ନୂଆଦିଲ୍ଲୀ : ଭାରତରେ ଆଇଫୋନ୍ ପ୍ରସ୍ତୁତି ଓ ଆସେମ୍ୱଲି ବୃଦ୍ଧି ପାଇବା ସତ୍ତ୍ୱେ କମ୍ପାନୀ କାହିଁକି ଦାମ୍ କମାଉନାହିଁ, ତାହାକୁ ନେଇ ଗ୍ରାହକଙ୍କ ମନରେ ପ୍ରଶ୍ନ ଉଠିଛି। ତେବେ ଏହା ପଛରେ ରହିଛି ବୈଶ୍ୱିକ ସେମିକଣ୍ଡକ୍ଟର ଚିପ୍ ସଙ୍କଟ ଏବଂ ଆପଲ୍ର ପ୍ରିମିୟମ୍ ମାର୍କେଟିଂ ରଣନୀତି।
ଚିପ୍ଫ୍ଲେସନ୍ ଓ ଏଆଇ ଡାଟା ସେଣ୍ଟର ଚାହିଦା:
ବର୍ତ୍ତମାନ ସାରା ବିଶ୍ୱରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ଡାଟା ସେଣ୍ଟରଗୁଡ଼ିକ ପାଇଁ ବିପୁଳ ପରିମାଣର RAM ଏବଂ NAND ମେମୋରୀ ଚିପ୍ ଆବଶ୍ୟକ ହେଉଛି। ମେମୋରୀ ଚିପ୍ ପ୍ରସ୍ତୁତକାରୀ କମ୍ପାନୀଗୁଡ଼ିକ ଏଆଇ ସେକ୍ଟରକୁ ପ୍ରାଥମିକତା ଦେଉଥିବାରୁ ସ୍ମାର୍ଟଫୋନ୍ ଶିଳ୍ପରେ ‘ଚିପ୍ଫ୍ଲେସନ୍’ ଦେଖାଦେଇଛି। ଆଇଫୋନ୍ ତିଆରିରେ ବ୍ୟବହୃତ ହେଉଥିବା ମେମୋରୀ ଚିପ୍ର ଖର୍ଚ୍ଚ ଗତ ବର୍ଷ ତୁଳନାରେ ପ୍ରାୟ ୩୮% ବୃଦ୍ଧି ପାଇଛି।
ଇମ୍ପୋର୍ଟ ଡ୍ୟୁଟି ଓ ଉଚ୍ଚ ଟ୍ୟାକ୍ସ:
ଯଦିଓ କିଛି ଆଇଫୋନ୍ ମଡେଲ୍ ଭାରତରେ ଆସେମ୍ବଲ୍ ହେଉଛି, କିନ୍ତୁ ଏହାର ମୁଖ୍ୟ ପ୍ରସେସର୍, କ୍ୟାମେରା ସେନ୍ସର ଏବଂ ଡିସପ୍ଲେ ଭଳି ଗୁରୁତ୍ୱପୂର୍ଣ୍ଣ ସ୍ପେୟାର ପାର୍ଟସ ବିଦେଶରୁ ଆମଦାନୀ ହୋଇଥାଏ। ଭାରତର ଉଚ୍ଚ ଆମଦାନୀ ଶୁଳ୍କ , ଜିଏସଟି ଯୋଗୁଁ ଉତ୍ପାଦନ ଖର୍ଚ୍ଚ କମିପାରୁନାହିଁ।
ପ୍ରିମିୟମ୍ ବ୍ରାଣ୍ଡିଂ ଓ ଲାଭାଂଶ ରଣନୀତି:
ଆପଲ୍ ଭାରତୀୟ ବଜାରକୁ ଏକ ‘ଲକ୍ସରୀ’ କିମ୍ବା ପ୍ରିମିୟମ୍ ସେଗମେଣ୍ଟ ଭାବେ ଦେଖୁଛି। ଭାରତୀୟ ଗ୍ରାହକଙ୍କ ମଧ୍ୟରେ ଅଧିକ ଦାମ୍ ସତ୍ତ୍ୱେ ଆଇଫୋନ୍ ପ୍ରତି ଥିବା ଆକର୍ଷଣକୁ କମ୍ପାନୀ ନିଜର ମାର୍ଜିନ୍ ବଢ଼ାଇବା ପାଇଁ ବ୍ୟବହାର କରୁଛି। ଫଳରେ ସ୍ଥାନୀୟ ଆସେମ୍ବଲି ହେଉଥିବା ସଞ୍ଚୟକୁ ଗ୍ରାହକଙ୍କୁ ନଦେଇ କମ୍ପାନୀ ନିଜ ଲାଭାଂଶରେ ସାମିଲ କରୁଛି।
ଏହି ସମସ୍ତ କାରଣ ଯୋଗୁଁ ଆପଲ୍ ନୂଆ ମଡେଲ୍ ସହ ପୁରୁଣା ଆଇଫୋନ୍ର ଦାମ୍ ମଧ୍ୟ ହ୍ରାସ ନକରି ବଜାରରେ ଉଚ୍ଚ ମୂଲ୍ୟ ବଜାୟ ରଖୁଛି।