ବିଶ୍ୱ ବଜାରକୁ ବଡ଼ ଝଟକା: ସାଉଦି ଆରବର ଅଶୋଧିତ ତୈଳ ଉତ୍ପାଦନରେ ରେକର୍ଡ ହ୍ରାସ, ବଢ଼ିପାରେ ତେଲ ଦର

ନୂଆଦିଲ୍ଲୀ: ଆମେରିକା ଏବଂ ଇରାନ ମଧ୍ୟରେ ଲାଗି ରହିଥିବା ଉତ୍ତେଜନା ଏବଂ ଯୁଦ୍ଧର ପ୍ରଭାବ ଏବେ ବିଶ୍ୱ ତୈଳ ବଜାର ଉପରେ ସ୍ପଷ୍ଟ ଭାବେ ଦେଖିବାକୁ ମିଳିଲାଣି । ବିଶ୍ୱର ଅନ୍ୟତମ ପ୍ରମୁଖ ଅଶୋଧିତ ତୈଳ ଉତ୍ପାଦନକାରୀ ଦେଶ ସାଉଦି ଆରବର ତୈଳ ଉତ୍ପାଦନ ୧୯୯୦ ମସିହା ପରଠାରୁ ସର୍ବନିମ୍ନ ସ୍ତରରେ ପହଞ୍ଚିଛି । ଅର୍ଥାତ ଗତ ତିନି ଦଶନ୍ଧି ମଧ୍ୟରେ ଏହା ହେଉଛି ସାଉଦି ଆରବର ସବୁଠାରୁ କମ୍ ତୈଳ ଉତ୍ପାଦନ । ସ୍ଥାନୀୟ ପ୍ରଶାସନ ତଥା ଅର୍ଥନୈତିକ ବିଶେଷଜ୍ଞଙ୍କ ମତରେ ଏହି ଘଟଣା ଆଗାମୀ ଦିନରେ ବିଶ୍ୱ ଅର୍ଥନୀତି ପାଇଁ ବଡ଼ ଚିନ୍ତାର କାରଣ ପାଲଟିପାରେ ।

ଓପେକକୁ ସାଉଦି ଆରବ ପକ୍ଷରୁ ଦିଆଯାଇଥିବା ଏକ ରିପୋର୍ଟ ଅନୁଯାୟୀ, ଗତ ଅଗଷ୍ଟ ମାସରେ ଦେଶର ଅଶୋଧିତ ତୈଳ ଉତ୍ପାଦନ ଦୈନିକ ୧.୯ ନିୟୁତ ବ୍ୟାରେଲ ହ୍ରାସ ପାଇ ୬.୨୩୮ ନିୟୁତ ବ୍ୟାରେଲରେ ସୀମିତ ରହିଛି । ଯୁଦ୍ଧ ଆରମ୍ଭ ହେବା ପୂର୍ବରୁ ସାଉଦିର ଦୈନିକ ଉତ୍ପାଦନ ପ୍ରାୟ ୧୦.୧ ନିୟୁତ ବ୍ୟାରେଲ ରହୁଥିଲା । ଏହି ଆଶ୍ଚର୍ଯ୍ୟଜନକ ହ୍ରାସ ୧୯୯୦ ମସିହାର ଉପସାଗରୀୟ ଯୁଦ୍ଧ ସମୟର ସର୍ବନିମ୍ନ ରେକର୍ଡକୁ ମଧ୍ୟ ଅତିକ୍ରମ କରିଯାଇଛି। ଆମେରିକା ଓ ଇରାନ ମଧ୍ୟରେ ଘନଉଥିବା ବିବାଦ କାରଣରୁ ସାଉଦି ଆରବର ରପ୍ତାନି ମାର୍ଗ ଗୁରୁତର ଭାବେ ବାଧାପ୍ରାପ୍ତ ହୋଇଛି, ଯାହାର ସିଧାସଳଖ ପ୍ରଭାବ ଉତ୍ପାଦନ କ୍ଷମତା ଉପରେ ପଡ଼ିଛି ।

