ନଦୀ ସଫା କରି ରାତାରାତି ହିରୋ ପାଲଟିଲେ ଯୁବକ: ଭିଡିଓ ଦେଖି ଚାକିରି ଯାଚିଲେ ଡଚ୍ କମ୍ପାନୀର ସିଇଓ
ନୂଆଦିଲ୍ଲୀ: ସ୍ୱଚ୍ଛତା, ପରିବେଶ ସୁରକ୍ଷା ଏବଂ ନିଜ ଆଖପାଖ ଅଞ୍ଚଳକୁ ସଫା ରଖିବା ପାଇଁ ଜଣେ ସାଧାରଣ ବ୍ୟକ୍ତିଙ୍କ ନିଷ୍ଠାପର ଉଦ୍ୟମ କିପରି ତାଙ୍କୁ ଆନ୍ତର୍ଜାତିକ ସ୍ତରରେ ପରିଚିତ କରାଇପାରେ, ତାହାର ଏକ ଜ୍ୱଳନ୍ତ ଉଦାହରଣ ଏବେ ସାମ୍ନାକୁ ଆସିଛି । ଏକୁଟିଆ ଏକ ଅତ୍ୟନ୍ତ ପ୍ରଦୂଷିତ ନଦୀକୁ ସଫା କରି ସୋସିଆଲ୍ ମିଡିଆରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିବା ଭାରତୀୟ କଣ୍ଟେଣ୍ଟ କ୍ରିଏଟର ତଥା ପରିବେଶପ୍ରେମୀ ଯୁବକ ‘ବିଟ୍ଟୁ ତବାହୀ’ଙ୍କୁ ଏବେ ଏକ ବଡ଼ ସୁଯୋଗ ମିଳିଛି । ତାଙ୍କର ଏହି ନିଃସ୍ୱାର୍ଥପର ତଥା କଠିନ ପରିଶ୍ରମରେ ପ୍ରଭାବିତ ହୋଇ ନେଦରଲ୍ୟାଣ୍ଡସ୍ଥିତ ଏକ ଅନ୍ତର୍ଜାତୀୟ ପରିବେଶ ସଂସ୍ଥାର ପ୍ରତିଷ୍ଠାତା ତାଙ୍କୁ ସିଧାସଳଖ ଚାକିରି ଅଫର କରିଛନ୍ତି ।
ନିକଟରେ ସୋସିଆଲ ମିଡିଆରେ ଏକ ଭିଡିଓ ଖୁବ୍ ଭାଇରାଲ ହୋଇଥିଲା। ଏହି ଭିଡିଓରେ ବିଟ୍ଟୁ ନାମକ ଜଣେ ଯୁବକ ଏକ ଅତ୍ୟନ୍ତ ଆବର୍ଜନାପୂର୍ଣ୍ଣ ଏବଂ ଦୁର୍ଗନ୍ଧଯୁକ୍ତ ନଦୀକୁ ସଫା କରୁଥିବାର ଦେଖିବାକୁ ମିଳିଥିଲା। ନଦୀଟି ସମ୍ପୂର୍ଣ୍ଣ ଭାବେ ପ୍ଲାଷ୍ଟିକ୍ ବୋତଲ, ପଲିଥିନ୍ ଏବଂ ଅନ୍ୟାନ୍ୟ କଠିନ ବର୍ଜ୍ୟବସ୍ତୁରେ ପରିପୂର୍ଣ୍ଣ ହୋଇ ଏକ ଡ୍ରେନ୍ର ଭ୍ରମ ସୃଷ୍ଟି କରୁଥିଲା । ମାତ୍ର କୌଣସି ବଡ଼ ଯନ୍ତ୍ରପାତି କିମ୍ବା ସରକାରୀ ସହାୟତା ବିନା, ଏକୁଟିଆ ଅଣ୍ଟାଏ ଦଳୁଆ ପାଣିରେ ପଶି ବିଟ୍ଟୁ ଘଣ୍ଟା ଘଣ୍ଟା ପରିଶ୍ରମ କରି ବିପୁଳ ପରିମାଣର