରାର ଆରମ୍ଭରୁ ହିଁ କିୱି ବ୍ୟାଟରଙ୍କ ଉପରେ ଚାପ ପକାଇ ୧୦ ଓଭରରେ ୨ଟି ମେଡେନ୍ ସହ ମାତ୍ର ୩୦ ରନ୍ ଦେଇ ୪ଟି ମୂଲ୍ୟବାନ୍ ୱିକେଟ୍ ଅକ୍ତିଆର କରିଥିଲେ । ଅନ୍ୟପଟେ ଅଂଶୁଲ କାମ୍ବୋଜ, ଆକିବ ନବୀ ଏବଂ ଅକ୍ଷର ପଟେଲ ୨ଟି ଲେଖାଏଁ ୱିକେଟ୍ ନେଇ ନ୍ୟୁଜିଲାଣ୍ଡକୁ ୪୧ ଓଭରରେ ମାତ୍ର ୧୩୪ ରନ୍ରେ ଅଲ୍ଆଉଟ୍ କରିଦେଇଥିଲେ । ନ୍ୟୁଜିଲାଣ୍ଡ ପକ୍ଷରୁ ଡାରିଲ୍ ମିଚେଲ୍ (୫୫) ଏକାକୀ ଲଢ଼େଇ କରି ଅର୍ଦ୍ଧଶତକ ହାସଲ କରିଥିବା ବେଳେ ମିଚେଲ୍ ସାଣ୍ଟନର୍ (୩୧) କିଛି ସମୟ ସାଥ୍ ଦେଇଥିଲେ ।
୧୩୫ ରନ୍ର ଛୋଟ ଲକ୍ଷ୍ୟ ପିଛା କରୁଥିବା ଭାରତୀୟ ଟପ୍-ଅର୍ଡର ଶୀଘ୍ର ଧରାଶାୟୀ ହୋଇଥିଲା । ଶୁବମନ ଗିଲ୍ (୦) ଓ ବିରାଟ କୋହଲି (୭) ସସ୍ତାରେ ଆଉଟ୍ ହୋଇଥିବା ବେଳେ ରୋହିତ ଶର୍ମା ୨୩ ରନ୍ କରିଥିଲେ ।bଏହାପରେ ଶ୍ରେୟସ ଆୟର (୩୦) ଏବଂ କେ.ଏଲ୍. ରାହୁଲ (ଅପରାଜିତ ୨୬) ଇନିଂସକୁ ସମ୍ଭାଳିଥିଲେ । ଭାରତ ୨୬ ଓଭରରେ ୭ ୱିକେଟ୍ ହରାଇ ୧୧୩ ରନ୍ କରିଥିବା ବେଳେ ପ୍ରବଳ ବର୍ଷା ଯୋଗୁଁ ଖେଳ ବନ୍ଦ ହୋଇଥିଲା । ଡିଏଲ ନିୟମ ଅନୁସାରେ ଭାରତ ସେହି ସମୟରେ ଆଗୁଆ ରହିଥିବାରୁ ବିଜୟୀ ଘୋଷିତ କରାଯାଇଥିଲା ।
