Bangladesh Anti-India Protest: କାହିଁକି ବାଂଲାଦେଶରେ ପୁଣି ଭାରତ ବିରୋଧୀ ଝଡ଼? ଗଙ୍ଗା ଜଳ ବିବାଦରୁ ମାତାରବାଡ଼ି ବନ୍ଦର, ହସିନାଙ୍କ ପ୍ରତ୍ୟାବର୍ତ୍ତନକୁ ନେଇ ତେଜିଲା ରାଜନୀତି…

ନୂଆଦିଲ୍ଲୀ: ବାଂଲାଦେଶରେ ପୁଣି ଥରେ ଭାରତ ବିରୋଧୀ ସ୍ୱର ତୀବ୍ର ହୋଇଛି। ଗଙ୍ଗା ଜଳ ବଣ୍ଟନ ଚୁକ୍ତିର ନବୀକରଣ, ଜାପାନ ସହ ଭିତ୍ତିଭୂମି ବିକାଶ ପ୍ରକଳ୍ପରେ ଭାରତର ଭୂମିକାକୁ ନେଇ ଅଭିଯୋଗ, ଆର୍ଥିକ ସଙ୍କଟ ଏବଂ ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହସିନାଙ୍କ ସମ୍ଭାବ୍ୟ ପ୍ରତ୍ୟାବର୍ତ୍ତନ ଏବେ ବାଂଲାଦେଶ ରାଜନୀତିକୁ ସରଗରମ କରିଛି। ଏହାର ପ୍ରଭାବ ଭାରତ-ବାଂଲାଦେଶ ସମ୍ପର୍କ ଉପରେ ପଡ଼ିବା ଆଶଙ୍କା ବଢ଼ିଛି।
ଅକ୍ଟୋବର ୩୦ରେ ଢାକାରେ ନ୍ୟାସନାଲ ସିଟିଜେନ୍ ପାର୍ଟି (NCP) ପକ୍ଷରୁ ଆୟୋଜିତ ରାଲିରେ ଭାରତ ବିରୋଧୀ ନାରା ଦିଆଯାଇଥିଲା। ଦଳର ମୁଖ୍ୟ ନାହିଦ୍ ଇସଲାମ ଭାରତ ଉପରେ ବାଂଲାଦେଶର ଆଭ୍ୟନ୍ତରୀଣ ବ୍ୟାପାରରେ ହସ୍ତକ୍ଷେପ ଓ ଷଡ଼ଯନ୍ତ୍ର କରୁଥିବା ଅଭିଯୋଗ ଆଣିଥିଲେ। ରାଲିରେ ‘ଦିଲ୍ଲୀ ନା ଢାକା? ଢାକା, ଢାକା’ ନାରା ଶୁଣିବାକୁ ମିଳିଥିଲା। ଭାରତ ସୀମାରେ ହତ୍ୟା ଏବଂ ଆସାମ ଓ ପଶ୍ଚିମବଙ୍ଗରେ ମୁସଲମାନଙ୍କ ଉପରେ ଅତ୍ୟାଚାର ନେଇ ମଧ୍ୟ ସେ ଅଭିଯୋଗ କରିଥିଲେ।
ଭାରତ ଓ ବାଂଲାଦେଶ ମଧ୍ୟରେ ୧୯୯୬ରେ ସ୍ୱାକ୍ଷରିତ ୩୦ ବର୍ଷିଆ ଗଙ୍ଗା ଜଳ ବଣ୍ଟନ ଚୁକ୍ତି ଡିସେମ୍ବର ୧୨ରେ ଶେଷ ହେବାକୁ ଯାଉଛି। ଫରକ୍କା ବ୍ୟାରେଜ୍ ନିକଟରେ ଶୁଷ୍କ ଋତୁରେ ଜଳ ବଣ୍ଟନ ସମ୍ପର୍କରେ ଏହି ଚୁକ୍ତି ହୋଇଥିଲା। ଏବେ ବାଂଲାଦେଶ ସରକାର ନିଜ ଦେଶ ପାଇଁ ଅଧିକ ଜଳ ଦାବି କରୁଛନ୍ତି। ୧୯୭୭ ଚୁକ୍ତିରେ ଥିବା ସର୍ବନିମ୍ନ ଜଳ ଗ୍ୟାରେଣ୍ଟି ବ୍ୟବସ୍ଥା ପୁଣି ଲାଗୁ କରିବାକୁ ଢାକା ଚାହୁଁଛି। NCP ନେତା ନାହିଦ୍ ଇସଲାମ ଚେତାବନୀ ଦେଇଛନ୍ତି, ବାଂଲାଦେଶକୁ ଉଚିତ ଜଳ ନମିଳିଲେ ଭାରତୀୟ ସାମଗ୍ରୀ ପରିବହନ ପାଇଁ ଟ୍ରାଞ୍ଜିଟ୍ ସୁବିଧା ଦିଆଯିବ ନାହିଁ। ଆବଶ୍ୟକ ପଡ଼ିଲେ ପୁଣି ଫରକ୍କା ଲଙ୍ଗ ମାର୍ଚ୍ଚ କରାଯିବ ବୋଲି ସେ କହିଛନ୍ତି।
