ନୂଆଦିଲ୍ଲୀ: ଦଶହରା ଅବସରରେ ସାରା ଦେଶରେ ଅସତ୍ୟ ଉପରେ ସତ୍ୟର ବିଜୟର ପ୍ରତୀକ ଭାବେ ଲଙ୍କାପତି ରାବଣର ପୁତ୍ତଳିକା ଦାହ କରାଯାଇଥାଏ । କିନ୍ତୁ ଏହା ଏକ ବେଶ୍ ଆଶ୍ଚର୍ୟ୍ୟଜନକ ଏବଂ ରୋଚକ ତଥ୍ୟ ଯେ, ଭାରତର ବିଭିନ୍ନ ରାଜ୍ୟରେ ଏହି ନାମରେ କିମ୍ବା ଏହା ସହ ମିଳୁଥିବା ନାମରେ ମୋଟ ୩୪ଟି ଗାଁ ଏବଂ ଜାଗା ରହିଛି । ସବୁଠାରୁ ବଡ଼ କଥା ହେଲା, ଏହି ଗାଁଗୁଡ଼ିକ କେବଳ ଗୋଟିଏ କିମ୍ବା ଦୁଇଟି ରାଜ୍ୟରେ ସୀମିତ ନାହିଁ, ବରଂ ଦେଶର ବହୁ ଅଞ୍ଚଳରେ ବିସ୍ତାରିତ ହୋଇ ରହିଛି ।
ଏହି ତାଲିକାରେ ରାଜସ୍ଥାନ ସବୁଠାରୁ ଆଗରେ ରହିଛି । ଏଠାରେ ରାବଣ ନାମ କିମ୍ବା ଏହା ସହ ଜଡ଼ିତ ପ୍ରାୟ ୧୦ଟି ଗାଁ ରହିଛି । ଏହି ଗାଁଗୁଡ଼ିକର ନାମ ମଧ୍ୟରେ: ରାବଣ ଗୁରାରୀ, କେରିୟାଁ ରାବଣ, ଇସରବାସ (ରାବଣ), ବରବରୀ ରାବଣ, ବଗରୁ ରାବଣ, ମହେଶପୁରା ରାବଣ, ଖେରଲୀ ରାବଣ, ଦେଓଲୀ ରାବଣ ଇତ୍ୟାଦି ଅନ୍ତର୍ଭୁକ୍ତ । ଏହି ତଥ୍ୟ ୨୦୧୧ ଜନଗଣନା ଉପରେ ଆଧାରିତ, ବର୍ତ୍ତମାନ ସମୟରେ ଏଥିରେ କିଛି ପରିବର୍ତ୍ତନ ମଧ୍ୟ ହୋଇଥାଇପାରେ । ଛତିଶଗଡ଼ ରାଜ୍ୟରେ ୭ଟି ଏଭଳି ଗାଁ କିମ୍ବା ସ୍ଥାନ ରହିଛି, ଯାହାର ନାମରେ ରାବଣ ଜଡ଼ିତ ଅଛି । ରାୟପୁର ବ୍ୟତୀତ ଭେଝରୀ ରାବଣ, ରାବଣ ଖୋନ୍ଦ୍ର, ରାବଣ (ରାବଡ଼) ଏବଂ ସାୱନ ରାବଣ ଆଦି ନାମ ଏହି ତାଲିକାରେ ଅଛି । ୟୁପିରେ ମଧ୍ୟ ୬ଟି ସ୍ଥାନ ରହିଛି । ସେଗୁଡ଼ିକ ହେଲା— ଖିରୀର ରାବଣ, ରାବଣ ଓରଫ ବରାଗାଁବ, ରାବଣ ବୁଜୁର୍ଗ, କନ୍ଦ ରାବଣ, ବହୁ ରାବଣ ଏବଂ ରାବଣ ଖୁର୍ଦ ଓରଫ ବିବିପୁର । ଏହା ବ୍ୟତୀତ ଦେଶର ଅନ୍ୟାନ୍ୟ ରାଜ୍ୟରେ ମଧ୍ୟ ଏହି ନାମକ ସ୍ଥାନ ରହିଛି । ପଞ୍ଜାବ: ୩ଟି ସ୍ଥାନ, ବିହାର, ମଧ୍ୟପ୍ରଦେଶ ଓ ହରିୟାଣା: ପ୍ରତ୍ୟେକ ରାଜ୍ୟରେ ୨-୨ଟି ସ୍ଥାନ, ଜମ୍ମୁ-କଶ୍ମୀର ଏବଂ ଉତ୍ତରାଖଣ୍ଡରେ ଗୋଟିଏ ଲେଖାଏଁ ସ୍ଥାନ ରହିଛି ।
ଇଂରାଜୀ ବନାନ ନାମକ ସ୍ଥାନଗୁଡ଼ିକୁ ଦେଖାଯାଏ, ତେବେ ଏହା ସମଗ୍ର ଦେଶରେ ମାତ୍ର ୧୦ଟି ରହିଛି । ଏଗୁଡ଼ିକ କେମୁର (ବିହାର), ବିଦିଶା (ମଧ୍ୟପ୍ରଦେଶ), ହୋସିଆରପୁର ଓ କପୁରଥଳା (ପଞ୍ଜାବ), ରାୟପୁର (ଛତିଶଗଡ଼), ଖିରୀ (ଉତ୍ତର ପ୍ରଦେଶ) ତଥା ଝୁଞ୍ଝୁନୁ ଏବଂ ରାଜସ୍ଥାନରେ ରହିଛି । କେବଳ ଇଂରାଜୀ ବନାନ କିମ୍ବା ଉଚ୍ଚାରଣକୁ ଦେଖି ଏହା କହିବା ସମ୍ପୂର୍ଣ୍ଣ ଭୁଲ୍ ହେବ ଯେ ଏହି ସମସ୍ତ ଗାଁର ନାମ ଲଙ୍କାପତି ରାବଣଙ୍କ ନାମରେ ରଖାଯାଇଛି । ଭାରତର ବିଭିନ୍ନ ଅଞ୍ଚଳରେ ସ୍ଥାନୀୟ ଭାଷା, ଏବଂ ଆଞ୍ଚଳିକ ଉଚ୍ଚାରଣ ଭିନ୍ନ ହୋଇଥିବାରୁ ଏହି ନାମଗୁଡ଼ିକର ଅର୍ଥ ସମ୍ପୂର୍ଣ୍ଣ ଅଲଗା ମଧ୍ୟ ହୋଇପାରେ । ଏହି ଗାଁଗୁଡ଼ିକର ନାମକରଣ ପଛରେ କୌଣସି ପୌରାଣିକ ପ୍ରମାଣ ଏହି ତାଲିକାରୁ ମିଳିନଥାଏ ।