ସୂଚନାଯୋଗ୍ୟ ଯେ, ଇରାନ ସମର୍ଥିତ ହୁଥି ବିଦ୍ରୋହୀମାନେ ସାଉଦି ଆରବର ତୈଳ ଟ୍ୟାଙ୍କର ଏବଂ ଷ୍ଟୋରେଜ୍ ଉପରେ ଲଗାତାର ଆକ୍ରମଣ କରୁଛନ୍ତି । ନିକଟରେ ସେପ୍ଟେମ୍ବର ୧୦ ତାରିଖରେ ଇଷ୍ଟ-ୱେଷ୍ଟ ପାଇପଲାଇନ ଉପରେ ଆକ୍ରମଣ ହେବା ଫଳରେ ସୁରକ୍ଷା ଦୃଷ୍ଟିରୁ ଏହାକୁ ବନ୍ଦ କରିବାକୁ ପଡ଼ିଥିଲା। ଅନ୍ୟପକ୍ଷରେ ଲାଲ ସାଗର ଏବଂ ହର୍ମୁଜ ପ୍ରଣାଳୀରେ ଜାହାଜ ଚଳାଚଳ ଉପରେ ଆସିଥିବା ସଙ୍କଟ ଯୋଗୁଁ ସାଉଦିର ମୁଖ୍ୟ ରପ୍ତାନି କରିଡର ବିପଦରେ ପଡ଼ିଛି । ୟେମେନର ପଶ୍ଚିମ ଉପକୂଳରେ ଥିବା ମୋଖା ବନ୍ଦରକୁ ନିକଟରେ ହୁଥି ବିଦ୍ରୋହୀମାନେ ନିଜ ନିୟନ୍ତ୍ରଣକୁ ନେଇଯାଇଛନ୍ତି ।

ପାରସ୍ୟ ଉପସାଗରରେ ଟ୍ୟାଙ୍କର ଗୁଡ଼ିକ ଉପରେ ବାରମ୍ବାର ଆକ୍ରମଣ ଆଶଙ୍କା ଥିବାରୁ ବ୍ରେଣ୍ଟ କ୍ରୁଡ୍ ଅଏଲ୍ ମୂଲ୍ୟ ବ୍ୟାରେଲ ପିଛା ୧୦୦ ଡଲାର ପାର୍ କରିସାରିଲାଣି । ବ୍ଲୁମବର୍ଗ ରିପୋର୍ଟ ଅନୁଯାୟୀ, ଅଗଷ୍ଟ ମାସରେ ସାଉଦି ଆରବର ଅଶୋଧିତ ତୈଳ ରପ୍ତାନି ପ୍ରାୟ ଏକ ତୃତୀୟାଂଶ ହ୍ରାସ ପାଇ ଦୈନିକ ମାତ୍ର ୩ ନିୟୁତ ବ୍ୟାରେଲରେ ପହଞ୍ଚିଥିଲା ।

ଏବେ ବଡ଼ ପ୍ରଶ୍ନ ଉଠୁଛି, ତୈଳ ଯୋଗାଣରେ ଏହି ବିପୁଳ ଶୂନ୍ୟସ୍ଥାନ କିଏ ପୂରଣ କରୁଛି? ତେବେ ଉତ୍ପାଦନ କମିଥିଲେ ମଧ୍ୟ ବିଶ୍ୱ ବଜାରକୁ ସାଉଦି ଆରବର ତୈଳ ଯୋଗାଣ ଅଗଷ୍ଟରେ ଦୈନିକ ୭.୧୨୨ ନିୟୁତ ବ୍ୟାରେଲ ରହିଥିଲା । ଏହାର ସ୍ପଷ୍ଟ ଅର୍ଥ ହେଉଛି ଉତ୍ପାଦନ ବାଧାପ୍ରାପ୍ତ ହୋଇଥିଲେ ସୁଦ୍ଧା ସାଉଦି ଆରବ ନିଜର ଗଚ୍ଛିତ ଷ୍ଟକ ବା ରିଜର୍ଭରୁ ତୈଳ ଯୋଗାଇ ଏହି ଅଭାବକୁ ପୂରଣ କରୁଛି । ଏହାବ୍ୟତୀତ ଉପସାଗରୀୟ ଅଞ୍ଚଳ ବାହାରେ ଥିବା ଅନ୍ୟାନ୍ୟ ଅଣ-ଗଲ୍ଫ ତୈଳ ଉତ୍ପାଦନକାରୀ ଦେଶଗୁଡ଼ିକ ଏହି ସମୟରେ ବିଶ୍ୱ ବଜାରରେ ନିଜର ଯୋଗାଣ ବୃଦ୍ଧି କରିଛନ୍ତି । ଯଦି ଯୁଦ୍ଧ ପରିସ୍ଥିତି ଏମିତି ଲାଗି ରହେ, ତେବେ ଆଗାମୀ ଦିନରେ ବିଶ୍ୱର ବିଭିନ୍ନ ପ୍ରାନ୍ତରେ ତୈଳ ଦର ଆହୁରି ମହଙ୍ଗା ହେବାର ଆଶଙ୍କାକୁ ଏଡାଇ ଦିଆଯାଇ ନପାରେ ।