ଭୁବନେଶ୍ୱର: ଦୁବାଇର ପ୍ରସିଦ୍ଧ ଓଡ଼ିଆ ସ୍କୁବା ଡାଇଭର ଏବଂ ବରିଷ୍ଠ କର୍ପୋରେଟ୍ ନେତା ପ୍ରିୟଦର୍ଶୀ ପାଣିଗ୍ରାହୀ ତାଙ୍କର ଐତିହାସିକ ୧୦୦ତମ ସ୍କୁବା ଡାଇଭିଂ ସମାପ୍ତ କରିଛନ୍ତି। ଯାହା ଓଡ଼ିଶାର ସବୁଠାରୁ ସଫଳ ମନୋରଞ୍ଜନକାରୀ ଡାଇଭରମାନଙ୍କ ମଧ୍ୟରୁ ଜଣେ ଭାବରେ ତାଙ୍କର ସ୍ଥିତିକୁ ଆହୁରି ସୁଦୃଢ଼ କରିଛି। ସେ ଗଭୀର ସମୁଦ୍ରରେ ନିଜର ୧୦୦ତମ ଡାଇଭିଂ ସଂପୂର୍ଣ୍ଣ କରିଛନ୍ତି। ମାଳଦ୍ବୀପରେ ବହୁ ସଂଖ୍ୟକ ଟାଇଗର୍ ସାର୍କଙ୍କ ଉପସ୍ଥିତିରେ ପ୍ରିୟଦର୍ଶୀଙ୍କ ଏହି ଡାଇଭିଂ ବେଶ୍ ରୋମାଞ୍ଚଭରା ଥିଲା। ୧୦୦ତମ ଡାଇଭ୍ ସହ ପ୍ରିୟଦର୍ଶୀଙ୍କ ସୌଖୀନ ଡାଇଭର୍ କ୍ୟାରିୟର୍ରେ ଆଉ ଏକ ମାଇଲ୍ଖୁଣ୍ଟ ଯୋଡ଼ିହୋଇଛି।
ମାଳଦ୍ବୀପର ଫୁଭାମୁଲା ଦ୍ବୀପ ନିକଟ ଗଭୀର ସମୁଦ୍ରରେ ପ୍ରିୟଦର୍ଶୀ ଏହି ଡାଇଭିଂ କରିଥିବାବେଳେ ତାଙ୍କ ସହ ଝିଅ ତିସ୍ୟା ପାଣିଗ୍ରାହୀ ସାଥୀ ଡାଇଭର୍ ଥିଲେ। ଭୂମଧ୍ୟରେଖାର ଠିକ୍ ତଳେ ଅବସ୍ଥିତ ଫୁଭାମୁଲାକୁ ବିଶ୍ବର ‘ଟାଇଗର୍ ସାର୍କ ରାଜଧାନୀ’ କୁହାଯାଏ। ପାଣିକୁ ଓହ୍ଲାଇବା ପରେ ଉଭୟ ବାପ-ଝିଅ ବିଭିନ୍ନ ଆକାରର ଟାଇଗର୍ ସାର୍କଙ୍କ ମଧ୍ୟରେ ଘେରି ହୋଇ ଯାଇଥିଲେ। ଫୁଭାମୁଲା ଦ୍ୱୀପ ବିଷୁବ ରେଖା ତଳେ ଅବସ୍ଥିତ ଏବଂ ଆନ୍ତର୍ଜାତୀୟ ସ୍ତରରେ ବିଶ୍ୱର ଟାଇଗର ସାର୍କ ରାଜଧାନୀ ଭାବରେ ସ୍ୱୀକୃତିପ୍ରାପ୍ତ।
