NSA-level India-Canada Security Dialogue:ଭାରତ-କାନାଡ଼ା NSAସ୍ତରୀୟ ସୁରକ୍ଷା ବୈଠକରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି; ଆତଙ୍କବାଦ ବିରୋଧରେ ଉଭୟ ପକ୍ଷ ସହଯୋଗକୁ ସୁଦୃଢ଼ କରିବେ
ନୂଆଦିଲ୍ଲୀ:କାନାଡା ପ୍ରଧାନମନ୍ତ୍ରୀ ମାର୍କ କାର୍ନିଙ୍କ ବରିଷ୍ଠ ପରାମର୍ଶଦାତା ଡେଭିଡ୍ ମୋରିସନ୍ ଭାରତର ଜାତୀୟ ସୁରକ୍ଷା ପରାମର୍ଶଦାତା (NSA) ଅଜିତ ଡୋଭାଲଙ୍କ ସହ ଏକ ଗୁରୁତ୍ୱପୂର୍ଣ୍ଣ ବୈଠକ କରିଛନ୍ତି । ଏହି ବୈଠକ ସମୟରେ CEPA (Comprehensive Economic Partnership Agreement) ଏବଂ ପ୍ରତିରକ୍ଷା ସହଯୋଗ ସମ୍ପର୍କରେ ମଧ୍ୟ ଆଲୋଚନା ହୋଇଥିଲା।
ଉଭୟ ଦେଶ ମଧ୍ୟରେ ଜାତୀୟ ସୁରକ୍ଷା ପରାମର୍ଶଦାତା (NSA) ସ୍ତରୀୟ ସୁରକ୍ଷା ଆଲୋଚନା ସମୟରେ ଆତଙ୍କବାଦ, ହିଂସାତ୍ମକ ଚରମପନ୍ଥା, ନିଶାଦ୍ରବ୍ୟ ଓ ମାନବ ଚାଲାଣ ଠାରୁ ଆରମ୍ଭ କରି ସାଇବର ଅପରାଧ ଏବଂ ଜବରଦସ୍ତି ଚାନ୍ଦା ଆଦାୟ ଭଳି ବିଷୟଗୁଡ଼ିକ ଉପରେ ସହଯୋଗ ବୃଦ୍ଧି କରିବା ନେଇ ଏକ ସହମତି ସ୍ଥାପିତ ହୋଇଥିଲା। ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ନିମନ୍ତ୍ରଣ କ୍ରମେ କାନାଡାର ପ୍ରଧାନମନ୍ତ୍ରୀଙ୍କ କୂଟନୈତିକ ଓ ଆନ୍ତର୍ଜାତୀୟ ବ୍ୟାପାର ସମ୍ବନ୍ଧୀୟ ବରିଷ୍ଠ ପରାମର୍ଶଦାତା ଡେଭିଡ୍ ମୋରିସନ୍ ଭାରତ ଗସ୍ତରେ ଆସିଥିଲେ।
ଗତକାଲି (ମଙ୍ଗଳବାର) ନୂଆଦିଲ୍ଲୀରେ ଅନୁଷ୍ଠିତ ଏକ ଗୁରୁତ୍ୱପୂର୍ଣ୍ଣ ବୈଠକରେ, ଉଭୟ ପକ୍ଷ ସୁରକ୍ଷା ଏବଂ ଆଇନ ପ୍ରବର୍ତ୍ତନ କ୍ଷେତ୍ରରେ ଦ୍ୱିପାକ୍ଷିକ ସହଯୋଗ ସମୀକ୍ଷା କରିଥିଲେ। ଫେବୃଆରୀରେ ପ୍ରତିଷ୍ଠିତ ‘ସେୟାର୍ଡ ସିକ୍ୟୁରିଟି ୱାର୍କ ପ୍ଲାନ୍’ (Shared Security Work Plan) କାର୍ଯ୍ୟକାରୀ କରିବାରେ ହୋଇଥିବା ଅଗ୍ରଗତି ଉପରେ ଆଲୋଚନା ବିଶେଷ ଭାବରେ କେନ୍ଦ୍ରିତ ହୋଇଥିଲା।
ଆଲୋଚନା ସମୟରେ ଉଭୟ ଦେଶ ଆନ୍ତଃରାଷ୍ଟ୍ରୀୟ ସଂଗଠିତ ଅପରାଧ ବିରୁଦ୍ଧରେ ସହଯୋଗ ବୃଦ୍ଧି କରିବାକୁ ସହମତ ହୋଇଥିଲେ। ସେମାନେ ମାନବ ଚାଲାଣ ଏବଂ ନିଶାଦ୍ରବ୍ୟ ଚୋରାଚାଲାଣ ମୁକାବିଲା ପାଇଁ ପାରସ୍ପରିକ ସହଯୋଗ ବୃଦ୍ଧି ଉପରେ ଗୁରୁତ୍ୱାରୋପ କରିବା ସହିତ ଆତଙ୍କବାଦ ଏବଂ ହିଂସାତ୍ମକ ଉଗ୍ରବାଦ ମୁକାବିଲାରେ ସମନ୍ୱୟକୁ ମଜବୁତ କରିବାକୁ ମଧ୍ୟ ନିଷ୍ପତ୍ତି ନେଇଥିଲେ।
