ଭାରତୀୟ ପାଇଲଟ୍ ସ୍ମିତ ମଚ୍ଛରଙ୍କ ଉପରେ ଆକ୍ରମଣ ଘଟଣାରେ NIA ପକ୍ଷରୁ UAPA ଓ ଆଣ୍ଟି-ହାଇଜାକିଂ ଆଇନରେ ମାମଲା ରୁଜୁ

ନୂଆଦିଲ୍ଲୀ: ଫ୍ଲାଏଦୁବାଇ ବିମାନର ଭାରତୀୟ ପାଇଲଟ୍ କ୍ୟାପ୍ଟେନ୍ ସ୍ମିତ ମଚ୍ଛରଙ୍କ ଉପରେ ହୋଇଥିବା ଆକ୍ରମଣର ତଦନ୍ତ ପାଇଁ ଭାରତ ସରକାର ପଦକ୍ଷେପ ନେଇଛନ୍ତି। ଜାତୀୟ ତଦନ୍ତକାରୀ ସଂସ୍ଥା ଏହି ମାମଲାରେ ଆଣ୍ଟି-ହାଇଜାକିଂ ଆଇନ ଏବଂ ବେଆଇନ କାର୍ଯ୍ୟକଳାପ ନିବାରଣ ଆଇନ ଅଧୀନରେ ଏକ ମାମଲା ରୁଜୁ କରିଛି।

ଗତ ସେପ୍ଟେମ୍ବର ୩୦ ତାରିଖରେ ଦୁବାଇରୁ ତେଲଅଭିବ ଯାଉଥିବା ଫ୍ଲାଏଦୁବାଇ ଫ୍ଲାଇଟ୍ ର କକପିଟ୍ ଭିତରେ ଓମାନର ଜଣେ କୋ-ପାଇଲଟ୍ ଭାରତୀୟ କ୍ୟାପ୍ଟେନ୍ ସ୍ମିତ ମଚ୍ଛରଙ୍କୁ ଆକ୍ରମଣ କରି ଗୁରୁତର ଆହତ କରିଥିଲେ। ବିମାନକୁ ହାଇଜାକ କରିବା କିମ୍ବା ଦୁର୍ଘଟଣାଗ୍ରସ୍ତ କରିବା ଉଦ୍ଦେଶ୍ୟରେ ଏହି ଆକ୍ରମଣ କରାଯାଇଥିବା ଅଭିଯୋଗ ହୋଇଛି। ଗୁରୁତର ଆହତ ହେବା ସତ୍ତ୍ବେ କ୍ୟାପ୍ଟେନ୍ ମଚ୍ଛର ନିଜର ସାହସ ଏବଂ ଉପସ୍ଥିତି ବୁଦ୍ଧି ବଳରେ କକପିଟ୍ ଦ୍ୱାର ଖୋଲିବାରେ ସଫଳ ହୋଇଥିଲେ, ଯାହାଫଳରେ ଅନ୍ୟ ଯାତ୍ରୀ ଓ କର୍ମଚାରୀମାନେ ଆକ୍ରମଣକାରୀଙ୍କୁ କାବୁ କରି ଏକ ବଡ଼ ବିପର୍ଯ୍ୟୟକୁ ଏଡ଼ାଇ ପାରିଥିଲେ।

ଏହି ସାହସିକତା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କ୍ୟାପଟେନ ସ୍ମିତ ମଚ୍ଛରଙ୍କ ସହ କଥା ହୋଇ ତାଙ୍କର ପ୍ରଶଂସା କରିଥିଲେ। ବର୍ତ୍ତମାନ ଏହି ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି NIA ଏହାର ଗୁରୁତର ତଦନ୍ତ ଆରମ୍ଭ କରିଛି। କାରଣ ଏହା ବିମାନ ଚଳାଚଳ ସୁରକ୍ଷା ଏବଂ ଜାତୀୟ ନିରାପତ୍ତା ସହ ସିଧାସଳଖ ଜଡ଼ିତ। ଭାରତୀୟ ଆଇନ ଅନୁଯାୟୀ, ଦେଶ ବାହାରେ ଭାରତୀୟ ନାଗରିକଙ୍କ ଉପରେ ଏଭଳି ସମ୍ବେଦନଶୀଳ ଆକ୍ରମଣ ହେଲେ ତଦନ୍ତ କରିବାର ଅଧିକାର ଏଜେନ୍ସି ପାଖରେ ରହିଛି।

ତଦନ୍ତରୁ ଜଣାପଡିଛି ଯେ, ଆକ୍ରମଣକାରୀ କୋ-ପାଇଲଟ୍ ଜଣକ ପୂର୍ବ ଯୋଜନାବଦ୍ଧ ଭାବେ ଏହି କାଣ୍ଡ ଘଟାଇଥିଲେ। ବିମାନ ଆକାଶରେ ଥିବା ସମୟରେ ହଠାତ୍ ସେ ଏଭଳି ଆକ୍ରମଣ କରିବାରୁ ପରିସ୍ଥିତି ଅତ୍ୟନ୍ତ ଜଟିଳ ହୋଇପଡ଼ିଥିଲା। ତଥାପି, କ୍ୟାପ୍ଟେନ୍ ମଚ୍ଛର ନିଜର ଦୃଢ଼ ମନୋବଳ ଏବଂ ପେଷାଦାର ଦକ୍ଷତା ପ୍ରଦର୍ଶନ କରି କେବଳ ନିଜ ଜୀବନ ରକ୍ଷା କରିନଥିଲେ, ବରଂ ଶହ ଶହ ନିରୀହ ଯାତ୍ରୀଙ୍କ ଜୀବନ ମଧ୍ୟ ବଞ୍ଚାଇ ପାରିଥିଲେ।

ଭାରତ ସରକାର ଏହି ଘଟଣାକୁ ଗମ୍ଭୀରତାର ସହ ଗ୍ରହଣ କରି ଆସନ୍ତା ଦିନରେ ଅନ୍ତର୍ଜାତୀୟ ଏଜେନ୍ସିଗୁଡ଼ିକ ସହ ମିଶି ଏହାର ମୂଳ ପର୍ଯ୍ୟନ୍ତ ଯିବାକୁ ପ୍ରସ୍ତୁତ ହେଉଛନ୍ତି।