ଅକ୍ଟୋବର ୨୬ରେ ବାଂଲାଦେଶ ପ୍ରଧାନମନ୍ତ୍ରୀ ତାରିକ୍ ରହମାନଙ୍କ ଜାପାନ ଗସ୍ତ ସମୟରେ ଦୁଇ ଦେଶ ଶିଳ୍ପ ଓ ଯୋଗାଯୋଗ କ୍ଷେତ୍ରରେ ସହଯୋଗ ବଢ଼ାଇବାକୁ ସହମତ ହୋଇଥିଲେ। ଏହା ଅଧୀନରେ ମାତାରବାଡ଼ି ଗଭୀର ସମୁଦ୍ର ବନ୍ଦରକୁ ଗୁରୁତ୍ୱ ଦିଆଯାଇଛି। ଜାପାନର ଅନ୍ୟ ଏକ ପ୍ରସ୍ତାବ ଅନୁସାରେ ବାଂଲାଦେଶ ଦେଇ ଭାରତର ଉତ୍ତର-ପୂର୍ବର ସାତଟି ରାଜ୍ୟକୁ ବଙ୍ଗୋପସାଗର ସହ ଯୋଡ଼ିବାର ଯୋଜନା ରହିଛି। ଏହାକୁ ନେଇ NCP ଓ ଜମାତ-ଏ-ଇସଲାମୀ ସରକାରଙ୍କୁ ଘେରିଛନ୍ତି। ଭାରତକୁ ବେଆଇନ କରିଡର ଦେବାକୁ ଉଦ୍ୟମ ହେଉଥିବା ନାହିଦ୍ ଅଭିଯୋଗ କରିଛନ୍ତି।
ବାଂଲାଦେଶର ପୋଷାକ ଶିଳ୍ପରେ ମଧ୍ୟ ଶ୍ରମିକ ଆନ୍ଦୋଳନ ତୀବ୍ର ହୋଇଛି। ଦରମା ବୃଦ୍ଧି ଦାବିରେ ରାସ୍ତା ଅବରୋଧ ଓ ହିଂସା ଘଟଣା ଜାରି ରହିଛି। ନଭେମ୍ବର ୩ ସୁଦ୍ଧା ପ୍ରାୟ ୬୯୦ଟି ପୋଷାକ କାରଖାନା ଉତ୍ପାଦନ ବନ୍ଦ କରିଥିବା ରିପୋର୍ଟ ହୋଇଛି। ୨୦୨୫-୨୬ ଆର୍ଥିକ ବର୍ଷରେ ଦେଶର GDP ଅଭିବୃଦ୍ଧି ୩.୪% ରହିବ ବୋଲି ବିଶ୍ୱବ୍ୟାଙ୍କ ଆକଳନ କରିଛି। ଏହି ଅଶାନ୍ତି ପଛରେ ସୀମାପାର ଷଡ଼ଯନ୍ତ୍ର ଥିବା ନେଇ ବାଂଲାଦେଶର କିଛି ଅଧିକାରୀ ଅଭିଯୋଗ କରିଛନ୍ତି।
ଅନ୍ୟପଟେ ଭାରତରେ ରହୁଥିବା ଶେଖ୍ ହସିନା ଡିସେମ୍ବରରେ ବାଂଲାଦେଶ ଫେରିବେ ବୋଲି ଅଗଷ୍ଟରେ ଘୋଷଣା କରିଥିଲେ। ତାଙ୍କ ଅନୁପସ୍ଥିତିରେ ବାଂଲାଦେଶର ଅନ୍ତର୍ଜାତୀୟ ଅପରାଧ ଟ୍ରିବ୍ୟୁନାଲ ତାଙ୍କୁ ମାନବତା ବିରୋଧୀ ଅପରାଧ ମାମଲାରେ ମୃତ୍ୟୁଦଣ୍ଡ ଶୁଣାଇଛି। ତାଙ୍କ ପ୍ରତ୍ୟାବର୍ତ୍ତନକୁ ନେଇ NCP ନେତାମାନେ ପୁଣି ଥରେ ଯୁବପିଢ଼ିଙ୍କୁ ଏକାଠି ହେବାକୁ ଆହ୍ୱାନ ଦେଇଛନ୍ତି।
ଏଭଳି ସ୍ଥିତିରେ ଗଙ୍ଗା ଜଳ ବିବାଦ, ଆର୍ଥିକ ସଙ୍କଟ, ଭାରତ ବିରୋଧୀ ରାଜନୀତି ଓ ହସିନାଙ୍କ ପ୍ରତ୍ୟାବର୍ତ୍ତନ ଚର୍ଚ୍ଚା ତାରିକ୍ ରହମାନ ସରକାରଙ୍କ ପାଇଁ ବଡ଼ ଚ୍ୟାଲେଞ୍ଜ ହୋଇଛି। ଏବେ ସବୁଠାରୁ ବଡ଼ ପ୍ରଶ୍ନ, ତାରିକ୍ ରହମାନ କ’ଣ ଭାରତ ସହ ସମ୍ପର୍କକୁ ଅଧିକ ତିକ୍ତ ହେବାରୁ ରୋକିପାରିବେ?