ସମୁଦ୍ରରେ ବଡ଼ ଅଘଟଣ: ମିସାଇଲ୍ ମାଡ଼ର ଶିକାର ହେଲା ଏଲପିଜି ଟ୍ୟାଙ୍କର ‘ଦିଶା’, ଭିତରେ ୨୮ ଭାରତୀୟ ନାବିକ

ନୂଆଦିଲ୍ଲୀ/ତେହେରାନ: ଆମେରିକା ଓ ଇରାନ ମଧ୍ୟରେ ଲାଗି ରହିଥିବା ଯୁଦ୍ଧ ଏବଂ ଉତ୍ତେଜନା ଭିତରେ ସମୁଦ୍ର ପଥରୁ ଏକ ହୃଦୟବିଦାରକ ଖବର ସାମ୍ନାକୁ ଆସିଛି। ଶୁକ୍ରବାର ଦିନ ଇରାନର ଜଳସୀମା ମଧ୍ୟରେ ଏକ ବାଣିଜ୍ୟିକ ଏଲପିଜି ଟ୍ୟାଙ୍କର ଉପରେ ହମଲା ହୋଇଛି, ଯେଉଁଥିରେ ୨୮ ଜଣ ଭାରତୀୟ ନାବିକ (କ୍ରୁ ମେମ୍ବର) ସବାର ଥିଲେ। ତେବେ ଏକ ବଡ଼ ଧରଣର ବିପଦ ଟଳିଯାଇଛି ଏବଂ ଆଶ୍ୱସ୍ତିର ବିଷୟ ହେଉଛି ଯେ ଏହି ଆକ୍ରମଣ ସତ୍ତ୍ୱେ ଜାହାଜରେ ଥିବା ସମସ୍ତ ଭାରତୀୟ ସମ୍ପୂର୍ଣ୍ଣ ସୁରକ୍ଷିତ ଅଛନ୍ତି। ତେହେରାନରେ ଥିବା ଭାରତୀୟ ଦୂତାବାସ ପକ୍ଷରୁ ଏହି ଘଟଣାର ପୁଷ୍ଟି କରାଯିବା ସହ ନାବିକମାନଙ୍କ ସୁରକ୍ଷା ନେଇ ସ୍ପଷ୍ଟ ସୂଚନା ଦିଆଯାଇଛି।

ପ୍ରାପ୍ତ ରିପୋର୍ଟ ଅନୁଯାୟୀ, ଆକ୍ରମଣର ଶିକାର ହୋଇଥିବା ଜାହାଜଟି ହେଉଛି ମୋଜାମ୍ବିକ୍ ଦେଶର ପତାକା ବହନ କରୁଥିବା ଏଲପିଜି ଟ୍ୟାଙ୍କର ‘ଦିଶା’। ‘ଫରୱାର୍ଡ ସିମେନ୍ସ ୟୁନିଅନ୍ ଅଫ୍ ଇଣ୍ଡିଆ’ର ସୂଚନା ମୁତାବକ, ଏହି ଟ୍ୟାଙ୍କରଟି ପାରସ୍ୟ ଉପସାଗର ଅଭିମୁଖେ ଯାତ୍ରା କରୁଥିବା ସମୟରେ ରଣନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ହର୍ମୁଜ୍ ପ୍ରଣାଳୀ ନିକଟରେ ଏକ ଅଜ୍ଞାତ ମିସାଇଲ୍ ମାଡ଼ର ସମ୍ମୁଖୀନ ହୋଇଥିଲା। ଏହି ଘଟଣା ପରେ ମଧ୍ୟପ୍ରାଚ୍ୟର ପ୍ରମୁଖ ସାମୁଦ୍ରିକ ପଥରେ ବାଣିଜ୍ୟିକ ଜାହାଜ ଚଳାଚଳର ନିରାପତ୍ତାକୁ ନେଇ ପୁଣି ଥରେ ଆତଙ୍କ ଖେଳିଯାଇଛି।

ଆକ୍ରମଣ ପରେ ଭାରତୀୟ ଦୂତାବାସ ତୁରନ୍ତ ଆକ୍ସନ ମୋଡକୁ ଆସିଥିଲା। ଦୂତାବାସ ପକ୍ଷରୁ ସୋସିଆଲ୍ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ସରକାରୀ ବିବୃତ୍ତି ଜାରି କରି କୁହାଯାଇଛି ଯେ, “ଆଜି ଇରାନ ଜଳସୀମାରେ ଏଲପିଜି ଟ୍ୟାଙ୍କର ‘ଦିଶା’ (IMO ନମ୍ବର- 8818219) ଉପରେ ଆକ୍ରମଣ ହୋଇଥିବା ଘଟଣା ଆମର ହସ୍ତଗତ ହୋଇଛି। ଏହି ଜାହାଜରେ ୨୮ ଜଣ ଭାରତୀୟ କ୍ରୁ ମେମ୍ବର ଅଛନ୍ତି। ଦୂତାବାସ ଇରାନର ସ୍ଥାନୀୟ କର୍ତ୍ତୃପକ୍ଷ ଏବଂ ଜାହାଜ ପରିଚାଳନା କମିଟି ସହ ନିରନ୍ତର ଯୋଗାଯୋଗରେ ଅଛି। ସମସ୍ତ ଭାରତୀୟ ନାଗରିକ ସୁରକ୍ଷିତ ଥିବା ଆମେ ନିଶ୍ଚିତ କରୁଛୁ।” ସ୍ଥିତି ଉପରେ ଭାରତ ସରକାର ତୀକ୍ଷ୍ଣ ନଜର ରଖିଛନ୍ତି ବୋଲି ଅଧିକାରୀମାନେ ପ୍ରକାଶ କରିଛନ୍ତି।

ସୂଚନାଯୋଗ୍ୟ, ମଧ୍ୟପ୍ରାଚ୍ୟରେ ଆମେରିକା ଏବଂ ଇରାନ ମଧ୍ୟରେ ହୋଇଥିବା ଅସ୍ତ୍ରବିରତି ଚୁକ୍ତି ନିକଟରେ ଭାଙ୍ଗିଯିବା ଫଳରେ ସେହି ଅଞ୍ଚଳରେ ପୁଣି ଥରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଛି। ଏହି ଆକ୍ରମଣର ଠିକ୍ କିଛି ଦିନ ପୂର୍ବରୁ ଭାରତର ବୈଦେଶିକ ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ଦୃଢ଼ ସ୍ୱରରେ ଚେତାବନୀ ଦେଇଥିଲେ ଯେ କୌଣସି ପରିସ୍ଥିତିରେ ବି ନିରୀହ ନାବିକ ବା ବାଣିଜ୍ୟିକ ଜାହାଜ ଉପରେ ଆକ୍ରମଣକୁ ଆଦୌ ଗ୍ରହଣ କରାଯାଇପାରିବ ନାହିଁ। ଆନ୍ତର୍ଜାତୀୟ ଆଇନ ଅନୁଯାୟୀ ସାମୁଦ୍ରିକ ଜଳପଥ ସମସ୍ତଙ୍କ ପାଇଁ ସୁରକ୍ଷିତ ଓ ବାଧାମୁକ୍ତ ରହିବା ଉଚିତ୍ ବୋଲି ଭାରତ ଦାବି କରିଆସୁଥିବା ବେଳେ ଏହି ଘଟଣା ସାରା ବିଶ୍ୱର ଚିନ୍ତା ବଢ଼ାଇଦେଇଛି।