ଆଲକେମିଷ୍ଟ
ମୂଳ ପର୍ତ୍ତୁଗୀଜ: ପାଉଲୋ କୋଏଲୋ
ଓଡ଼ିଆ: ସୋମେଶ ମହାପାତ୍ର, ମନୀଷା ମିଶ୍ର
ପ୍ରକାଶକ: ମଂଜୁଳ ପବ୍ଲିଶିଂ ହାଉସ୍,
ଉଷାପ୍ରୀତ କମ୍ପେ୍ଲକ୍ସ,୪୨ ମାଲବ୍ୟ ନଗର,
ଭୋପାଳ
ପୃଷ୍ଠା: ୧୭୬
ମୂଲ୍ୟ: ୨୫୦ ଟଙ୍କା
ବିଶ୍ୱର ସମସାମୟିକ ବହୁଚର୍ଚ୍ଚିତ ଉପନ୍ୟାସମାନଙ୍କ ମଧ୍ୟରୁ ‘ଦି ଆଲକେମିଷ୍ଟ’ ଅନ୍ୟତମ । ୧୯୮୮ ମସିହାରେ ପ୍ରଥମେ ପ୍ରକାଶ ପାଇବା ପରଠାରୁ ଏପର୍ଯ୍ୟନ୍ତ ଏହାର ଲୋକପ୍ରିୟତାକୁ ନେଇ ଯେତିକି ଜନଶ୍ରୁତି ରହିଛି ଏହାର ସଫଳତାକୁ ନେଇ ସେତିକି ନୂଆ ନୂଆ କଥା ଶୁଣିବାକୁ ମିଳେ । ତେବେ ସଂକ୍ଷେପରେ ଏତିକି କହିହେବ ଯେ ଏପର୍ଯ୍ୟନ୍ତ ସର୍ବାଧିକ ଭାଷାରେ ଅନୂଦିତ ହୋଇଥିବା ଯେକୌଣସି ଉପନ୍ୟାସ ତାଲିକାରେ ଏହା ସର୍ବାଗ୍ରେ ରହିଛି । ପାଠକୀୟ ଆଦୃତିର ଶୀର୍ଷରେ ରହି ଏପର୍ଯ୍ୟନ୍ତ ଏହାର ପ୍ରାୟ ଆଠ କୋଟିରୁ ଅଧିକ କପି ବିକ୍ରି ସରିଛି । ତେବେ ପ୍ରଶ୍ନ ଉଠେ, କଳେବର ଦୃଷ୍ଟିରୁ ଏଡ଼େ କ୍ଷୁଦ୍ର ଉପନ୍ୟାସଟି ଭିତରେ କ’ଣ ରହସ୍ୟ ରହିଛି ଯାହା ଦିନକୁ ଦିନ ଅଧିକରୁ ଅଧିକ ପାଠକଙ୍କ ହୃଦୟକୁ ଛୁଇଁ ଚାଲିଛି? ତା’ର ଉତ୍ତର ଏକାଧିକ ; ଉପନ୍ୟାସଟିର ସରଳ ଭାଷା ଓ ନିରୁତା ଭାବ ।
ଉପନ୍ୟାସଟିର କଥାବସ୍ତୁ ହେଉଛି ଜଣେ ସ୍ୱପ୍ନଦ୍ରଷ୍ଟା କିଶୋରର ସକାରାତ୍ମକ ଆକାଂକ୍ଷା , ଯାହା ତାକୁ ସ୍ପେନରୁ ସୁଦୂର ଇଜିପ୍ଟ ପର୍ଯ୍ୟନ୍ତ ନାନା କଷ୍ଟ ସ୍ୱୀକାର କରି ହାସଲ କରିବା ନିମନ୍ତେ ଉଚ୍ଚାଟିତ କରିଛି । ଉପନ୍ୟାସର ମୁଖ୍ୟ ଚରିତ୍ର ସାଣ୍ଟିଆଗୋ ଜଣେ ମେଷପାଳକ ଯିଏ ସଦାବେଳେ ସ୍ୱପ୍ନ ଦେଖନ୍ତି ଯେ ଇଜିପ୍ଟର ପିରାମିଡ଼ ତଳେ ବିପୁଳ ଗୁପ୍ତଧନ ରହିଛି ।