ଏଣିକି ଆଉ ଲାଗୁ ହେବନି ଟୋଲ ଟ୍ୟାକ୍ସ ଆଦାୟ କରିବାର ପୁରୁଣା ଫର୍ମୁଲା, ଏହି ନିୟମ ଅନୁସାରେ ହେବ ଆଦାୟ…
ନୂଆଦିଲ୍ଲୀ: ସରକାର ଟୋଲ ଟ୍ୟାକ୍ସ ଆଦାୟ କରିବାର ପୁରୁଣା ଫର୍ମୁଲାକୁ ସମ୍ପୂର୍ଣ୍ଣ ରୂପେ ବଦଳାଇ ନୂତନ ନିୟମ ଲାଗୁ କରିଛନ୍ତି । ଏଣିକି ଜାତୀୟ ରାଜପଥ (ନ୍ୟାଶନାଲ ହାଇୱେ)ରେ ଗାଡ଼ି ଚଲାଉଥିବା ଲୋକଙ୍କଠାରୁ ଆଉ ମନଇଚ୍ଛା ଟୋଲ ଆଦାୟ କରିବା ସମ୍ଭବ ହେବ ନାହିଁ । ଦେଶବାସୀଙ୍କୁ ଟୋଲ ଟ୍ୟାକ୍ସ ବୋଝରୁ ହାଲୁକା କରାଇବାକୁ ସରକାର ଏହି ନିଷ୍ପତ୍ତି ନେଇଛନ୍ତି ।
ସୂଚନାଯୋଗ୍ୟ ଯେ, ପୁରୁଣା ନିୟମ ଅନୁଯାୟୀ ଯଦି ଆପଣ ହାଇୱେରେ ମାତ୍ର ୧୦ କିମ୍ବା ୧୫ କିଲୋମିଟର ଯାତ୍ରା ମଧ୍ୟ କରୁଥିଲେ, ତଥାପି ଆପଣଙ୍କୁ ସମ୍ପୂର୍ଣ୍ଣ ୬୦ କିଲୋମିଟର ଟୋଲ ପ୍ଲାଜାର ନିର୍ଦ୍ଦିଷ୍ଟ ଚାର୍ଜ ପଇଠ କରିବାକୁ ପଡ଼ୁଥିଲା । ନୂତନ ନିୟମରେ ଏହି ସିଷ୍ଟମକୁ ସମ୍ପୂର୍ଣ୍ଣ ଶେଷ କରିଦିଆଯାଇଛି ।
ବର୍ତ୍ତମାନ ଆପଣ ହାଇୱେରେ ଯେତିକି କିଲୋମିଟର ଗାଡ଼ି ଚଳାଇବେ, କେବଳ ସେତିକି ଦୂରତା ପାଇଁ ହିଁ ଟ୍ୟାକ୍ସ ଦେବାକୁ ପଡ଼ିବ । ବର୍ତ୍ତମାନ ଟୋଲ ପ୍ଲାଜାରେ ଲାଗୁଥିବା ଲମ୍ବା ଜାମ ମଧ୍ୟ ସମ୍ପୂର୍ଣ୍ଣ ଶେଷ ହେବାକୁ ଯାଉଛି । ସାଟେଲାଇଟ ଆଧାରିତ ଜିପିଏସ (GPS) ଟୋଲ କଲେକ୍ସନ ସିଷ୍ଟମ ଲାଗୁ ହେବା କାରଣରୁ ଆପଣଙ୍କ ଆକାଉଣ୍ଟରୁ କେବଳ ସ୍ଥିର କରାଯାଇଥିବା ସଠିକ୍ ଦୂରତାର ଟଙ୍କା ହିଁ କଟିବ । ଏହା ଦ୍ବାରା ଅଳ୍ପ ଦୂରତା ପାଇଁ ଯାତ୍ରା କରୁଥିବା ଲୋକ ହିଁ ଉପକୃତ ହେବେ ।