ଏହା ବ୍ୟତୀତ ସାଇବର ଅପରାଧ ଏବଂ ବର୍ଦ୍ଧିତ ପରିମାଣର ଚାନ୍ଦା ଆଦାୟ ମାମଲା ସମ୍ପର୍କରେ ସହଯୋଗ ବୃଦ୍ଧି ଉପରେ ଗୁରୁତ୍ୱାରୋପ କରାଯାଇଥିଲା। ଉଭୟ ରାଷ୍ଟ୍ର ୱାଣ୍ଟେଡ୍ ଅପରାଧୀଙ୍କ ପ୍ରତ୍ୟର୍ପଣ ସମ୍ବନ୍ଧୀୟ ପ୍ରସଙ୍ଗରେ ସହଯୋଗକୁ ମଜବୁତ କରିବାକୁ ମଧ୍ୟ ସହମତ ହୋଇଥିଲେ।
ଆଲୋଚନା ସମୟରେ ଉଭୟ ପକ୍ଷ ସାଇବର ସୁରକ୍ଷା ଏବଂ ଅର୍ଥନୈତିକ ସୁରକ୍ଷା ଭଳି କ୍ଷେତ୍ରରେ ନୂତନ ସଂରଚିତ ଆଲୋଚନା ଆରମ୍ଭ କରିବାର ସମ୍ଭାବନା ଅନୁସନ୍ଧାନ କରିବାକୁ ମଧ୍ୟ ସହମତ ହୋଇଥିଲେ। ଏହା ସହିତ, ସମ୍ବେଦନଶୀଳ ପ୍ରସଙ୍ଗ ଉପରେ ସୂଚନାର ସମୟୋଚିତ ଆଦାନପ୍ରଦାନକୁ ସହଜ କରିବା ପାଇଁ ଆବଶ୍ୟକୀୟ ସଂସ୍ଥାଗତ ବ୍ୟବସ୍ଥାକୁ ସୁଦୃଢ଼ କରିବା ଏବଂ ନୂତନ ଯୋଗାଯୋଗ ଚ୍ୟାନେଲ ସ୍ଥାପନ କରିବାକୁ ଉଭୟ ଦେଶ ରାଜି ହୋଇଥିଲେ।
ଆଲୋଚନାର ବିଷୟବସ୍ତୁ ମଧ୍ୟରେ ଅର୍ଥନୈତିକ ଓ ପ୍ରତିରକ୍ଷା ସମ୍ପର୍କ ତଥା ସୁରକ୍ଷା ସମ୍ବନ୍ଧୀୟ ଆଲୋଚନା ସାମିଲ ଥିଲା। ଉଭୟ ପକ୍ଷ ‘ବ୍ୟାପକ ଅର୍ଥନୈତିକ ଭାଗୀଦାରୀ ଚୁକ୍ତି’ (Comprehensive Economic Partnership Agreement (CEPA)) ଉପରେ ଆଲୋଚନାକୁ ଆଗକୁ ବଢ଼ାଇବା ପାଇଁ କରାଯାଉଥିବା ପ୍ରୟାସକୁ ସ୍ୱାଗତ କରିଥିଲେ। ଏହା ବ୍ୟତୀତ ନେତୃତ୍ୱଙ୍କ ଦୂରଦୃଷ୍ଟି ଅନୁରୂପ ଭାରତ ଓ କାନାଡ଼ା ମଧ୍ୟରେ ଥିବା ଦୃଢ଼ ପ୍ରତିରକ୍ଷା ସମ୍ପର୍କକୁ ଆହୁରି ସୁଦୃଢ଼ କରିବାର ସମ୍ଭାବନା ଉପରେ ମଧ୍ୟ ଆଲୋଚନା କରାଯାଇଥିଲା।
ଗତ ଏକ ବର୍ଷ ଧରି ଚାଲିଥିବା ନିରନ୍ତର ଦ୍ୱିପାକ୍ଷିକ ଆଲୋଚନା ନେଇ ଉଭୟ ପକ୍ଷ ସନ୍ତୋଷ ବ୍ୟକ୍ତ କରିଛନ୍ତି।
ମାର୍ଚ୍ଚ ମାସରେ ନୂଆଦିଲ୍ଲୀ ଏବଂ ଜୁନ୍ ମାସରେ G7 ସମ୍ମିଳନୀ ସମୟରେ ଉଭୟ ଦେଶର ପ୍ରଧାନମନ୍ତ୍ରୀଙ୍କ ମଧ୍ୟରେ ହୋଇଥିବା ଆଲୋଚନା ଦ୍ୱାରା ମିଳିଥିବା ମାର୍ଗଦର୍ଶନ ବିଷୟରେ ମଧ୍ୟ ଉଲ୍ଲେଖ କରାଯାଇଥିଲା। ଏହି ବୈଠକରେ ଆଞ୍ଚଳିକ ଓ ବିଶ୍ୱସ୍ତରୀୟ ଘଟଣାବଳୀ ସମ୍ପର୍କରେ ମଧ୍ୟ ମତାମତ ଆଦାନପ୍ରଦାନ କରାଯାଇଥିଲା।