ସୋନପୁର: ରବିବାର ସକାଳେ ଜଣେ ନବବିବାହିତା ମହିଳା ସୋନପୁର-ସମ୍ବଲପୁର ରାସ୍ତାରେ ମହାନଦୀ ସେତୁରୁ ଡେଇଁ ଆତ୍ମହତ୍ୟା କରିବାକୁ ଚେଷ୍ଟା କରିଥିଲେ। ଯାହାକୁ ନେଇ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି।
ସୂଚନା ଅନୁଯାୟୀ, ସୋନପୁର ଥାନା ଅନ୍ତର୍ଗତ କଇଁଫୁଲ ଗ୍ରାମର ଜଣେ ମହିଳା ତାଙ୍କ ସ୍ୱାମୀଙ୍କ ସହିତ ବାଇକରେ ଯିବା ସମୟରେ କୌଣସି କାରଣକୁ ନେଇ ଦୁହିଁଙ୍କ ମଧ୍ୟରେ କଥା କଟାକଟି ହୋଇଥିଲା। ପ୍ରାୟ ୧୫ ଦିନ ପୂର୍ବେ ବିବାହ କରିଥିଲେ ଏହି ଦମ୍ପତି। ତେବେ ସ୍ତ୍ରୀଙ୍କୁ ଶାନ୍ତ କରିବା ପାଇଁ ସ୍ୱାମୀ ମହାନଦୀ ସେତୁ ପାଖରେ ଅଟକି ଥିଲେ। ପରେ ଦମ୍ପତି କିଛି ଫଟୋ ଉଠାଇବା ସମୟରେ ହଠାତ୍ ମହିଳା ଜଣକ ରେଲିଂକୁ ଯାଇ ନଦୀକୁ ଡେଇଁ ପଡ଼ିଥିଲେ। ଅଚାନକ ଏଭଳି ପଦକ୍ଷେପରେ ତାଙ୍କ ସ୍ୱାମୀ ଏବଂ ଦେଖଣାହାରୀ ଆଶ୍ଚର୍ଯ୍ୟ ହୋଇପଡ଼ିଥିଲେ।
ତେବେ ସୌଭାଗ୍ୟ ବଶତଃ ମହାନଦୀରେ ଗାଧୋଉଥିବା ସ୍ଥାନୀୟ ଯୁବକ ତୁରନ୍ତ ପହଁରି ସେହି ସ୍ଥାନକୁ ଯାଇ ଉଦ୍ଧାର କରିବାକୁ ଚେଷ୍ଟା କରିଥିଲେ। ଏପରିକି ଲୋକମାନେ ତୁରନ୍ତ ସୋନପୁର ଅଗ୍ନିଶମ ସେବାକୁ ଖବର ଦେଇଥିଲେ। ଯେଉଁମାନେ ସ୍ଥାନୀୟ ଯୁବକମାନଙ୍କ ସହିତ ମିଶି ମହିଳାଙ୍କୁ ନଦୀରୁ ଉଦ୍ଧାର କରିବାରେ ସଫଳ ହୋଇଥିଲେ।
ସୂତ୍ର ଅନୁଯାୟୀ, ମହିଳା ଜଣକ ନଦୀର ଗଭୀର ଜଳଭାଗରେ ପଡ଼ିଯିବାରୁ ଗୁରୁତର ଆଘାତରୁ ଅଳ୍ପକେ ରକ୍ଷା ପାଇଯାଇଥିଲେ। ତେବେ ତାଙ୍କୁ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରା ଯାଇଥିଲା ବେଳେ ତାଙ୍କ ଅବସ୍ଥା ସ୍ଥିର ଥିବା କୁହାଯାଉଛି। ଅପରପକ୍ଷରେ ପୋଲିସ ଆତ୍ମହତ୍ୟା ଉଦ୍ୟମର କାରଣ ଜାଣିବା ପାଇଁ ତଦନ୍ତ ଆରମ୍ଭ କରିଛି।