ବ୍ରହ୍ମପୁର: ଗଞ୍ଜାମ ଜିଲ୍ଲା ଅନ୍ତର୍ଗତ ସାନଖେମୁଣ୍ଡି ବ୍ଲକର ପ୍ରତାପଗିରି ଗ୍ରାମରେ ଜଣେ ୪୨ ବର୍ଷୀୟ ଚାଷୀଙ୍କର ବିଦ୍ୟୁତ୍ ଆଘାତରେ ମୃତ୍ୟୁ ଘଟିଛି। ଶିକାରୀମାନେ ବାରାହ ଶିକାର କରିବା ପାଇଁ ଏକ ଚାଷ ଜମିରେ ବିଦ୍ୟୁତ୍ ତାର ବିଛାଇଥିଲେ ଏବଂ ସେହି ତାର ଉପରେ ପାଦ ପଡ଼ିଯିବାରୁ ଜଣେ ଚାଷୀ ଦୁର୍ଘଟଣାର ଶିକାର ହୋଇଥିଲେ।
ସୋମବାର ବିଳମ୍ବିତ ରାତିରେ ଜିଲ୍ଲାର ସାନଖେମୁଣ୍ଡି ବ୍ଲକ ଅନ୍ତର୍ଗତ ପ୍ରତାପଗିରି ଗ୍ରାମ ନିକଟରେ ଏହି ଘଟଣା ଘଟିଥିଲା।
ମୃତକ ହେଲେ ପ୍ରତାପଗିରି ଗ୍ରାମର ମେହେଙ୍କାଳ ନାୟକ। ରାତ୍ରିଭୋଜନ ପରେ ସେ ଅନ୍ୟ କିଛି ଚାଷୀଙ୍କ ସହ ଧାନ ଫସଲରେ ପାଣି ଦେବା ପାଇଁ ନିଜ କ୍ଷେତକୁ ଯାଇଥିଲେ। ଏହି ସମୟରେ ହଠାତ୍ ତାଙ୍କ ପାଦ ବିଦ୍ୟୁତ୍ ସଂଯୁକ୍ତ ତାର ଉପରେ ପଡ଼ିଯାଇଥିଲା। ଫଳରେ ବିଦ୍ୟୁତ୍ ଆଘାତରେ ତାଙ୍କର ଗୋଡ଼, ଜଙ୍ଘ ଓ ଶରୀରର ନିମ୍ନ ଭାଗ ଗୁରୁତର ଭାବେ ପୋଡ଼ି ଯାଇଥିଲା।
ପରିବାର ସଦସ୍ୟ ଓ ସ୍ଥାନୀୟ ଲୋକେ ତାଙ୍କୁ ତୁରନ୍ତ ଆଡ଼ପଡ଼ା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ, କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପରେ ପୋଲିସ୍ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବ୍ରହ୍ମପୁରସ୍ଥିତ ଏମକେସିଜି ବୁମେଡିକାଲ୍ କଲେଜ ଓ ହସ୍ପିଟାଲକୁ ପଠାଇଥିଲା। ମଙ୍ଗଳବାର ଦିନ ଗଭୀର ଶୋକାକୁଳ ପରିବେଶ ମଧ୍ୟରେ ଗ୍ରାମର ଶ୍ମଶାନରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଥିଲା। ତେବେ ଏହି ଘଟଣାରେ ଗାଁରେ ଶୋକର ଛାୟା ଖେଳିଯାଇଛି।