ଭୁବନେଶ୍ବର: ବିଜେଡିକୁ ବଡ ଝଟକା । ଦଳ ଛାଡିଲେ ବରିଷ୍ଠ ତଥା ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ । ସୋମବାର ବିଜେଡିର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି ଦେବାଶିଷ । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ପାଖକୁ ନିଜର ଇସ୍ତଫା ପତ୍ର ପଠାଇ ଦଳ ତ୍ୟାଗ କରିଛନ୍ତି ।
ତେବେ ପୂର୍ବରୁ ଦେବାଶିଷ ବିଜେଡି ଛାଡିବା ନେଇ ଚର୍ଚ୍ଚା ଜୋର ଧରିଥିବା ବେଳେ ବାସ୍ତବରେ ତାହା ସତ ହୋଇଛି । ସୋମବାର ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ ବିଜୁ ଜନତା ଦଳ (ବିଜେଡି) ଛାଡି ଭାରତୀୟ ଜନତା ପାର୍ଟି (ବିଜେପି)ରେ ଯୋଗ ଦେବାନେଇ କଳ୍ପନାଜଳ୍ପନା ତୀବ୍ର ହୋଇଥିଲା । ତଥାପି ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ, ଯେ ସେ ବିଜେପିରେ ଯୋଗ ଦେବେ କି ନାହିଁ?
ଇସ୍ତଫା ନେଇ ନବୀନଙ୍କ ନିକଟକୁ ପଠାଇଥିବା ପତ୍ରରେ ଦେବାଶିଷ ଲେଖିଛନ୍ତି ଯେ, “ମୁଁ ଆଜି, ଅର୍ଥାତ୍ ମେରେ ବିଜେଡିର ପ୍ରାଥମିକ ସଦସ୍ୟତାରୁ ଇସ୍ତଫା ଦେଉଛି। ମୋତେ ରାଜ୍ୟସଭାକୁ ମନୋନୀତ କରିବା ପାଇଁ ମୁଁ ସର୍ବଦା ଆପଣଙ୍କ ନିକଟରେ ଋଣୀ ରହିବି। ଅବିଭକ୍ତ କଟକ ଜିଲ୍ଲାର ଲୋକଙ୍କ ସେବା କରିବା ଏବଂ ଜାତୀୟ ସ୍ତରରେ ଓଡ଼ିଶାର ସମସ୍ୟା ଉଠାଇବା ପାଇଁ ମୋତେ ସୁଯୋଗ ଦେଇଥିବାରୁ ମୁଁ ଆପଣଙ୍କ ପ୍ରତି ମୋର ଆନ୍ତରିକ ଏବଂ ଗଭୀର କୃତଜ୍ଞତା ପ୍ରକାଶ କରିବାକୁ ଏହି ସୁଯୋଗ ନେଉଛି। ମୁଁ ସର୍ବଦା ଦଳର ସ୍ୱାର୍ଥ ପାଇଁ ନିଜକୁ ଉତ୍ସର୍ଗ କରିଆସିଛି ଏବଂ ବର୍ଷ ବର୍ଷ ଧରି ଅତ୍ୟନ୍ତ ଦୃଢ଼ତାର ସହିତ ଦଳ ପାଇଁ କାମ କରିଆସିଛି। ତଥାପି, ମୁଁ ଅନୁଭବ କରୁଛି ଯେ, ବର୍ତ୍ତମାନ ମୋତେ ଦଳରେ ଅପମାନିତ କରାଯାଉଛି ଏବଂ ଦଳ ମୋ ସେବା ଆବଶ୍ୟକ କରେ ନାହିଁ। ତେଣୁ, ମୁଁ ଜନସ୍ୱାର୍ଥ ପାଇଁ ଏହି କଠିନ ନିଷ୍ପତ୍ତି ନେଇଛି ଏବଂ ମୋର ଇସ୍ତଫା ଗ୍ରହଣ କରିବାକୁ ଆପଣଙ୍କୁ ଅନୁରୋଧ କରୁଛି”।
