ଚାଲୁ ଚାଲୁ ହଠାତ୍ ଅଚେତ ହୋଇ ପଡିଲେ ପୂର୍ବତନ ଉପରାଷ୍ଟ୍ରପତି ଜଗଦୀପ ଧନଖଡ଼: ଦିଲ୍ଲୀ ଏମ୍ସରେ ଭର୍ତ୍ତି

ନୂଆଦିଲ୍ଲୀ: ଭାରତର ପୂର୍ବତନ ଉପରାଷ୍ଟ୍ରପତି ଜଗଦୀପ ଧନଖଡ଼ ଆଜି ସକାଳେ ମର୍ଣ୍ଣିଂ ୱାକ୍ ସମୟରେ ହଠାତ୍ ଅଚେତ ହୋଇ ତଳେ ପଡ଼ିଯିବା ପରେ ତାଙ୍କୁ ନୂଆଦିଲ୍ଲୀସ୍ଥିତ AIIMS ହସ୍ପିଟାଲରେ ଭର୍ତ୍ତି କରାଯାଇଛି। ୭୫ ବର୍ଷୀୟ ଧନଖଡ଼ଙ୍କୁ ବର୍ତ୍ତମାନ ହସ୍ପିଟାଲର କାର୍ଡିଓ-ନ୍ୟୁରୋ ସେଣ୍ଟରରେ ଭର୍ତ୍ତି କରାଯାଇ କାର୍ଡିଓଲୋଜି ବିଭାଗର ଡାକ୍ତରଙ୍କ ତତ୍ତ୍ୱାବଧାନରେ ଚିକିତ୍ସା କରାଯାଉଛି।

ସୂଚନା ଅନୁସାରେ, ବୁଧବାର ସକାଳେ ମର୍ଣ୍ଣିଂ ୱାକ୍ ସମୟରେ ସେ ହଠାତ୍ ଅଚେତ ହୋଇ ପଡ଼ିଯାଇଥିଲେ ଏବଂ କିଛି ମିନିଟ୍ ପର୍ଯ୍ୟନ୍ତ ଚେତାଶୂନ୍ୟ ଅବସ୍ଥାରେ ରହିଥିଲେ। ତାଙ୍କ ସୁରକ୍ଷା କର୍ମୀମାନେ ତୁରନ୍ତ ତାଙ୍କୁ ଏକ ପିସିଆର୍ (PCR) ଗାଡ଼ିରେ ଘରକୁ ନେଇଥିଲେ। ଘରେ ILBSର ଏକ ମେଡିକାଲ୍ ଟିମ୍ ଏବଂ AIIMSର ଡାକ୍ତର ସନ୍ଦୀପ ସେଠ୍ ତାଙ୍କର ପ୍ରାଥମିକ ଚିକିତ୍ସା କରିଥିଲେ। ତେବେ ତାଙ୍କ ସ୍ୱାସ୍ଥ୍ୟାବସ୍ଥା ଚିନ୍ତାଜନକ ଥିବାରୁ ତାଙ୍କୁ ତୁରନ୍ତ ଆମ୍ବୁଲାନ୍ସ ଯୋଗେ AIIMS ନୂଆଦିଲ୍ଲୀକୁ ସ୍ଥାନାନ୍ତର କରାଯାଇଥିଲା।

ତାଙ୍କର ସ୍ୱାସ୍ଥ୍ୟ ପରୀକ୍ଷା ଓ ଚିକିତ୍ସା ଚାଲିଥିବା ବେଳେ ହସ୍ପିଟାଲ କର୍ତ୍ତୃପକ୍ଷଙ୍କ ପକ୍ଷରୁ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ହେଲଥ୍ ବୁଲେଟିନ୍ ଜାରି କରାଯାଇ ନାହିଁ। ଜଗଦୀପ ଧନଖଡ଼ ଗତ ଦୁଇ ବର୍ଷ ମଧ୍ୟରେ ଏକାଧିକ ଥର ଅଚେତ ହୋଇପଡ଼ିବା ଭଳି ସ୍ୱାସ୍ଥ୍ୟ ସମସ୍ୟାର ସମ୍ମୁଖୀନ ହୋଇଛନ୍ତି। ୨୦୨୫ ମାର୍ଚ୍ଚ ମାସରେ ଛାତିରେ ଯନ୍ତ୍ରଣା ହେବାରୁ ତାଙ୍କର ଆଞ୍ଜିଓପ୍ଲାଷ୍ଟି କରାଯାଇଥିଲା। ଏହାପରେ ୨୦୨୫ ଜୁନରେ ନୈନିତାଲ ଗସ୍ତ ସମୟରେ ଏବଂ ଚଳିତ ବର୍ଷ ଜାନୁଆରୀ ମାସରେ ମଧ୍ୟ ସେ ଘରେ ଅଚେତ ହୋଇପଡ଼ିଥିଲେ। ସ୍ୱାସ୍ଥ୍ୟଗତ କାରଣ ଦର୍ଶାଇ ସେ ୨୦୨୫ ଜୁଲାଇ ୨୧ ତାରିଖରେ ଉପରାଷ୍ଟ୍ରପତି ପଦରୁ ଇସ୍ତଫା ଦେଇଥିଲେ।