ନୂଆଦିଲ୍ଲୀ: ଚାରି ଦଶନ୍ଧି ଧରି ଭାରତୀୟ ସଙ୍ଗୀତ ଏବଂ ପ୍ଲେବ୍ୟାକ୍ ସିଙ୍ଗର୍ ଜଗତରେ ସର୍ବୋଚ୍ଚ ରାଜତ୍ୱ କରିଥିବା ପ୍ରବୀଣ ଗାୟିକା ଅଲକା ୟାଗ୍ନିକଙ୍କୁ ଦେଶର ପ୍ରତିଷ୍ଠିତ ନାଗରିକ ସମ୍ମାନ ପଦ୍ମ ଭୂଷଣରେ ସମ୍ମାନିତ କରାଯାଇଛି। ଅଲକା ୟାଗ୍ନିକ (Alka Yagnik) ବଲିଉଡର ଜଣେ ସୁପ୍ରସିଦ୍ଧ ଓ ପ୍ରତିଭାବାନ ପ୍ରଚ୍ଛଦପଟ୍ଟ ଗାୟିକା। ରାଷ୍ଟ୍ରପତି ଭବନରେ ଅନୁଷ୍ଠିତ ଦ୍ୱିତୀୟ ନାଗରିକ ପୁରସ୍କାର ସମାରୋହରେ, ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁ ତାଙ୍କୁ ଭାରତୀୟ ସିନେମା ଏବଂ ସଙ୍ଗୀତ ପ୍ରତି ତାଙ୍କର ଅମୂଲ୍ୟ ଅବଦାନ ପାଇଁ ଏହି ପ୍ରତିଷ୍ଠିତ ପୁରସ୍କାର ପ୍ରଦାନ କରିଛନ୍ତି। ଏହା ୬୫ତମ ପଦ୍ମ ପୁରସ୍କାର ସମାରୋହ ଥିଲା, ଯେଉଁଠାରେ କଳା, ସଂସ୍କୃତି ଏବଂ ଅନ୍ୟାନ୍ୟ କ୍ଷେତ୍ରର ଅନେକ ପ୍ରସିଦ୍ଧ ବ୍ୟକ୍ତିତ୍ୱଙ୍କୁ ସମ୍ମାନିତ କରାଯାଇଥିଲା। ଏହି ବିଶେଷ ଏବଂ ଐତିହାସିକ ଅବସରରେ, ପ୍ରସିଦ୍ଧ ଗାୟିକା ଅଲକା ୟାଗ୍ନିକଙ୍କ ସରଳତା କେବଳ ହୃଦୟ ଜିତି ନଥିଲା, ବରଂ ତାଙ୍କ ସ୍ୱାସ୍ଥ୍ୟ ଅବସ୍ଥା ମଧ୍ୟ ସମସ୍ତ ଦୃଷ୍ଟି ଆକର୍ଷଣ କରିଥିଲା।
ଅଲକା ୟାଗ୍ନିକଙ୍କୁ ପାରମ୍ପରିକ ଏମ୍ବ୍ରୋଡେରୀ ଡିଜାଇନ୍ ସହିତ ଏକ ସୁନ୍ଦର ପ୍ରିଣ୍ଟେଡ୍ କୁର୍ତ୍ତାରେ ଦେଖିବାକୁ ମିଳିଥିଲା। ଗାୟିକା ମଞ୍ଚ ଉପରେ ପାଦ ଦେବା ସମୟରେ, ଜଣେ ମହିଳା କର୍ମଚାରୀ ତାଙ୍କୁ ସମର୍ଥନ କରୁଥିବା ଦେଖାଯାଇଥିଲା। ମହିଳା କର୍ମଚାରୀଙ୍କ ସହଯୋଗରେ, ସେ ରାଷ୍ଟ୍ରପତିଙ୍କ ପାଖକୁ ଯାଇ ସମ୍ମାନ ଗ୍ରହଣ କଲେ। ଏହି ମୁହୂର୍ତ୍ତ ତାଙ୍କ ପ୍ରଶଂସକମାନଙ୍କୁ ଭାବପ୍ରବଣ କରିଦେଲା। କିନ୍ତୁ ସେ ଅନ୍ୟଜଣଙ୍କର ସମର୍ଥନରେ କାହିଁକି ଷ୍ଟେଜ୍ ଉପରକୁ ଯାଇଥିଲେ ସେ କଥା ଭାବି ସମସ୍ତେ ଚକିତ ହୋଇପଡିଥିଲେ।
ବଲିଉଡ୍ ଜଗତର ପ୍ରସିଦ୍ଧ ଗାୟିକା ଅଲକା ୟାଗନିକ, ତାଙ୍କୁ କିଏ ବା ନଜାଣେ। ସଙ୍ଗୀତ ଜଗତକୁ ତାଙ୍କର ଅବଦାନ ଅନେକ। କିନ୍ତୁ ୨ ବର୍ଷ ହେବ ସେ ଏକ ବିରଳ ରୋଗରେ ପିଡୀତ ଅଛନ୍ତି। ଯାହା ତାଙ୍କ ସଙ୍ଗୀତ ଗାଇବା ଉପରେ ଗଭୀର ପ୍ରଭାବ ପକାଇଛି। ଅଲକା ୟାଗ୍ନିକ୍ ପ୍ରଥମେ ୨୦୨୪ ମସିହାରେ ଏକ ବିସ୍ତୃତ ଇନଷ୍ଟାଗ୍ରାମ୍ ପୋଷ୍ଟ ମାଧ୍ୟମରେ ତାଙ୍କ ଅବସ୍ଥା ବିଷୟରେ ପ୍ରକାଶ କରିଥିଲେ, ଯେଉଁଥିରେ ସେ ଏକ ଭାଇରାଲ୍ ସଂକ୍ରମଣ ଯୋଗୁଁ ଏକ ବିରଳ ‘ସେନ୍ସୋରିନ୍ୟୁରାଲ୍ ହିଅରିଂ ଲସ୍’, ଶ୍ରବଣ କ୍ଷମତାରେ ହ୍ରାସ ସହିତ ସଂଘର୍ଷ କରୁଥିବା ପ୍ରକାଶ କରିଥିଲେ। ଏହାକୁ ଏକ ଅଚାନକ ବଡ଼ ଆଘାତ ଭାବରେ ବର୍ଣ୍ଣନା କରି, ସେ ତାଙ୍କ ପ୍ରଶଂସକମାନଙ୍କୁ ତାଙ୍କ ସୁସ୍ଥତା ପାଇଁ କାମନା କରିବାକୁ ଅନୁରୋଧ କରିଥିଲେ।
୨୦୨୪ ମସିହାରେ ପ୍ରବୀଣ ପ୍ଲେବ୍ୟାକ୍ ଗାୟିକା ଅଲକା ୟାଗନିକ ପ୍ରକାଶ କରିଥିଲେ ଯେ ସେ ଏକ ବିରଳ କାନ ରୋଗ ସହ ସଂଘର୍ଷ କରୁଛନ୍ତି। ସେ ଏବେ ବି ଏହି ରୋଗ ସହିତ ସଂଘର୍ଷ କରୁଛନ୍ତି। ଏହି ରୋଗ ଜଣାପଡିବା ପରଠାରୁ, ଅଲକା ପ୍ରାୟତଃ ସାଧାରଣ ଲୋକଙ୍କ ଦୃଷ୍ଟିରୁ ଦୂରରେ ରହିଛନ୍ତି; କିନ୍ତୁ, ସେ ଏହି ‘ପଦ୍ମ ଭୂଷଣ’ରେ ସମ୍ମାନିତ ହେବା ପରେ ଶିରୋନାମାରେ ସ୍ଥାନ ପାଇଛନ୍ତି। ତାଙ୍କର ଅସୁସ୍ଥତା ଏବଂ ସୁସ୍ଥତା ଯୋଗୁଁ, ସଂଗୀତ ରଚୟିତାଙ୍କଠାରୁ ଗୁରୁତ୍ୱପୂର୍ଣ୍ଣ ପ୍ରସ୍ତାବ ପାଇବା ସତ୍ତ୍ୱେ, ସେ ବର୍ତ୍ତମାନ କୌଣସି ନୂତନ ଗୀତ ଗାଇବା ପ୍ରକଳ୍ପ କିମ୍ବା ରେକର୍ଡିଂରେ ଅଂଶଗ୍ରହଣ କରିପାରୁ ନାହାଁନ୍ତି। ସେ କେବଳ ତାଙ୍କ ସ୍ୱାସ୍ଥ୍ୟ ଉପରେ ଧ୍ୟାନ ଦେଉଛନ୍ତି।
ଅଲକା ୨୦୨୪ ମସିହାରେ ଏହି ବିରଳ ଶ୍ରବଣ ରୋଗରେ ପୀଡିତ ବୋଲି ଘୋଷଣା କରିବା ପରେ ଲାଇମଲାଇଟରୁ ଦୂରେଇ ରହିଛନ୍ତି। ଯଦିଓ ତାଙ୍କ ସ୍ୱାସ୍ଥ୍ୟାବସ୍ଥା ବିଷୟରେ ଏକ ବର୍ଷରୁ ଅଧିକ ସମୟ ଧରି କୌଣସି ସୂଚନା ମିଳିନଥିଲା, କିନ୍ତୁ ଆଜିର ସମାରୋହରେ ତାଙ୍କ ଉପସ୍ଥିତି ଅନେକ ପ୍ରଶଂସକଙ୍କୁ ଚିନ୍ତିତ କରିଛି। ଏହା ତାଙ୍କ ଶ୍ରବଣ ରୋଗ ଯୋଗୁଁ ନା ସେ ଅନ୍ୟ କୌଣସି ରୋଗରେ ପୀଡିତ ଅଛନ୍ତି ତାହା ଏପର୍ଯ୍ୟନ୍ତ ଜଣାପଡ଼ିନାହିଁ।
ଅଳକା ୟାଗ୍ନିକ ୧୯୯୦ ରୁ ୨୦୦୦ ମସିହା ଦଶକରେ ବଲିଉଡର ସବୁଠାରୁ ପ୍ରିୟ ଏବଂ ଯାଦୁକରୀ କଣ୍ଠସ୍ୱର ମଧ୍ୟରୁ ଜଣେ ଥିଲେ। ସେ “ଖଲନାୟକ,” “ଦିଲୱାଲେ ଦୁଲହନିଆ ଲେ ଜାଏଙ୍ଗେ,” “କୁଛ କୁଛ ହୋତା ହୈ,” ଏବଂ “ତାଲ” ଭଳି ଅଗଣିତ ବ୍ଲକବଷ୍ଟର ଏବଂ କ୍ଲାସିକ୍ ଫିଲ୍ମରେ ତାଙ୍କର ସ୍ମରଣୀୟ କଣ୍ଠସ୍ୱର ସହିତ ହୃଦୟ ଜିତିଥିଲେ। ଏହି ଗାୟିକା ୧,୦୦୦ ରୁ ଅଧିକ ଗୀତ ଗାଇଛନ୍ତି।