ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମନ୍ଙ୍କୁ ୩ ଘଣ୍ଟା ଧରି ଅଟକ ରଖାଯାଇଥିବା ଏବଂ ୫୦,୦୦୦ ଟଙ୍କା ଜରିମାନା କରାଯାଇଥିବା ନେଇ ଆପ୍ ପକ୍ଷରୁ ଅଭିଯୋଗ
ଦିଲ୍ଲୀ: ଆମ୍ ଆଦମୀ ପାର୍ଟି ପଞ୍ଜାବର ମିଡିଆ ଇନଚାର୍ଜ ବଲତେଜ ପନ୍ନୁ ଅଭିଯୋଗ କରିଛନ୍ତି ଯେ, ଭାରତୀୟ ଜନତା ପାର୍ଟି ନେତୃତ୍ୱାଧୀନ କେନ୍ଦ୍ର ସରକାର ‘ପଞ୍ଜାବୀୟତ’କୁ ନିଚ୍ଚା ଦେଖାଇବା ପାଇଁ କୌଣସି ସୁଯୋଗ ହାତରୁ ଛାଡୁନାହାନ୍ତି।
ସୂଚନା ମୁତାବକ, ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମନ୍ ଫ୍ରାନ୍ସର ପ୍ୟାରିସ୍ ସହରରୁ ଏକ ଅନ୍ତର୍ଜାତୀୟ ଖାଦ୍ୟ ବାଣିଜ୍ୟ ପ୍ରଦର୍ଶନୀରେ ଯୋଗଦେଇ ଦେଶକୁ ଫେରୁଥିଲେ। ସେ ଦିଲ୍ଲୀ ଏୟାରପୋର୍ଟରେ ପହଞ୍ଚିବା ପରେ ଅଧିକାରୀମାନେ ତାଙ୍କୁ ଜାଣିଶୁଣି ପ୍ରାୟ ୩ ଘଣ୍ଟା ଧରି ଅଟକ ରଖିଥିଲେ ଏବଂ ପରେ ୫୦,୦୦୦ ଟଙ୍କାର ଜରିମାନା (ଚାଲାଣ) ମଧ୍ୟ କାଟିଥିଲେ।
ଏହି ଘଟଣାକୁ ନେଇ କେନ୍ଦ୍ର ସରକାରଙ୍କୁ କଡ଼ା ସମାଲୋଚନା କରିଛି ‘ଆପ୍’। ଦଳର ବରିଷ୍ଠ ନେତା ସୌରଭ ଭରଦ୍ୱାଜ ଏବଂ ଅନ୍ୟ କର୍ମକର୍ତ୍ତାମାନେ ଅଭିଯୋଗ କରିଛନ୍ତି ଯେ କେନ୍ଦ୍ର ସରକାରଙ୍କ ଅହଂକାର ଦିନକୁ ଦିନ ବୃଦ୍ଧି ପାଉଛି ଏବଂ ପଞ୍ଜାବର ମୁଖ୍ୟମନ୍ତ୍ରୀଙ୍କୁ ଜାଣିଶୁଣି ଅପମାନିତ କରାଯାଉଛି। ଫ୍ରାନ୍ସ ଗସ୍ତ ପାଇଁ କେନ୍ଦ୍ର ପକ୍ଷରୁ ଅନୁମତି ମିଳି ନଥିଲେ ମଧ୍ୟ ପଞ୍ଜାବ ଏବଂ ହରିୟାଣା ହାଇକୋର୍ଟଙ୍କ ନିର୍ଦ୍ଦେଶକ୍ରମେ ମୁଖ୍ୟମନ୍ତ୍ରୀ ମନ୍ ପ୍ୟାରିସ୍ ଗସ୍ତ କରିଥିଲେ।
ଅନ୍ୟପକ୍ଷରେ, ଶିଳୋମଣି ଅକାଳୀ ଦଳ ଏହି ଅଭିଯୋଗକୁ ଖଣ୍ଡନ କରି କହିଛି ଯେ, ନିୟମ ଉଲ୍ଲଂଘନ କରି ସୀମାଠାରୁ ଅଧିକ ଜିନିଷପତ୍ର କିମ୍ବା ଅର୍ଥ ନେଇ ଯାଉଥିବା ଅଭିଯୋଗରେ ତାଙ୍କୁ ଓ ତାଙ୍କ ସହଯୋଗୀଙ୍କୁ ପଚରାଉଚରା କରାଯାଇଥିଲା* । ଏହି ଘଟଣାକୁ ନେଇ ବର୍ତ୍ତମାନ କେନ୍ଦ୍ର ଏବଂ ପଞ୍ଜାବ ସରକାରଙ୍କ ମଧ୍ୟରେ ରାଜନୈତିକ ତର୍ଜମା ଜୋର ଧରିଛି ଏବଂ ଆଗାମୀ ଦିନରେ ଏହା ଆହୁରି ତୀବ୍ର ହେବାର ସମ୍ଭାବନା ରହିଛି ବୋଲି ରାଜନୈତିକ ବିଶ୍ଳେଷକମାନେ ମତ ପ୍ରକାଶ କରିଛନ୍ତି।