ତେବେ ଦେବାଶିଷ ସାମନ୍ତରାୟ ତାଙ୍କ ଦଳ ତ୍ୟାଗ ନିଷ୍ପତ୍ତି ପଛରେ ଥିବା କୌଣସି ନିର୍ଦ୍ଦିଷ୍ଟ କାରଣ ବିସ୍ତୃତ ଭାବରେ କହି ନଥିଲେ ମଧ୍ୟ, ରାଜନୈତିକ ମହଲରେ ଦଳ ମଧ୍ୟରେ ତାଙ୍କର ରିପୋର୍ଟ ହୋଇଥିବା ଅସନ୍ତୋଷ ପାଇଁ ଅନେକ କାରଣ ଉପରେ ଚର୍ଚ୍ଚା ହେଉଛି । ଯେଉଁଥିରେ ୱାକଫ୍ ବିଲ୍ ଉପରେ ବିଜେଡିର ମତ, ସଂଗଠନ ମଧ୍ୟରେ ଭି.କେ. ପାଣ୍ଡିଆନଙ୍କ ବଢୁଥିବା ପ୍ରଭାବ ଉପରେ ଚିନ୍ତା ଏବଂ ବାରମ୍ବାର ଅନୁରୋଧ ସତ୍ତ୍ୱେ ନବୀନ ପଟ୍ଟନାୟକଙ୍କ ସାକ୍ଷାତ କରିବା ସହଜ ହେଉନଥିବା ପ୍ରସଙ୍ଗ ରହିଛି ।
ଏହା ବି କୁହାଯାଉଛି ଯେ, ଲଗାତାର ଦଳ ମଧ୍ୟରେ ଅନୁଶାସନ ସୃଷ୍ଟି କରୁଥିବା ଅଭିଯୋଗରେ ବ୍ୟକ୍ତିବିଶେଷଙ୍କ ସମ୍ପର୍କରେ ଉଠାଯାଇଥିବା କାର୍ଯ୍ୟାନୁଷ୍ଠାନ, ଯୁବ ଏବଂ ଦ୍ୱିତୀୟ ପିଢ଼ିର ନେତାମାନଙ୍କ ପାଇଁ ଅଧିକ ସୁଯୋଗ ପାଇଁ ଦାବି ଏବଂ ସନ୍ତୃପ୍ ମିଶ୍ରଙ୍କୁ ରାଜ୍ୟସଭାକୁ ମନୋନୀତ କରିବା ଭଳି ପ୍ରସଙ୍ଗ ବି ଦେବାଶିଷଙ୍କ ନିଷ୍ପତ୍ତିର କାରଣ ହୋଇପାରେ । ଏଥିସହିତ ଏହା ବି ଚର୍ଚ୍ଚା ହେଉଛି ଯେ, ଉପର ମହଳର ବରିଷ୍ଠ ନେତାମାନଙ୍କ ମଧ୍ୟରେ ଦେବାଶିଷ ସାମନ୍ତରାୟ ଥିଲେ ମଧ୍ୟ ରାଜ୍ୟସଭାରେ ମାନସ ମଙ୍ଗରାଜଙ୍କୁ ବିଜେଡି ସଂସଦୀୟ ଦଳର ନେତା ଭାବରେ ନିଯୁକ୍ତି କରିବା ଦେବାଶିଷ ଅସନ୍ତୁଷ୍ଟ ଥିଲେ। ତଥାପି ଦେବାଶିଷ ଏନେଇ କୌଣସି ସାର୍ବଜନୀନ ପ୍ରତିକ୍ରିୟା ରଖିନାହାନ୍ତି ।
ଦେବାଶିଷଙ୍କ ଏହି ନିଷ୍ପତ୍ତି ଏପରି ଏକ ସମୟରେ ଆସିଛି, ଯେତେବେଳେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସୋମବାର ନୂଆଦିଲ୍ଲୀ ଗସ୍ତ ଯାଇଛନ୍ତି । ଯାହା ଦେବାଶିଷ ବିଜେପିରେ ଯୋଗ ଦେବା ଖବରକୁ ଅଧିକ ଇନ୍ଧନ ଦେଇଛି । ତଥାପି ଏବେ ବିଜେଡି ଛାଡିବା ପରେ ଦେବାଶିଷଙ୍କ ପରବର୍ତ୍ତୀ ପଦକ୍ଷେପ କ’ଣ ହେବ ତାହା ଉପରେ ସମସ୍ତଙ୍କ ନଜର ରହିଛି ।