ସୁନ୍ଦରଗଡ଼ ମୃତ୍ତିକା ସଂରକ୍ଷଣ ଉପ-ନିର୍ଦ୍ଦେଶକଙ୍କ ପାଖରେ କୋଟିକୋଟି ସମ୍ପତି, ଗିରଫ କଲା ଭିଜିଲାନ୍ସ 

ଭୁବନେଶ୍ୱର: ଆୟ ବହର୍ଭୁତ ସମ୍ପତ୍ତି ଠୁଳ ଅଭିଯୋଗରେ ଓଡ଼ିଶା ଭିଜିଲାନ୍ସ ବିଭାଗ ସୁନ୍ଦରଗଡ଼ର ମୃତ୍ତିକା ସଂରକ୍ଷଣ ଉପ-ନିର୍ଦ୍ଦେଶକ ତଥା ୱାଟରସେଡ୍ ପ୍ରକଳ୍ପ ନିର୍ଦ୍ଦେଶକ ପ୍ରସନ୍ନ କୁମାର ପାତ୍ରଙ୍କୁ ଗିରଫ କରିଛି।

ଏହି ବରିଷ୍ଠ ଅଧିକାରୀଙ୍କୁ ସୁନ୍ଦରଗଡ଼ ସ୍ଥିତ ଭିଜିଲାନ୍ସ ସ୍ୱତନ୍ତ୍ର ବିଚାରପତିଙ୍କ କୋର୍ଟରେ ହାଜର କରାଯିବ।

ପ୍ରସନ୍ନ କୁମାର ପାତ୍ରଙ୍କ ସହ ଜଡ଼ିତ ବିଭିନ୍ନ ସ୍ଥାନରେ ଏକକାଳୀନ ଚଢ଼ଉ ପରେ ଏହି ଗିରଫଦାରୀ କରାଯାଇଛି। ଏହି ସମୟରେ ଦୁର୍ନୀତି ନିବାରଣ ବିଭାଗର ଅଧିକାରୀମାନେ ବହୁ ପରିମାଣର ସମ୍ପତ୍ତି ଠାବ କରିଥିଲେ। ଯାହା ସମ୍ପର୍କରେ ଅଧିକାରୀ ଜଣକ ସନ୍ତୋଷଜନକ ଉତ୍ତର ଦେଇପାରିନଥିଲେ।

ଚଢ଼ଉ ସମୟରେ ଭିଜିଲାନ୍ସ ଅଧିକାରୀମାନେ ତାଙ୍କ ଏବଂ ତାଙ୍କ ପରିବାର ସଦସ୍ୟଙ୍କ ନାମରେ ଥିବା ବହୁ ମୂଲ୍ୟବାନ ସ୍ଥାବର ଓ ଅସ୍ଥାବର ସମ୍ପତ୍ତି ଠାବ କରିଥିଲେ। ଏଥିମଧ୍ୟରେ ଭୁବନେଶ୍ୱରର ପ୍ରମୁଖ ଅଞ୍ଚଳରେ ଥିବା ଚାରୋଟି ବହୁତଳ ବିଶିଷ୍ଟ କୋଠା ଏବଂ ଏକ ଦାମୀ ଫ୍ଲାଟ୍ ଅନ୍ତର୍ଭୁକ୍ତ।

ଏହା ବ୍ୟତୀତ ଭିଜିଲାନ୍ସ ଅଧିକାରୀମାନେ ଅନ୍ୟ ସ୍ଥାନରେ ସାତୋଟି ମୂଲ୍ୟବାନ ଜମି (ପ୍ଲଟ୍), ବିଭିନ୍ନ ବ୍ୟାଙ୍କ ଜମା ଓ ନିବେଶରେ ୧.୪୬ କୋଟି ଟଙ୍କା, ୨୧୨ ଗ୍ରାମ ସୁନା ଅଳଙ୍କାର ଏବଂ ୧.୨୯ ଲକ୍ଷ ଟଙ୍କା ନଗଦ ଅର୍ଥ ମଧ୍ୟ ଠାବ କରିଥିଲେ।

ଏହି ତଥ୍ୟ ସାମ୍ନାକୁ ଆସିବା ପରେ ଦୁର୍ନୀତି ନିବାରଣ (ସଂଶୋଧନ) ଆଇନର ସମ୍ପୃକ୍ତ ଧାରା ଅନୁଯାୟୀ ରାଉରକେଲା ଭିଜିଲାନ୍ସ ଥାନାରେ ଏକ ଫୌଜଦାରୀ ମାମଲା ରୁଜୁ କରାଯାଇଛି। ବର୍ତ୍ତମାନ ଏହାର ଅଧିକ ତଦନ୍ତ ଚାଲିଛି।