ରିୟାଦ: ସାଉଦି ଆରବ ୱାର୍କ ଭିସାରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରିଛି । ଦେଶର ମାନବ ସମ୍ବଳ ଏବଂ ସାମାଜିକ ବିକାଶ ମନ୍ତ୍ରଣାଳୟର କ୍ୱିୱା ପ୍ଲାଟଫର୍ମ ପ୍ରକାଶ କରିଛି ଯେ, ସାଉଦି ଆରବ ଓ୍ବାର୍କ ପରମିଟରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରିଛି । ନୂଆ କରି ଆରମ୍ଭ ହୋଇଥିବା କମ୍ପାନୀଗୁଡ଼ିକ ପାଇଁ ତୁରନ୍ତ ଉପଲବ୍ଧ ସର୍ବାଧିକ ଓ୍ବାର୍କ ଭିସା ସଂଖ୍ୟାକୁ ୫କୁ ହ୍ରାସ କରିଛି । ନିଯୁକ୍ତି ପ୍ରକ୍ରିୟାକୁ ସୁଗମ କରିବା ଏବଂ ଶ୍ରମ ବଜାର ନିୟମାବଳୀ ସହିତ ଅନୁପାଳନ ସୁନିଶ୍ଚିତ କରିବା ପାଇଁ ଏହି ପଦକ୍ଷେପ ନିଆଯାଇଛି ।
କ୍ୱିୱା କହିଛି ଯେ, ଦୁଇ ବର୍ଷରୁ କମ୍ ସମୟ ଧରି କାର୍ଯ୍ୟ କରୁଥିବା କମ୍ପାନୀଗୁଡ଼ିକ ସର୍ବାଧିକ ୫ଟି ତତ୍କାଳ ଭିସା ପାଇଁ ଯୋଗ୍ୟ ହେବେ । ଦୁଇ ବର୍ଷରୁ ଅଧିକ ପୁରୁଣା କମ୍ପାନୀଗୁଡ଼ିକ ପାଇଁ, ସୀମା ୫୦ ଭିସା ପର୍ଯ୍ୟନ୍ତ ହୋଇପାରେ, ସେମାନେ ଏକାଥରେ କିମ୍ବା ଗୋଟିଏ ସପ୍ତାହକ ମଧ୍ୟରେ ଅନେକ ଥର ଆବେଦନ କରିପାରିବେ ।
ସେ ଆହୁରି କହିଛନ୍ତି ଯେ, ‘ଏଷ୍ଟାବ୍ଲିସମେଣ୍ଟ ପ୍ରୋଗ୍ରାମ’ ରେ ଅଂଶଗ୍ରହଣ କରୁଥିବା ଏବଂ ଆବଶ୍ୟକୀୟ ମାନଦଣ୍ଡ ପୂରଣ କରୁଥିବା କମ୍ପାନୀଗୁଡ଼ିକୁ ପ୍ରାରମ୍ଭରେ କେବଳ ଦୁଇଟି ଭିସା ମିଳିବ । ଯଦି ସାଉଦିକରଣ ହାର ବୃଦ୍ଧି କରାଯାଏ ତେବେ ସେମାନେ ଅଧିକ ଭିସା ପାଇପାରିବେ ।
କିୱା ବିଦେଶରୁ ଅଣ-ସାଉଦି କର୍ମଚାରୀଙ୍କୁ ନିଯୁକ୍ତି ଦେବା ପାଇଁ ୧୦ ଟି ଆବଶ୍ୟକତା ମଧ୍ୟ ଉଲ୍ଲେଖ କରିଛି । ଏହି ଆବଶ୍ୟକତାଗୁଡ଼ିକ ମଧ୍ୟରେ ବ୍ୟବସାୟର ଏକ ସକ୍ରିୟ ସ୍ଥିତି ରହିବା ଆବଶ୍ୟକ ଏବଂ କର୍ମଚାରୀମାନଙ୍କର ଏକ ବୈଧ କାର୍ଯ୍ୟ ଅନୁମତି ଏବଂ ଏକ ବୈଧ ବାଣିଜ୍ୟିକ ପଞ୍ଜୀକରଣ ରହିବା ଆବଶ୍ୟକ । ଏହା ବ୍ୟତୀତ, ସେମାନଙ୍କୁ ମଡିୟମ୍ ଗ୍ରୀନ୍ ବର୍ଗ କିମ୍ବା ତା’ଠାରୁ ଅଧିକ ବର୍ଗରେ ରହି ସାଉଦିକରଣ ଆବଶ୍ୟକତା ପୂରଣ କରିବାକୁ ପଡିବ । ସେମାନଙ୍କୁ ମଜୁରୀ ସୁରକ୍ଷା ବ୍ୟବସ୍ଥାର ମଧ୍ୟ ପାଳନ କରିବାକୁ ପଡିବ ।
କୁହାଯାଉଛି ଯେ, ଏହି ନୂତନ ବ୍ୟବସ୍ଥା ଭାରତୀୟ କମ୍ପାନି ଏବଂ ଭାରତୀୟ କର୍ମଚାରୀଙ୍କୁ ପ୍ରଭାବିତ କରିପାରେ । ସାଉଦି ଆରବରେ ବିଦେଶୀ କର୍ମଚାରୀଙ୍କ ଏକ ଗୁରୁତ୍ୱପୂର୍ଣ୍ଣ ଅଂଶ ହେଉଛନ୍ତି ଭାରତୀୟ ।
ବର୍ତ୍ତମାନ, ନୂତନ କମ୍ପାନିଗୁଡ଼ିକୁ ତୁରନ୍ତ ପ୍ରଦାନ କରାଯାଇପାରୁଥିବା ଭିସା ସଂଖ୍ୟାକୁ ସୀମିତ କରିବା ଦ୍ୱାରା ନୂତନ କମ୍ପାନି କିମ୍ବା ଷ୍ଟାର୍ଟଅପ୍ରେ ଯୋଗଦେବାକୁ ଚାହୁଁଥିବା ବୃତ୍ତିଗତମାନଙ୍କ ନିଯୁକ୍ତି ପ୍ରକ୍ରିୟା ମନ୍ଥର ହୋଇଯିବ । ଏହା ବ୍ୟତୀତ, ବୃତ୍ତିଗତମାନେ ଏବେ ଏହି ନୂତନ କମ୍ପାନିଗୁଡ଼ିକ ଅପେକ୍ଷା ପ୍ରତିଷ୍ଠିତ କମ୍ପାନିଗୁଡ଼ିକ କିମ୍ବା ଦୁଇ ବର୍ଷରୁ ଅଧିକ ଅଭିଜ୍ଞତା ଥିବା କମ୍ପାନିଗୁଡ଼ିକ ସହିତ କାମ କରିବାକୁ ପ୍ରାଥମିକତା ଦେବେ । ପୁରୁଣା କମ୍ପାନିଗୁଡ଼ିକର ଭିସା କୋଟା ଅଧିକ ଥିବାରୁ ସେମାନେ ୫୦ଟି ପର୍ଯ୍ୟନ୍ତ ଭିସା ପାଇଁ ଆବେଦନ କରିପାରିବେ ।