ହଜାରେ ଟପିଲା କୋଭିଡ୍ ଆକ୍ରାନ୍ତଙ୍କ ସଂଖ୍ୟା: ସବୁଠୁ ବେଶୀ କେରଳରେ…

ନୂଆଦିଲ୍ଲୀ: ଦୀର୍ଘ ଅଢେଇ ବର୍ଷର ବ୍ୟବଧାନ ପରେ ପୁଣି ଦେଶରେ ମୁଣ୍ତ ଟେକିଛି କୋଭିଡ୍ । ଦିନକୁ ଦିନକୁ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଛି । ଏହାରି ଭିତରେ ଆଜି ଦେଶରେ କୋଭିଡ୍ ଆକ୍ରାନ୍ତଙ୍କ ସଂଖ୍ୟା ହଜାର ଟପିଛି । ସାରା ଦେଶରେ କୋଭିଡ-୧୯ ମାମଲା ଦ୍ରୁତ ଗତିରେ ବୃଦ୍ଧି ପାଉଥିବା ବେଳେ ରିପୋର୍ଟ ଅନୁସାରେ, ସାରା ଦେଶରେ ଏପର୍ଯ୍ୟନ୍ତ ୧୦୦୦ ରୁ ଅଧିକ ମାମଲା ରିପୋର୍ଟ ହୋଇଛି । ଆଜି ସକାଳ ୮ଟା ସୁଦ୍ଧା ଆକ୍ରାନ୍ତଙ୍କ ସଂଖ୍ୟା ୧୦୦୯ ଛୁଇଁଛି । ଯେଉଁଥିରୁ ଗତ ସପ୍ତାହ ମଧ୍ୟରେ ୭୫୨ ଟି ମାମଲା ସମ୍ପ୍ରତି ନିଶ୍ଚିତ ହୋଇଛି । ଏଥିମଧ୍ୟରୁ ସର୍ବାଧିକ ଆକ୍ରାନ୍ତ କେରଳରୁ ହିଁ ଚିହ୍ନଟ ହୋଇଛନ୍ତି ।  କେରଳରେ ଏପର୍ଯ୍ୟନ୍ତ ମୋଟ ୪୩୦ଟି  ସକ୍ରିୟ ମାମଲା ପଞ୍ଜିକୃତ ହୋଇଛି।

ସେହି ସମୟରେ, ମହାରାଷ୍ଟ୍ରରେ ୨୦୯, ଦିଲ୍ଲୀରେ ୧୦୪, ୟୁପିରେ ୧୫, ପଶ୍ଚିମବଙ୍ଗରେ ୧୨, ଗୁଜରାଟରେ ୮୩ ଏବଂ କର୍ଣ୍ଣାଟକରେ ୪୭ ଟି ସକ୍ରିୟ ମାମଲା ପଞ୍ଜିକୃତ ହୋଇଛି। ତେବେ ଦିଲ୍ଲୀରେ ଗୋଟିଏ ସପ୍ତାହ ମଧ୍ୟରେ ୯୯ ଟି ମାମଲା ରିପୋର୍ଟ ହୋଇଛି । ଯାହାକୁ ନେଇ ପୁଣି ଲୋକଙ୍କ ମଧ୍ୟରେ କରୋନା ଭାଇରସକୁ ନେଇ ଭୟର ବାତାବରଣ ସୃଷ୍ଟି ହେଉଛି। ମହାରାଷ୍ଟ୍ରରେ କୋଭିଡ୍-୧୯ ଯୋଗୁଁ ୪ ଜଣ, କେରଳରେ ୨ ଜଣ ଏବଂ କର୍ଣ୍ଣାଟକରେ ଜଣଙ୍କର ମୃତ୍ୟୁ  ହୋଇଥିବା ରିପୋର୍ଟ ସାମ୍ନାକୁ ଆସିଛି । ହେଲେ ଏପର୍ଯ୍ୟନ୍ତ ନିଶ୍ଚିତ ହୋଇନାହିଁ।