ଏହାକୁ ହାସଲ କରିବା ନିମନ୍ତେ ତାଙ୍କର ଦୁଃସାହସିକ ଯାତ୍ରା ଓ ଯାତ୍ରା ପଥରେ ସେ ଭେଟିଥିବା ବିଭିନ୍ନ ଚରିତ୍ର ତଥା ସଙ୍କଟ ଓ ସମସ୍ୟା ତାଙ୍କୁ ଲକ୍ଷ୍ୟ ପଥରୁ ବିଚ୍ୟୁତ କରିପାରିନାହିଁ । ବରଂ, ପ୍ରତିଟି ସଙ୍କଟରୁ ସେ କିଛି ଶିକ୍ଷାଲାଭ କରି ନିଜ ମନୋବଳକୁ ଆହୁରି ଦୃଢ଼ କରିଛନ୍ତି । ସେ ପରଶମଣି ପାଇବା ଆଶାରେ ଭେଟିଛନ୍ତି ଆଲକେମିଷ୍ଟଙ୍କୁ ଯିଏ ସୀସାକୁ ସୁନାରେ ପରିଣତ କରିବାର ଉପାୟ ତାଙ୍କୁ ବତାଇ ଦେବାର ପ୍ରତିଶ୍ରୁତି ଦେଇଛନ୍ତି । ପୁଣି ଏହି ଯାତ୍ରା କାଳରେ ସେ ଭେଟିଛନ୍ତି ଫାତିମାଙ୍କୁ ଯିଏ ତାଙ୍କୁ ପ୍ରେମ କରି ବସିଛନ୍ତି ଓ ପ୍ରତୀକ୍ଷା କରି ରହିଛନ୍ତି ତାଙ୍କ ଫେରନ୍ତା ପଥକୁ । ଜ୍ଞାନ, ଦର୍ଶନ, ଉତ୍କଣ୍ଠା, ସଂଘର୍ଷ, ପ୍ରେମ, ପ୍ରତାରଣା, ବିଶ୍ୱାସ ଓ ଆସ୍ଥାରେ ଉପନ୍ୟାସଟି ମୂଳରୁ ଶେଷ ପର୍ଯ୍ୟନ୍ତ ପାଠକଙ୍କ ଉତ୍କଣ୍ଠାକୁ ଶତଗୁଣିତ କରିଥାଏ । ଲେଖକ ପାଉଲୋ କୋଏଲୋଙ୍କ ସ୍ୱୀକାରୋକ୍ତି ଅନୁସାରେ ଏହି ଉପନ୍ୟାସଟିକୁ ସେ ମାତ୍ର ଦୁଇ ସପ୍ତାହ ଭିତରେ ଲେଖି ଶେଷ କରିଥିଲେ । ତାଙ୍କ କହିବା ଅନୁସାରେ ଲେଖିବା ପୂର୍ବରୁ ତାହା ତାଙ୍କ ଆତ୍ମାରେ ଖୋଦେଇ ହୋଇ ସାରିଥିଲା ।
ସେମିତିଯେକୌଣସି ପାଠକ ଏହାକୁ ଏକା ନିଃଶ୍ୱାସକେ ପଢ଼ି ଶେଷ କରିବା ପରେ ନିଜକୁ ସାଣ୍ଟିଆଗୋ ଭଳି ଅନୁଭବ କରିବାସୁନିଶ୍ଚିତ । ଦାର୍ଶନିକ ଦୃଷ୍ଟିକୋଣରୁ କହିଲେ, ଏ ସଂସାରରେ ସମସ୍ତେ ଜଣେ ଜଣେ ସାଣ୍ଟିଆଗୋ । ଜୀବନ ହେଉଛି ଏକ ଯାତ୍ରା ଓ ସମସ୍ତେ ସେଇ ଗୁପ୍ତଧନ ଓ ପରଶମଣି ସନ୍ଧାନରେ ଥାଆନ୍ତି । ଦୃଢ଼ ଆତ୍ମବିଶ୍ୱାସର ସହ ଯାତ୍ରାରେ ସମସ୍ତଙ୍କୁ ତାହା ପ୍ରାପ୍ତ ହୋଇଥାଏ । ସେ ପ୍ରାପ୍ତି ସ୍ଥୂଳ ହୋଇଥାଉ ଅବା ସୂକ୍ଷ୍ମ । ଏହା ହିଁ ହେଉଛି ଜୀବନକୁ ବଞ୍ଚିବାର ଗୂଢ଼ ସୂତ୍ର । ସେହି ସୂତ୍ରକୁ ଯିଏ ଯେତିକି ଅନୁଭବ କରିଛି ତା’ର ଯାତ୍ରା ସେତିକି ସୁଖକର ଓ ଜୀବନ ସେତିକି ଆନନ୍ଦମୟ । କୋଏଲୋ ତାଙ୍କ ଉପନ୍ୟାସରେ ସାଣ୍ଟିଆଗୋର ଆଶା, କର୍ମ ଓ ବଚନରେ ଏହି ସତ୍ୟକୁ ହିଁ ପ୍ରକଟ କରିଛନ୍ତି । ତାଙ୍କ ଭାଷାରେ ଯେତେବେଳେ ତୁମେ ସ୍ୱଚ୍ଛ ମନରେ କିଛି ଆଶାକର, ସେତେବେଳେ ଏ ସଂସାରର ସକଳ ଦୃଶ୍ୟ ଓ ଅଦୃଶ୍ୟ ଶକ୍ତି ତୁମକୁ ତାହା ହାସଲ କରିବା ନିମନ୍ତେ ପରସ୍ପର ଭିତରେ ମନ୍ତ୍ରଣା କରିଥାନ୍ତି । ତାହା ତୁମକୁ ଅବଶ୍ୟ ପ୍ରାପ୍ତ ହୋଇଥାଏ ସାଣ୍ଟିଆଗୋର ଛଳନାହୀନ ଭାବନା, କାମନା ତାହା ହିଁ ସିଦ୍ଧ କରିଛି ।
ବିଶ୍ୱର ଶତାଧିକ ଭାଷାରେ ଅନୁଦିତ ଏହି ଉପନ୍ୟାସଟିକୁ ଓଡ଼ିଆ ପାଠକମାନଙ୍କ ନିକଟରେ ପହଞ୍ଚାଇବା ନିମନ୍ତେ ଦୁଇ ଅନୁବାଦକ (ସୋମେଶ ମହାପାତ୍ର ଓ ମନୀଷା ମିଶ୍ର) ଯେଉଁ ଶ୍ରମ ସ୍ୱୀକାର କରିଛନ୍ତି ସେଥିପାଇଁ ସେମାନେ ଅବଶ୍ୟ ଅଭିନନ୍ଦନୀୟ । ଉପନ୍ୟାସଟିର ଭାଷା ଯେତିକି ସରଳ ଅନ୍ୟ ଏକ ଭାଷାରେ ଏହାର ଭାବକୁ ବ୍ୟକ୍ତ କରିବା ସେତିକି ଦୁରୂହ କାର୍ଯ୍ୟ । କିନ୍ତୁ ଅନୁବାଦକ ଦ୍ୱୟ ସେହି ଅଗ୍ନିପରୀକ୍ଷାରେ ସଂପୂର୍ଣ୍ଣ ରୂପେ ସଫଳ ହୋଇଥିବା ପରି ମନେହୁଏ । ‘ଆଲକେମିଷ୍ଟ’ର ଓଡ଼ିଆ ସଂସ୍କରଣକୁ ପଢ଼ିଲେ ତାହା ଅନୁବାଦ ନୁହେଁ ସତେକି ଓଡ଼ିଆରେ ଲିଖିତ ଏକ ଉପନ୍ୟାସ ପରି ଲାଗେ । ସୁନ୍ଦର ପ୍ରଚ୍ଛଦଏବଂ ମୁଦ୍ରଣରେ ଏହି ପୁସ୍ତକଟି ଲକ୍ଷ ଲକ୍ଷ ଓଡ଼ିଆ ପାଠକଙ୍କ ହୃଦୟକୁ ଜିଣି ପାରିଅବ ବୋଲି ଦୃଢ଼ତାର ସହ କହିବାରେ ଦ୍ୱିଧା ନାହିଁ ।
ସୁଭାଷ ଶତପଥୀ