Latest Odisha News

BREAKING NEWS

Cyclone Akvan: ପାଗ ଦେଖି ପୁରୀ ଆସିବାକୁ ନିବେଦନ କଲେ SJTA

ପୁରୀ: ଓଡ଼ିଶା ଉପକୂଳ ଆଡ଼କୁ ମାଡ଼ି ଆସୁଥିବା ଭୀଷଣ ବାତ୍ୟା ‘ଅକୱାନ’କୁ ଦୃଷ୍ଟିରେ ରଖି ଶ୍ରୀ ଜଗନ୍ନାଥ ମନ୍ଦିର ପ୍ରଶାସନ (SJTA) ର ମୁଖ୍ୟ ପ୍ରଶାସକ ଡ. ଅରବିନ୍ଦ କୁମାର ପାଢ଼ୀ ଭକ୍ତମାନଙ୍କୁ ପାଗର ସ୍ଥିତି ଏବଂ ସରକାରୀ ପରାମର୍ଶବଳୀକୁ ବିଚାରକୁ ନେଇ ନିଜର ଯାତ୍ରା ଯୋଜନା କରିବାକୁ ଅନୁରୋଧ କରିଛନ୍ତି।

‘ଏକ୍ସ’ରେ ଏକ ପୋଷ୍ଟ ମାଧ୍ୟମରେ ଡ. ପାଢ଼ୀ କହିଛନ୍ତି, “ଆମେ ସମସ୍ତ ଭକ୍ତଙ୍କୁ ନମ୍ର ଅନୁରୋଧ କରୁଛୁ ଯେ, ଭୀଷଣ ବାତ୍ୟା ଅକୱାନ ଯୋଗୁଁ ସୃଷ୍ଟି ହୋଇଥିବା ପାଗର ସ୍ଥିତି ଏବଂ ସରକାରୀ ପରାମର୍ଶାବଳୀକୁ ଦୃଷ୍ଟିରେ ରଖି ଆପଣମାନେ ଶ୍ରୀମନ୍ଦିର ଦର୍ଶନ ପାଇଁ ଯୋଜନା କରନ୍ତୁ। ମହାପ୍ରଭୁ ଶ୍ରୀ ଜଗନ୍ନାଥ ଆମ ସମସ୍ତଙ୍କୁ ରକ୍ଷା କରନ୍ତୁ ଏବଂ ଆଶୀର୍ବାଦ ପ୍ରଦାନ କରନ୍ତୁ!”

ଉଲ୍ଲେଖଯୋଗ୍ୟ, ଭାରତୀୟ ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ, ବାତ୍ୟା ‘ଅକୱାନ’ ନଭେମ୍ବର ୨୦ ତାରିଖ ମଧ୍ୟାହ୍ନ ସୁଦ୍ଧା ଉତ୍ତର ଆନ୍ଧ୍ରପ୍ରଦେଶ ଏବଂ ଦକ୍ଷିଣ ଓଡ଼ିଶା ଉପକୂଳ ଅତିକ୍ରମ କରିପାରେ। ଏହା ନରସାପୁର ଓ ପୁରୀ ମଧ୍ୟରେ ଗୋପାଳପୁରର ପୂର୍ବ ଦିଗ ନିକଟରେ ଉପକୂଳ ଛୁଇଁବାର ସମ୍ଭାବନା ରହିଛି। ଏହି ସମୟରେ ପବନର ବେଗ ଘଣ୍ଟା ପ୍ରତି ୯୦ ରୁ ୧୦୦ କିଲୋମିଟର ରହିପାରେ, ଯାହା ଝଟକା ଘଣ୍ଟା ପ୍ରତି ୧୧୦ କିଲୋମିଟର ପର୍ଯ୍ୟନ୍ତ ବୃଦ୍ଧି ପାଇପାରେ।

ଏଥିଯୋଗୁ ପୁରୀରେ ପ୍ରବଳ ବର୍ଷା ଏବଂ ଜୋରଦାର ପବନ ହେବାର ସମ୍ଭାବନା ଥିବାରୁ ମନ୍ଦିର ପ୍ରଶାସନ ଭକ୍ତମାନଙ୍କୁ ପାଣିପାଗ ସମ୍ବନ୍ଧୀୟ ଚେତାବନୀକୁ ଅଣଦେଖା ନ କରିବାକୁ ଏବଂ ଜିଲ୍ଲା ପ୍ରଶାସନ ତଥା ରାଜ୍ୟ ସରକାରଙ୍କ ଦ୍ୱାରା ଜାରି କରାଯାଇଥିବା ପରାମର୍ଶକୁ ପାଳନ କରିବାକୁ କୁହାଯାଇଛି।

Leave A Reply

Your email address will not be published.