ମଙ୍ଗଳବାର ନବୀନଙ୍କ ବକ୍ତବ୍ୟ, ବୁଧବାର ବିଜେଡି ନେତାଙ୍କ ବୟାନ ମେଣ୍ଟ ସମ୍ଭାବନାକୁ ଦେଲା ସବୁଜ ସଙ୍କେତ!

ଭୁବନେଶ୍ୱର: ଓଡ଼ିଶାରେ ଭାରତୀୟ ଜନତା ପାର୍ଟି (ବିଜେପି) ସହ ସମ୍ଭାବ୍ୟ ମେଣ୍ଟ ନେଇ ବିଜୁ ଜନତା ଦଳ ସଙ୍କେତ ଦେଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ବରେ ବିଜେଡି ରାଜ୍ୟର ବିକାଶ ପାଇଁ ପ୍ରତିଶ୍ରୁତିବଦ୍ଧତା ଉପରେ ଗୁରୁତ୍ୱାରୋପ କରିବା ସହ ଯେ କୌଣସି ନିଷ୍ପତ୍ତି ଓଡ଼ିଶାର ସ୍ୱାର୍ଥକୁ ପ୍ରାଥମିକତା ଦେବ ବୋଲି ପ୍ରତିଶ୍ରୁତି ଦେଇଛନ୍ତି।

ଭୁବନେଶ୍ୱରରେ ଏକ ବିସ୍ତୃତ ବୈଠକରେ ବରିଷ୍ଠ ବିଜେଡି ନେତା ଦେବୀ ପ୍ରସାଦ ମିଶ୍ର କହିଛନ୍ତି, ଆଜି ମୁଖ୍ୟମନ୍ତ୍ରୀଙ୍କ ନେତୃତ୍ୱରେ ବିଭିନ୍ନ ପ୍ରସଙ୍ଗରେ ଆଲୋଚନା ହୋଇଛି। ଓଡ଼ିଶା ବିକାଶର ପରବର୍ତ୍ତୀ ପର୍ଯ୍ୟାୟ ପାଇଁ ପ୍ରସ୍ତୁତ ଏବଂ ନବୀନ ପଟ୍ଟନାୟକଙ୍କ ନେତୃତ୍ୱାଧୀନ ସରକାର ଏ ଦିଗରେ ସକ୍ରିୟ ଭାବେ କାର୍ଯ୍ୟ କରୁଛନ୍ତି।

ଓଡ଼ିଶା ଏକ ରାଜ୍ୟ ଭାବେ ଶତବାର୍ଷିକୀ ପାଳନ କରୁଥିବା ବେଳେ ଉଭୟ ବିଜେଡି ଓ ମୁଖ୍ୟମନ୍ତ୍ରୀ ପଟ୍ଟନାୟକଙ୍କ ପାଖରେ ଅନେକ ମାଇଲଖୁଣ୍ଟ ହାସଲ କରିବାର ଅଛି। ଓଡ଼ିଶାର ନାଗରିକ ଓ ରାଜ୍ୟର କଲ୍ୟାଣ ପାଇଁ ନିରବଚ୍ଛିନ୍ନ ଭାବେ କାର୍ଯ୍ୟ କରିବାକୁ ବିଜୁ ଜନତା ଦଳ ପ୍ରତିଶ୍ରୁତି ଦେଇଛି।

ବିଜେଡିର ଆଉ ଜଣେ ବରିଷ୍ଠ ନେତା ଅରୁଣ ସାହୁ ଏଭଳି ମତ ବ୍ୟକ୍ତ କରି ରାଜ୍ୟର ସର୍ବୋତ୍ତମ ସ୍ୱାର୍ଥକୁ ଦୃଷ୍ଟିରେ ରଖି ନିଷ୍ପତ୍ତି ନିଆଯିବ ବୋଲି କହିଛନ୍ତି। ଆଲୋଚନା ଜାରି ରହିଥିବା ବେଳେ ବିଜେଡି ନିଜର ମୂଳ ମୂଲ୍ୟବୋଧ ଓ ଓଡ଼ିଶାର କଲ୍ୟାଣ ପାଇଁ ପ୍ରତିଶ୍ରୁତିବଦ୍ଧ ରହିଛି।

କହିରଖୁଛୁ, ଗତକାଲି ପ୍ରଧାନମନ୍ତ୍ରୀଙ୍କ ସଭାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଥିଲେ, ରାଜ୍ୟର ବିକାଶରେ କେନ୍ଦ୍ର ସରକାରଙ୍କ ଭୂମିକା ରହିଛି। ଏପରି କହି ସେ କେନ୍ଦ୍ର ସରକାରଙ୍କୁ ପ୍ରଶଂସା କରିଥିଲେ। ସେହିପରି ମୋଦୀ ମଧ୍ଯ ନବୀନଙ୍କୁ ଲୋକପ୍ରିୟ ମୁଖ୍ୟମନ୍ତ୍ରୀ ବୋଲି କହିଥିଲେ।

ଅନ୍ୟପକ୍ଷରେ ବିଜେପିର ବରିଷ୍ଠ ନେତା ଜୁଏଲ ଓରାମ କହିଛନ୍ତି ଯେ, ନୂଆଦିଲ୍ଲୀରେ ଦଳର କୋର କମିଟି ବୈଠକରେ ବିଜେଡି ସହ ମେଣ୍ଟ ନେଇ ଆଲୋଚନା ହୋଇଥିଲା। ଶେଷରେ ବିଜେପିର କେନ୍ଦ୍ରୀୟ ନେତୃତ୍ୱ ଏହି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ନିଷ୍ପତ୍ତି ନେବେ।

ଆଗାମୀ ନିର୍ବାଚନ ପାଇଁ ଉଭୟ ଦଳ ରଣନୀତି ପ୍ରସ୍ତୁତ କରୁଥିବାବେଳେ ଓଡ଼ିଶାର ରାଜନୈତିକ ଦୃଶ୍ୟପଟ୍ଟ ଗତିଶୀଳ ରହିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ମଧ୍ୟରେ ବନ୍ଧୁତ୍ୱ ସ୍ପଷ୍ଟ ହେବା ପରେ ସମସ୍ତଙ୍କ ନଜର ସାମ୍ନାକୁ ଆସୁଛି ।