ଉଭୟଙ୍କର ଅତି ନିକଟରୁ ଖୁବ୍ ବଡ଼ବଡ଼ ସାର୍କ ଅତିକ୍ରମ କରିବା ସେମାନଙ୍କୁ ବେଶ୍ ରୋମାଞ୍ଚିତ କରିଥିଲା ବୋଲି ପ୍ରିୟଦର୍ଶୀ କହିଛନ୍ତି। କିଛି ସାର୍କଙ୍କ ଲମ୍ବ ପ୍ରାୟ ୧୫ ଫୁଟ୍ ଏବଂ ଓଜନ ୫ କ୍ବିଣ୍ଟାଲ ପର୍ଯ୍ୟନ୍ତ ଥିଲା। ୨୦୧୨ରୁ ସ୍କୁବା ଡାଇଭିଂ ଆରମ୍ଭ କରି ୧୪ ବର୍ଷ ମଧ୍ୟରେ ୧୦୦ ଡାଇଭ୍ ଶେଷ କରିଛନ୍ତି। ପ୍ରିୟଦର୍ଶୀଙ୍କ ଅନୁସାରେ ସମୁଦ୍ରତଳ ତାଙ୍କୁ ଜୀବନରେ ଅନେକ କିଛି ଶିକ୍ଷା ଦେଇଛି। ରାଜ୍ୟର କନିଷ୍ଠତମ ସ୍କୁବା ଡାଇଭର୍ ଭାବେ କୃତିତ୍ବ ଅର୍ଜନ କରିଥିବା ଝିଅ ତିସ୍ୟାଙ୍କ ଉପସ୍ଥିତି ଏହି ଡାଇଭ୍କୁ ଅଧିକ ସ୍ମରଣୀୟ କରିଛି ବୋଲି ସେ କହିଛନ୍ତି।
ପ୍ରିୟଦର୍ଶୀ ପୂର୍ବତନ ମନ୍ତ୍ରୀ ତଥା ସାଂସଦ ସ୍ୱର୍ଗତ ଶ୍ରୀବଲ୍ଲଭ ପାଣିଗ୍ରାହୀ ଏବଂ ଶିକ୍ଷାବିତ୍ ସୁନନ୍ଦା ପାଣିଗ୍ରାହୀଙ୍କ ପୁଅ। ଭୁବନେଶ୍ୱରରେ ଜନ୍ମଗ୍ରହଣ ଏବଂ ସମ୍ବଲପୁର ଓ ଦିଲ୍ଲୀରେ ସେ ବଡ଼ ହୋଇଛନ୍ତି। ପ୍ରିୟଦର୍ଶୀ ୨୦୧୨ ମସିହାରେ ତାଙ୍କର ସ୍କୁବା ଡାଇଭିଂ ଯାତ୍ରା ଆରମ୍ଭ କରିଥିଲେ, ମାତ୍ର ୧୬ ମାସ ପୂର୍ବରୁ ୨୦୨୫ ମାର୍ଚ୍ଚରେ ତାଙ୍କର ୭୫ତମ ଡାଇଭିଂ ସମାପ୍ତ କରିଥିଲେ।
ସେହିପରି ତିସ୍ୟା ୨୦୨୦ ମସିହାରେ ୧୦ ବର୍ଷ ବୟସରେ ଓଡ଼ିଶାର ସର୍ବକନିଷ୍ଠ ସ୍କୁବା ଡାଇଭର ହୋଇଥିଲେ। ୨୦୨୨ ମସିହାରେ ୧୨ ବର୍ଷ ବୟସରେ ଓଡ଼ିଶାର ସର୍ବକନିଷ୍ଠ ଆଡଭାନ୍ସଡ୍ ଓପନ୍ ୱାଟର ଡାଇଭର ହୋଇଥିଲେ। ୮ ଜୁନ୍ ୨୦୨୫ ମସିହାରେ, ତାଙ୍କ ୧୫ତମ ଜନ୍ମଦିନରେ, ତିସ୍ୟା ୧୦୦ ଫୁଟ ଉଚ୍ଚତାରେ ଡାଇଭିଙ୍ଗ୍ କରିଥିଲେ ଏବଂ ଏହି ଗଭୀରତାରେ ପହଞ୍ଚିବା ପାଇଁ ସେ ସବୁଠାରୁ କନିଷ୍ଠ ଓଡ଼ିଆ ଝିଅ।