ପୁରୀ: ଶ୍ରୀମନ୍ଦିର ଭିତରେ ଭକ୍ତଙ୍କ ସୁଗମ ଏବଂ ଶୃଙ୍ଖଳିତ ଦର୍ଶନ ବ୍ୟବସ୍ଥାକୁ ନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ ଏକ ଗୁରୁତ୍ୱପୂର୍ଣ୍ଣ ସୂଚନା ପ୍ରଦାନ କରିଛନ୍ତି। ନାଟ ମଣ୍ଡପରେ ଶୃଙ୍ଖଳିତ ଦର୍ଶନ ବ୍ୟବସ୍ଥା ଲାଗୁ କରିବା ପ୍ରଶାସନ ପାଇଁ ସବୁଠାରୁ ଗୁରୁତ୍ୱପୂର୍ଣ୍ଣ ବୋଲି ସେ ସ୍ପଷ୍ଟ କରିଛନ୍ତି। ଶ୍ରୀମନ୍ଦିର ଭିତରେ ଭକ୍ତମାନଙ୍କ ପାଇଁ ରାମ୍ପ୍ (Ramp) ମାଧ୍ୟମରେ ଧାଡ଼ି ଦର୍ଶନ ବ୍ୟବସ୍ଥା କରିବା ନେଇ ପ୍ରଶାସନ ପକ୍ଷରୁ ପଦକ୍ଷେପ ନିଆଯାଉଛି।
ଏହି ନୂତନ ଦର୍ଶନ ବ୍ୟବସ୍ଥାର ଏକ ପ୍ରାଥମିକ ରୂପରେଖ ପ୍ରସ୍ତୁତ ହୋଇସାରିଛି। ସେବାୟତ ପ୍ରତିନିଧି ଏବଂ ଟେକ୍ନିକାଲ କମିଟି ସଦସ୍ୟମାନେ ଏହାର ଅନୁଧ୍ୟାନ କରିଛନ୍ତି। ପ୍ରସ୍ତୁତ ହୋଇଥିବା ରୂପରେଖରେ କିଛି ଆବଶ୍ୟକୀୟ ପରିବର୍ତ୍ତନ ଆଣିବା ପାଇଁ ସେବକ ବନ୍ଧୁମାନେ ପ୍ରଶାସନକୁ ପରାମର୍ଶ ଦେଇଛନ୍ତି। ଏହି ପରାମର୍ଶଗୁଡ଼ିକୁ ବିଚାରକୁ ନେଇ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ।
ସେହିପରି କିପରି ଶ୍ରୀମନ୍ଦିରର ପରମ୍ପରାରେ ହାନି ନ ହେବ ତାହାକୁ ଗୁରୁତ୍ବ ଦିଆଯାଇଛି। ପ୍ରଥମେ ଶୃଙ୍ଖଳିତ ଦର୍ଶନ, ଧାଡ଼ି ଦର୍ଶନର ପରୀକ୍ଷାମୂଳକ ଅନୁଧ୍ୟାନ ହେବ। କେବେଠୁ କାର୍ଯ୍ୟକାରୀ ହେବ ଏବେ କହି ହେବ ନାହିଁ। ଶ୍ରୀମନ୍ଦିର ମୁଖ୍ୟ ପ୍ରଶାସକ
ଅରବିନ୍ଦ ପାଢ଼ୀ କହିଛନ୍ତି, ପ୍ରସ୍ତାବିତ ବ୍ୟବସ୍ଥାକୁ ଚୂଡ଼ାନ୍ତ କରିବା ପାଇଁ ମନ୍ଦିର ସେବାୟତ, ଛତିଶ ନିଯୋଗର ସଦସ୍ୟ, ଶ୍ରୀ ଜଗନ୍ନାଥ ମନ୍ଦିର ପରିଚାଳନା କମିଟିର ପୂର୍ବତନ ସଦସ୍ୟ ଏବଂ ବୈଷୟିକ ବିଶେଷଜ୍ଞଙ୍କ ସମେତ ବିଭିନ୍ନ ଅଂଶୀଦାରଙ୍କ ସହ ଅନେକ ପର୍ଯ୍ୟାୟର ଆଲୋଚନା ଓ ପରାମର୍ଶ କରାଯାଇଛି।
