PM’s New Development Vision: ବ୍ଲୁମ୍ବର୍ଗ ଫୋରମ୍ରେ ମୋଦୀଙ୍କ ବଡ଼ ବାର୍ତ୍ତା, ବିଶ୍ୱକୁ ଦେଖାଇଲେ ବିକାଶର ନୂଆ ରାସ୍ତା!
ନୂଆଦିଲ୍ଲୀ: ବିକାଶର ଅର୍ଥ କେବଳ ଆର୍ଥିକ ଶକ୍ତି ବଢ଼ାଇବା ନୁହେଁ, ବରଂ ସେହି ଶକ୍ତିକୁ ସାଧାରଣ ଲୋକଙ୍କ ଜୀବନ ବଦଳାଇବାରେ ବ୍ୟବହାର କରିବା। ଟେକ୍ନୋଲୋଜି, ଡାଟା ଓ କୃତ୍ରିମ ବୁଦ୍ଧିମତ୍ତା (AI)ର ଏହି ଯୁଗରେ ବିଶ୍ୱକୁ ବିକାଶର ନୂଆ ଦିଗ ଦେଖାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଭାରତରେ ପ୍ରଥମଥର ଆୟୋଜିତ ବ୍ଲୁମ୍ବର୍ଗ ନ୍ୟୁ ଇକୋନୋମି ଫୋରମ୍ରେ ଉଦ୍ବୋଧନ ଦେଇ ସେ କହିଛନ୍ତି, ଟେକ୍ନୋଲୋଜିର ପ୍ରକୃତ ଲକ୍ଷ୍ୟ କେବଳ କିଛି ଲୋକଙ୍କୁ ଆଗକୁ ବଢ଼ାଇବା ନୁହେଁ, ବରଂ ଲକ୍ଷ ଲକ୍ଷ ଲୋକଙ୍କ ପାଇଁ ନୂଆ ସୁଯୋଗ ସୃଷ୍ଟି କରିବା ଏବଂ ସେମାନଙ୍କ ଦକ୍ଷତା ବଢ଼ାଇବା।
ମୋଦି କହିଛନ୍ତି, ଆଜି ପ୍ରଶ୍ନ ଏହା ନୁହେଁ ଯେ ଶକ୍ତି କାହା ପାଖରେ ଅଛି, ବରଂ ସେହି ଶକ୍ତିର ବ୍ୟବହାର କିପରି ହେଉଛି। ଟେକ୍ନୋଲୋଜି, ଜ୍ଞାନ, ଡାଟା ଓ ନୂଆ ଉଦ୍ଭାବନର ଲାଭ ଯଦି କେବଳ କିଛି ଲୋକଙ୍କ ପାଖରେ ସୀମିତ ରହିଯାଏ, ତେବେ ଏହାର ପ୍ରକୃତ ଉଦ୍ଦେଶ୍ୟ ପୂରଣ ହେବ ନାହିଁ। ଏହାର ଲାଭ ସାଧାରଣ ଲୋକଙ୍କ ପାଖରେ ପହଞ୍ଚିବା ଦରକାର।
ପ୍ରଧାନମନ୍ତ୍ରୀ କହିଛନ୍ତି, ସରକାରଙ୍କ ପାଖରେ କ୍ଷମତା ରହିଛି, କିନ୍ତୁ ଏହାର ଉଦ୍ଦେଶ୍ୟ ନାଗରିକଙ୍କୁ ବ୍ୟବସ୍ଥା ଉପରେ ନିର୍ଭରଶୀଳ କରିବା ନୁହେଁ; ବରଂ ସେମାନଙ୍କୁ ଆତ୍ମନିର୍ଭର ଓ ସଶକ୍ତ କରିବା। ଏହି ଦୃଷ୍ଟିକୋଣ ନେଇ ଭାରତ ଆଗକୁ ବଢ଼ୁଛି। ଗତ ୧୦ ବର୍ଷ ମଧ୍ୟରେ ଦେଶରେ ୨୫ କୋଟି ଲୋକ ଦାରିଦ୍ର୍ୟରୁ ବାହାରିଥିବା ସେ ଦାବି କରିଛନ୍ତି।
ଭାରତର ବିବିଧତା ଓ ଗଣତାନ୍ତ୍ରିକ ପରମ୍ପରା ଉପରେ ମଧ୍ୟ ମୋଦି ଗୁରୁତ୍ୱ ଦେଇଛନ୍ତି। ତାଙ୍କ କହିବା ଅନୁସାରେ, ଭାରତରେ ଶହେରୁ ଅଧିକ ଭାଷା କୁହାଯାଏ। ଦେଶରେ ପ୍ରାୟ ୮୦ ହଜାର ପଞ୍ଜୀକୃତ ଖବରକାଗଜ ଓ ପ୍ରକାଶନ ଏବଂ ଏକ ହଜାରରୁ ଅଧିକ ସାଟେଲାଇଟ୍ ଟିଭି ଚ୍ୟାନେଲ୍ ରହିଛି। ଏହା ସହ ୫୦ କୋଟିରୁ ଅଧିକ ୟୁଟ୍ୟୁବ୍ ବ୍ୟବହାରକାରୀ ଏବଂ ୫୦ କୋଟିରୁ ଅଧିକ ଇନ୍ଷ୍ଟାଗ୍ରାମ୍ ବ୍ୟବହାରକାରୀ ଥିବା କଥା ସେ ଉଲ୍ଲେଖ କରିଛନ୍ତି। ଦେଶରେ ବିଭିନ୍ନ ପ୍ରସଙ୍ଗରେ ମୁକ୍ତ ଆଲୋଚନା ଓ ମତଭେଦ ଗଣତନ୍ତ୍ରର ଏକ ଗୁରୁତ୍ୱପୂର୍ଣ୍ଣ ଅଂଶ ବୋଲି ସେ କହିଛନ୍ତି। ଡିଜିଟାଲ୍ ଟେକ୍ନୋଲୋଜି ଏହି ଆଲୋଚନାକୁ ଆହୁରି ବ୍ୟାପକ କରିଛି।
ଭାରତରେ ଆୟୋଜିତ AI ଇମ୍ପାକ୍ଟ ସମିଟ୍ର ଉଦାହରଣ ଦେଇ ମୋଦି କହିଛନ୍ତି, କୃତ୍ରିମ ବୁଦ୍ଧିମତ୍ତାର ବ୍ୟବହାର କେବଳ ମଣିଷଙ୍କ ଉପକାର ପାଇଁ ନୁହେଁ, ପଶୁମାନଙ୍କ ହିତରେ ମଧ୍ୟ କରାଯାଇପାରିବ। ଭାରତର କ୍ଷମତା ବଢ଼ିଲେ ଏହାର ଲାଭ କେବଳ ଦେଶ ମଧ୍ୟରେ ସୀମିତ ରହିବ ନାହିଁ, ବରଂ ସମଗ୍ର ମାନବଜାତି ଉପକୃତ ହୋଇପାରିବ।
ଜଳବାୟୁ ପରିବର୍ତ୍ତନ ମୁକାବିଲାରେ ଭାରତର ପଦକ୍ଷେପ ବିଷୟରେ ମଧ୍ୟ ମୋଦି ଆଲୋକପାତ କରିଛନ୍ତି। ୨୦୧୫ରେ ପ୍ୟାରିସ୍ ଜଳବାୟୁ ଚୁକ୍ତି ଅନୁଯାୟୀ, ୨୦୩୦ ସୁଦ୍ଧା ଦେଶର ମୋଟ ସ୍ଥାପିତ ବିଦ୍ୟୁତ୍ ଉତ୍ପାଦନ କ୍ଷମତାର ୪୦ ପ୍ରତିଶତ ଅଣ-ଜୀବାଶ୍ମ ଇନ୍ଧନ ଉତ୍ସରୁ ହାସଲ କରିବାକୁ ଭାରତ ଲକ୍ଷ୍ୟ ରଖିଥିଲା। ମୋଦିଙ୍କ ଉଦ୍ବୋଧନ ଅନୁଯାୟୀ, ଭାରତ ନଭେମ୍ବର ୨୦୨୧ରେ ଏହି ଲକ୍ଷ୍ୟ ହାସଲ କରିଥିଲା, ଅର୍ଥାତ୍ ଧାର୍ଯ୍ୟ ସମୟର ପ୍ରାୟ ୯ ବର୍ଷ ପୂର୍ବରୁ। ଏହି ଉପଲବ୍ଧି ହାସଲ କରିଥିବା ପ୍ରଥମ G20 ଦେଶ ଭାବେ ଭାରତକୁ ସେ ଉଲ୍ଲେଖ କରିଛନ୍ତି। ମୋଦି କହିଛନ୍ତି, ଜ୍ଞାନ, ଧନ ଓ ଶକ୍ତି ଥିବା ବ୍ୟକ୍ତି କିମ୍ବା ସଂସ୍ଥା ଏହାକୁ କେଉଁ ଉଦ୍ଦେଶ୍ୟରେ ବ୍ୟବହାର କରୁଛନ୍ତି, ତାହା ହିଁ ସବୁଠାରୁ ଗୁରୁତ୍ୱପୂର୍ଣ୍ଣ। ଭାରତର ହଜାର ହଜାର ବର୍ଷର ପରମ୍ପରା ମଧ୍ୟ ଏହି ଶିକ୍ଷା ଦେଇଆସିଛି। ଶକ୍ତିର ପ୍ରକୃତ ମୂଲ୍ୟ ଏହାର ସଠିକ୍ ବ୍ୟବହାରରେ ରହିଛି।
ବ୍ଲୁମ୍ବର୍ଗ ନ୍ୟୁ ଇକୋନୋମି ଫୋରମ୍ ବିଶ୍ୱର ପ୍ରମୁଖ ଚିନ୍ତାବିଦ୍, ବ୍ୟବସାୟୀ ଓ ଟେକ୍ନୋଲୋଜି କ୍ଷେତ୍ରର ନେତୃତ୍ୱଙ୍କୁ ଗୋଟିଏ ମଞ୍ଚରେ ଏକାଠି କରିଥାଏ। ପ୍ରଥମଥର ଭାରତରେ ଏହି ଫୋରମ୍ ଆୟୋଜିତ ହୋଇଥିବାରୁ ମୋଦି ବ୍ଲୁମ୍ବର୍ଗ ଓ ଏହାର ଟିମ୍କୁ ଅଭିନନ୍ଦନ ଜଣାଇଛନ୍ତି।