ଅନ୍ୟପକ୍ଷରେ, ଆଣ୍ଡାମାନ ଏବଂ ନିକୋବର, ଅରୁଣାଚଳ ପ୍ରଦେଶ, ଆସାମ, ବିହାର, ହିମାଚଳ ପ୍ରଦେଶ, ଜମ୍ମୁ ଏବଂ କଶ୍ମୀର ଇତ୍ୟାଦି କିଛି ରାଜ୍ୟରେ ବର୍ତ୍ତମାନ କୋଭିଡ-୧୯ର କୌଣସି ସକ୍ରିୟ ମାମଲା ନାହିଁ।

ତେବେ ରାଜଧାନୀରେ ବଢ଼ୁଥିବା କରୋନା ମାମଲାକୁ ଦୃଷ୍ଟିରେ ରଖି, ଦିଲ୍ଲୀ ସରକାର କିଛି ଦିନ ପୂର୍ବେ ଏକ ସ୍ୱତନ୍ତ୍ର ପରାମର୍ଶ ଜାରି କରିଛନ୍ତି। ଏବେ ସମସ୍ତ ଡାକ୍ତରଖାନାକୁ ସତର୍କ ରଖାଯାଇଛି। ଦିଲ୍ଲୀ ସରକାର ନିର୍ଦ୍ଦେଶ ଦେଇଛନ୍ତି ଯେ ପ୍ରତ୍ୟେକ ହସ୍ପିଟାଲ କୋଭିଡ୍‌ର ମୁକାବିଲା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ରହିବା ଉଚିତ। ଏହା ସହିତ, ସମସ୍ତ ପଜିଟିଭ୍ ନମୁନାକୁ ଜିନୋମ୍ ସିକୋଏନ୍ସିଙ୍ଗ ପାଇଁ ଲୋକ ନାୟକ ହସ୍ପିଟାଲକୁ ପଠାଇବାକୁ ନିର୍ଦ୍ଦେଶ ଦିଆଯାଇଛି ଏବଂ ଦିଲ୍ଲୀ ରାଜ୍ୟ ସ୍ୱାସ୍ଥ୍ୟ ପୋର୍ଟାଲ୍ ଏବଂ IHIP ପ୍ଲାଟଫର୍ମରେ ଦୈନିକ ରିପୋର୍ଟିଂକୁ ଏବେ ବାଧ୍ୟତାମୂଳକ କରାଯାଇଛି। ସ୍ୱାସ୍ଥ୍ୟ ବିଭାଗ ସ୍ପଷ୍ଟ ଭାବରେ କହିଛି ଯେ ମାସ୍କ ପିନ୍ଧିବା, ସାମାଜିକ ଦୂରତା ବଜାୟ ରଖିବା ଏବଂ ହାତ ସଫା କରିବା ଏବେ ପୁଣି ଥରେ ଜରୁରୀ ।

କେନ୍ଦ୍ର ସରକାରଙ୍କ ଏକ ସଂସ୍ଥା, ଇଣ୍ଡିଆନ୍ SARS-CoV-2 ଜେନୋମିକ୍ସ କନସୋର୍ଟିୟମ୍ (ଇନସାକୋଗ୍)ର ସଦ୍ୟତମ ତଥ୍ୟ ଅନୁଯାୟୀ, ଅନେକ ସହରରେ ନୂତନ କୋଭିଡ୍-୧୯ ସଂକ୍ରମଣ ବୃଦ୍ଧି ପାଉଥିବାବେଳେ, ଦେଶରେ ଦୁଇଟି ନୂତନ ପ୍ରକାର – NB.1.8.1 ଏବଂ LF.7 -ର ମାମଲା ଚିହ୍ନଟ ହୋଇଛି।

ବର୍ତ୍ତମାନ ସୁଦ୍ଧା, ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଉଭୟ LF.7 ଏବଂ NB.1.8 କୁ ଚିନ୍ତାର ପ୍ରକାର କିମ୍ବା ଆଗ୍ରହର ପ୍ରକାର ଭାବରେ ନୁହେଁ, ବରଂ ମନିଟରିଂ ଅଧୀନରେ ଥିବା ପ୍ରକାର ଭାବରେ ବର୍ଗୀକୃତ କରିଛି।