ମହଙ୍ଗା ଜାଲରେ ଛନ୍ଦି ହେଲାଣି ମଧ୍ୟବିତ୍ତ ପରିବାର: ଦରଦାମ ନିୟନ୍ତ୍ରଣ କରିବାରେ ପ୍ରଶାସନ ଫେଲ୍!

ଭୁବନେଶ୍ୱର: ଦୁଆର ମୁହଁରେ ପାର୍ବଣ ଋତୁ । ଆଉ କିଛି ଦିନ ପରେ ଆରମ୍ଭ ହେବ ଜଗତଜନନୀ ମା’ ଦୁର୍ଗାଙ୍କ ପୂଜା । ପୂଜାକୁ ନେଇ ଲୋକଙ୍କ ମନରେ ଉତ୍ସାହ ଥିବା ବେଳେ, ବଜାରର ସ୍ଥିତି କିନ୍ତୁ ସାଧାରଣ ଲୋକଙ୍କ ଚିନ୍ତା ବଢ଼ାଇ ଦେଇଛି । ପାର୍ବଣ ପୂର୍ବରୁ ରାଜ୍ୟରେ ଅହେତୁକ ଦରଦାମ ବୃଦ୍ଧି ଖାଉଟିଙ୍କ ଅଣ୍ଟା ଭାଙ୍ଗି ଦେଲାଣି । ତେଲ, ଲୁଣ, ଡାଲି ଠାରୁ ଆରମ୍ଭ କରି ପନିପରିବା ପର୍ଯ୍ୟନ୍ତ ସବୁକିଛିର ଦର ଏବେ ଆକାଶଛୁଆଁ। ଏହି ‘ମହଙ୍ଗା ମାଡ଼’ ଯୋଗୁଁ ପ୍ରତ୍ୟେକ ଗରିବ ଓ ମଧ୍ୟବିତ୍ତ ପରିବାରର ଘରୋଇ ବଜେଟ୍ ସମ୍ପୂର୍ଣ୍ଣ ବିଗିଡ଼ି ଯାଇଛି ।

ରାଜଧାନୀ ଭୁବନେଶ୍ୱର, କଟକ ସମେତ ରାଜ୍ୟର ବିଭିନ୍ନ ପ୍ରମୁଖ ବଜାର ବୁଲି ଦେଖିଲେ ଦରଦାମ ବୃଦ୍ଧିର ପ୍ରକୃତ ଚିତ୍ର ସାମ୍ନାକୁ ଆସୁଛି । ରୋଷେଇ ଘରର ପ୍ରମୁଖ ସାମଗ୍ରୀ ଆଳୁ ଓ ପିଆଜ ଦର ଲୋକଙ୍କୁ କନ୍ଦାଉଛି। ସେହିପରି ରସୁଣ, ଅଦା ଏବଂ ଟମାଟୋ ଦର କଥା ନକହିବା ଭଲ । ଅନ୍ୟ ସବୁଜ ପନିପରିବା ଦର ମଧ୍ୟ କିଲୋ ପ୍ରତି ୬୦ରୁ ୧୦୦ ଟଙ୍କା ଉପରେ ରହିଛି । କେବଳ ପରିବା ନୁହେଁ, ଖାଇବା ତେଲ, ବିଭିନ୍ନ ପ୍ରକାରର ଡାଲି, ଚିନି ଏବଂ ଅନ୍ୟାନ୍ୟ ଗ୍ରୋସରୀ ସାମଗ୍ରୀର ମୂଲ୍ୟରେ ମଧ୍ୟ ଗତ କିଛି ସପ୍ତାହ ମଧ୍ୟରେ ଅହେତୁକ ବୃଦ୍ଧି ଘଟିଛି। ଆୟ ତୁଳନାରେ ବ୍ୟୟ ବଢ଼ିଯାଉଥିବାରୁ ମାସିକ ଦରମାରେ ଚଳୁଥିବା ପରିବାର ଗୁଡ଼ିକ ଘୋର ଆର୍ଥିକ ସଙ୍କଟର ସମ୍ମୁଖୀନ ହେଉଛନ୍ତି ।

ସାଧାରଣତଃ ପାର୍ବଣ ଋତୁରେ ଘରେ ନୂଆ ଲୁଗାପଟା କିଣାଯିବା ସହ ସ୍ୱତନ୍ତ୍ର ଖାଦ୍ୟପେୟର ଆୟୋଜନ ହୋଇଥାଏ । ତେବେ ବର୍ତ୍ତମାନର ବଜାର ଦର ଦେଖି ଗୃହିଣୀମାନେ ମୁଣ୍ଡରେ ହାତ ଦେଲେଣି । ପୂଜା ବଜାର କରିବା ତ ଦୂରର କଥା, ଦୈନନ୍ଦିନ ରାସନ ଆଣିବା ଏବେ କଷ୍ଟକର ହୋଇପଡ଼ିଲାଣି । ଗ୍ରାହକମାନେ ଅଭିଯୋଗ କରିଛନ୍ତି ଯେ, କିଛି ଅସାଧୁ ବ୍ୟବସାୟୀ ଏବଂ କଳାବଜାରୀ ପାର୍ବଣର ସୁଯୋଗ ନେଇ କୃତ୍ରିମ ଅଭାବ ସୃଷ୍ଟି କରୁଛନ୍ତି ଏବଂ ମନଇଚ୍ଛା ଦର ଆଦାୟ କରୁଛନ୍ତି ।

ବଜାରରେ ସରକାରୀ ନିୟନ୍ତ୍ରଣ ନଥିବାରୁ ଏଭଳି ସ୍ଥିତି ଉପୁଜିଥିବା ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି । ଯଦି ପ୍ରଶାସନ ତୁରନ୍ତ ବଜାର ଦର ଉପରେ ଲଗାମ୍ ନଲଗାଏ ଏବଂ କଳାବଜାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ ନକରେ, ତେବେ ଆଗାମୀ ଦିନରେ ସାଧାରଣ ଲୋକଙ୍କ ଦୁର୍ଦ୍ଦଶା ଆହୁରି ବଢ଼ିବ। ଖାଉଟିମାନେ ଦାବି କରିଛନ୍ତି ଯେ, ରାଜ୍ୟ ସରକାର ଏବଂ ଯୋଗାଣ ବିଭାଗ ତୁରନ୍ତ ହସ୍ତକ୍ଷେପ କରି ପାର୍ବଣ ପୂର୍ବରୁ ଅତ୍ୟାବଶ୍ୟକ ସାମଗ୍ରୀର ଦର ନିୟନ୍ତ୍ରଣ କରନ୍ତୁ, ଯାହାଫଳରେ ଲୋକେ ଶାନ୍ତିରେ ପୂଜା ପାଳନ କରିପାରିବେ ।