ଭୁବନେଶ୍ବର: ଯାଜପୁର ଜିଲ୍ଲାରେ ଭାଲୁକୁଣି ବିସର୍ଜନ ଶୋଭାଯାତ୍ରା ସମୟରେ ଡିଜେ ସାଉଣ୍ଡ ବକ୍ସଗୁଡ଼ିକ ପଡ଼ିଯିବାରୁ ୭ ଜଣ ଗୁରୁତର ଆହତ ହୋଇଛନ୍ତି।
ସୂଚନା ଅନୁଯାୟୀ, ସୋମବାର ସନ୍ଧ୍ୟାରେ ଯାଜପୁର ବ୍ଲକ ଅନ୍ତର୍ଗତ ଛତିଶଦେବିଲ ପଞ୍ଚାୟତର ମହମ୍ମଦ ଜମାପୁର ଗ୍ରାମରେ ଏହି ଘଟଣା ଘଟିଛି। ସ୍ଥାନୀୟ ସାହୁ ସାହିରେ ଭାଲୁକୁଣି ବିସର୍ଜନ ଶୋଭାଯାତ୍ରା ଚାଲିଥିବା ବେଳେ ସାଉଣ୍ଡ ବକ୍ସଗୁଡ଼ିକୁ ଧରି ରଖିଥିବା ବେଲ୍ଟ ଏକ ଗଛ ଡାଳରେ ଲାଗି ଛିଣ୍ଡି ଯାଇଥିଲା। ଫଳସ୍ୱରୂପ ସାଉଣ୍ଡ ବକ୍ସଗୁଡ଼ିକ ଶୋଭାଯାତ୍ରାରେ ଯାଇଥିବା ବାଳିକାମାନଙ୍କ ଉପରେ ପଡ଼ିଯାଇଥିଲା।
ଅପରପକ୍ଷରେ ସ୍ଥାନୀୟ ଲୋକମାନେ ଆହତମାନଙ୍କୁ ଉଦ୍ଧାର କରି ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ।ବର୍ତ୍ତମାନ ସମସ୍ତ ୭ ଜଣଙ୍କର ଚିକିତ୍ସା ଚାଲିଥିବା ବେଳେ ୩ ଜଣ ବାଳିକାଙ୍କ ଅବସ୍ଥା ଗୁରୁତର ଥିବା ଜଣାପଡ଼ିଛି।