ସେହିପରି ଏକ ପ୍ରାରମ୍ଭିକ ନକ୍ସା (blueprint) ପ୍ରସ୍ତୁତ କରାଯାଇଛି ଏବଂ ଯାଞ୍ଚ ପାଇଁ ଏକ ନମୁନା ମଡେଲ୍ ଉପସ୍ଥାପନ କରାଯାଇଛି। ସେବାୟତଙ୍କ ପ୍ରତିନିଧିମାନେ ଘଟଣାସ୍ଥଳ ପରିଦର୍ଶନ କରି ଏହି ମଡେଲକୁ ଯାଞ୍ଚ କରିଥିଲେ, ଅନ୍ୟପକ୍ଷରେ ବୈଷୟିକ କମିଟିର ସଦସ୍ୟମାନେ ମଧ୍ୟ ପ୍ରସ୍ତାବକୁ ସମୀକ୍ଷା କରି କିଛି ପରିବର୍ତ୍ତନ ପାଇଁ ପରାମର୍ଶ ଦେଇଥିଲେ। ଏହି ପ୍ରକଳ୍ପ ରାଜ୍ୟ ସରକାରଙ୍କ ଆର୍ଥିକ ସହାୟତାରେ ‘ଓଡ଼ିଶା ବ୍ରିଜ୍ ଆଣ୍ଡ କନଷ୍ଟ୍ରକ୍ସନ୍ କର୍ପୋରେସନ୍ ଲିମିଟେଡ୍’ (OBCC) ମାଧ୍ୟମରେ କାର୍ଯ୍ୟକାରୀ କରାଯାଉଛି। ଆଇଆଇଟି (IIT) ଭୁବନେଶ୍ୱରର ବୈଷୟିକ ବିଶେଷଜ୍ଞଙ୍କ ସହ ମଧ୍ୟ ପରାମର୍ଶ କରାଯାଇଥିଲା ଏବଂ ସେମାନଙ୍କ ମତାମତ ଆଧାରରେ ଏକ ନକ୍ସା ପ୍ରସ୍ତୁତ କରାଯାଇଛି ବୋଲି କହିଛନ୍ତି ଅରବିନ୍ଦ ପାଢୀ।
ମନ୍ଦିରର ପାରମ୍ପରିକ ରୀତିନୀତିର ପବିତ୍ରତା ବଜାୟ ରଖିବା ଉପରେ ଗୁରୁତ୍ୱାରୋପ କରି ଅରବିନ୍ଦ ପାଢ଼ୀ କହିଛନ୍ତି ଯେ, ପ୍ରସ୍ତାବିତ ବ୍ୟବସ୍ଥା ଯେପରି ଭୋଗ ମଣ୍ଡପରେ ସେବାୟତଙ୍କ ଦ୍ୱାରା କରାଯାଉଥିବା ନୀତିକାନ୍ତି କିମ୍ବା ଅନ୍ୟ କୌଣସି ଧାର୍ମିକ କାର୍ଯ୍ୟକ୍ରମରେ ବାଧା ସୃଷ୍ଟି ନ କରେ, ତାହା ଦେଖିବାକୁ ହେବ। ସେହିପରି ଶ୍ରୀ ଜଗନ୍ନାଥ ମନ୍ଦିର ପ୍ରଶାସନ (SJTA) ସେବାୟତମାନଙ୍କଠାରୁ ମିଳିଥିବା ପରାମର୍ଶଗୁଡ଼ିକୁ ଗ୍ରହଣ କରାଯିବ ଏବଂ ପ୍ରସ୍ତାବିତ ରାମ୍ପ (ramp) ତଥା ଧାଡ଼ିରେ ଦର୍ଶନ ବ୍ୟବସ୍ଥାରେ ଆବଶ୍ୟକୀୟ ପରିବର୍ତ୍ତନ ଅଣାଯିବ।