ପ୍ଲାଷ୍ଟିକ୍ ଆବର୍ଜନା ବାହାର କରିଥିଲେ। ସଫେଇ ପୂର୍ବର ଏବଂ ପରବର୍ତ୍ତୀ ସ୍ଥିତିର ତୁଳନାତ୍ମକ ଦୃଶ୍ୟ ଲୋକଙ୍କୁ ଆଶ୍ଚର୍ଯ୍ୟଚକିତ କରିଦେଇଥିଲା। ଇଣ୍ଟରନେଟରେ ଲୋକେ ତାଙ୍କ କାର୍ଯ୍ୟକୁ ଭୂୟସୀ ପ୍ରଶଂସା କରିବା ସହ ଏହି ଭିଡିଓକୁ ବ୍ୟାପକ ଭାବେ ସେୟାର କରିଥିଲେ ।
ଏହି ଭାଇରାଲ ଭିଡିଓ ସମୁଦ୍ର ଏବଂ ନଦୀ ସଫେଇ କ୍ଷେତ୍ରରେ କାର୍ଯ୍ୟ କରୁଥିବା ବିଶ୍ୱର ପ୍ରସିଦ୍ଧ ସଂସ୍ଥା ‘ଦି ଓସେନ୍ କ୍ଲିନ୍ଅପ୍’ର ପ୍ରତିଷ୍ଠାତା ତଥା ଡଚ୍ ସିଇଓ ବୋୟାନ ସ୍ଲାଟଙ୍କ ନଜରକୁ ଆସିଥିଲା । ବିଟ୍ଟୁଙ୍କ ଏକାକୀ ପ୍ରୟାସ ଏବଂ ପରିବେଶ ପ୍ରତି ତାଙ୍କର ଅବଦାନ ଦେଖି ସ୍ଲାଟ୍ ଅତ୍ୟନ୍ତ ପ୍ରଭାବିତ ହୋଇଥିଲେ । ସେ ସୋସିଆଲ ମିଡିଆ ପ୍ଲାଟଫର୍ମରେ ବିଟ୍ଟୁଙ୍କ ଉଦ୍ୟମକୁ ପ୍ରଶଂସା କରିବା ସହ ନିଜ ସଂସ୍ଥାରେ ଯୋଗ ଦେବା ପାଇଁ ତାଙ୍କୁ ଖୋଲାଖୋଲି ଭାବେ ଆମନ୍ତ୍ରଣ କରିଥିଲେ। ସ୍ଲାଟ୍ ଉଲ୍ଲେଖ କରିଥିଲେ ଯେ, ପରିବେଶ ପ୍ରଦୂଷଣ ବିରୋଧରେ ଲଢ଼ିବା ପାଇଁ ବିଟ୍ଟୁଙ୍କ ଭଳି ଉତ୍ସର୍ଗୀକୃତ ଏବଂ କଠିନ ପରିଶ୍ରମୀ ଯୁବକଙ୍କର ବିଶ୍ୱସ୍ତରରେ ଖୁବ୍ ଆବଶ୍ୟକତା ରହିଛି ।
ପରିବେଶବିତ୍ ମାନଙ୍କ ମତରେ, ଏହି ଘଟଣା ପ୍ରମାଣିତ କରିଛି ଯେ ସାମାଜିକ ଗଣମାଧ୍ୟମ କେବଳ ମନୋରଞ୍ଜନର ମାଧ୍ୟମ ନୁହେଁ, ବରଂ ଏହା ମାଧ୍ୟମରେ ଭଲ କାମ ମଧ୍ୟ ଉପଯୁକ୍ତ ମାନ୍ୟତା ପାଇପାରେ । ବିଟ୍ଟୁ ତବାହୀଙ୍କ ଏହି ପ୍ରେରଣାଦାୟୀ କାହାଣୀ ଏବେ ସମଗ୍ର ବିଶ୍ୱରେ ଚର୍ଚ୍ଚାର ବିଷୟ ପାଲଟିଛି ଏବଂ ଜଣେ ବ୍ୟକ୍ତି ଚାହିଁଲେ ସମାଜରେ କିଭଳି ବଡ଼ ପରିବର୍ତ୍ତନ ଆଣିପାରିବେ ତାହା ପୁଣିଥରେ ପ୍ରମାଣିତ ହୋଇଛି ।
