ନୂଆଦିଲ୍ଲୀ: ଆଜି ବାଜିବ ୫ ରାଜ୍ୟର ବିଧାନସଭା ନିର୍ବାଚନୀ ବିଗୁଲ, ତାରିଖ ଘୋଷଣା କରିବେ EC । ମଧ୍ୟପ୍ରଦେଶ, ରାଜସ୍ଥାନ, ଛତିଶଗଡ, ତେଲେଙ୍ଗାନା ଏବଂ ମିଜୋରାମରେ ବିଧାନସଭା ନିର୍ବାଚନର ତାରିଖ ଆଜି ଘୋଷଣା କରାଯିବ। ଏ ସମ୍ପର୍କରେ ନିର୍ବାଚନ ଆୟୋଗ ଆଜି ଦିନ ୧୨ଟାରେ ଏକ ସାମ୍ବାଦିକ ସମ୍ମିଳନୀ କରି ତାରିଖ ଘୋଷଣା କରିବେ ।
ସୂଚନାନୁସାରେ, ନଭେମ୍ବରର ଦ୍ୱିତୀୟ ସପ୍ତାହରୁ ଡିସେମ୍ବର ପ୍ରଥମ ସପ୍ତାହ ପର୍ଯ୍ୟନ୍ତ ବିଭିନ୍ନ ତାରିଖ ଏବଂ ପର୍ଯ୍ୟାୟରେ ଏହି ରାଜ୍ୟଗୁଡିକରେ ଭୋଟ୍ ଗ୍ରହଣ କରାଯାଇପାରେ । ଗତଥର ଭଳି ରାଜସ୍ଥାନ, ମଧ୍ୟପ୍ରଦେଶ, ମିଜୋରାମ ଏବଂ ତେଲେଙ୍ଗାନାରେ ଗୋଟିଏ ପର୍ଯ୍ୟାୟରେ ନିର୍ବାଚନ ହେବାର ସମ୍ଭାବନା ରହିଛି । ଏଥି ସହିତ ଛତିଶଗଡରେ ଦୁଇଟି ପର୍ଯ୍ୟାୟରେ ଭୋଟ୍ ଗ୍ରହଣ କରାଯାଇପାରିବ । ତେବେ ଭୋଟ୍ ତାରିଖ ଭିନ୍ନ ହେବ ବୋଲି ଆଶା କରାଯାଉଛି । କିନ୍ତୁ ଏକକାଳୀନ ସମସ୍ତ ନିର୍ବାଚନ ରାଜ୍ୟଗୁଡିକର ଭୋଟ୍ ଗଣନା କରିବାକୁ ନିଷ୍ପତ୍ତି ନିଆଯାଇପାରେ ।
୨୦୧୮ ମଧ୍ୟପ୍ରଦେଶ ବିଧାନସଭା ନିର୍ବାଚନ
ତେବେ ଚଳିତ ବର୍ଷ ଶେଷରେ ମଧ୍ୟପ୍ରଦେଶ ବିଧାନସଭା ନିର୍ବାଚନ ହେବ ବୋଲି ଆଶା କରାଯାଉଛି । ସମସ୍ତ ୨୩୦ଟି ଆସନ ପାଇଁ ନିର୍ବାଚନ ନଭେମ୍ବର ୨୦୨୩ କିମ୍ବା ତା ପୂର୍ବରୁ ଘୋଷଣା କରାଯାଇପାରେ । ରାଜ୍ୟରେ ବିଧାନସଭାର କାର୍ଯ୍ୟକାଳ ଜାନୁୟାରୀ ୬, ୨୦୨୪ ରେ ଶେଷ ହେବାକୁ ଯାଉଛି। ନଭେମ୍ବର ୨୦୧୮ ରେ ରାଜ୍ୟରେ ଶେଷ ବିଧାନସଭା ନିର୍ବାଚନ ଅନୁଷ୍ଠିତ ହୋଇଥିଲା । ସେହି ନିର୍ବାଚନରେ କଂଗ୍ରେସ ରାଜ୍ୟରେ ସରକାର ଗଠନ କରିଥିଲା ଏବଂ କମଲ ନାଥ ମୁଖ୍ୟମନ୍ତ୍ରୀ ହୋଇଥିଲେ । କିନ୍ତୁ ମାର୍ଚ୍ଚ ୨୦୨୦ ରେ ୨୨ ଜଣ ବିଧାୟକ ବିଧାନସଭାରୁ ଇସ୍ତଫା ଦେଇ ଜ୍ୟୋତିରାଦିତ୍ୟ ସିନ୍ଧିଆଙ୍କ ସହ ଭାରତୀୟ ଜନତା ପାର୍ଟିରେ ଯୋଗ ଦେଇଥିଲେ । ଏହା ପରେ ମୁଖ୍ୟମନ୍ତ୍ରୀ କମଲ ନାଥଙ୍କୁ ଇସ୍ତଫା ଦେବାକୁ ପଡ଼ିଲା । ଏହା ପରେ ରାଜ୍ୟରେ ବିଜେପି ସରକାର ଗଠନ କରିଥିଲା ଏବଂ ଶିବରାଜ ସିଂ ଚୌହାନ ମୁଖ୍ୟମନ୍ତ୍ରୀ ହୋଇଥିଲେ।
୨୦୧୮ ରାଜସ୍ଥାନ ବିଧାନସଭା ନିର୍ବାଚନ
ରାଜସ୍ଥାନ ବିଧାନସଭାର କାର୍ଯ୍ୟକାଳ ୧୪ ଜାନୁଆରୀ ୨୦୨୪ରେ ଶେଷ ହେବାକୁ ଯାଉଛି । ନଭେମ୍ବର ୨୦୨୩ରେ ରାଜ୍ୟରେ ୨୦୦ଟି ଆସନରେ ମତଦାନ ହୋଇପାରେ । ୨୦୧୮ରେ ଅନୁଷ୍ଠିତ ନିର୍ବାଚନରେ କଂଗ୍ରେସ ରାଜ୍ୟରେ ସରକାର ଗଠନ କରିଥିଲା ଏବଂ ଅଶୋକ ଗେହଲୋଟ୍ ମୁଖ୍ୟମନ୍ତ୍ରୀ ହୋଇଥିଲେ।
୨୦୧୮ ଛତିଶଗଡ ବିଧାନସଭା ନିର୍ବାଚନ
ଚଳିତ ବର୍ଷ ଶେଷରେ ଛତିଶଗଡର ୯୦ଟି ଆସନରେ ମଧ୍ୟ ନିର୍ବାଚନ ଅନୁଷ୍ଠିତ ହେବ । ଛତିଶଗଡ ବିଧାନସଭାର କାର୍ଯ୍ୟକାଳ ଜାନୁୟାରୀ ୩, ୨୦୨୪ରେ ଶେଷ ହେବ। ନଭେମ୍ବର ୨୦୧୮ରେ ଶେଷ ବିଧାନସଭା ନିର୍ବାଚନ ଅନୁଷ୍ଠିତ ହୋଇଥିଲା | ଏହି ନିର୍ବାଚନରେ କଂଗ୍ରେସ ଜିତିଥିଲା ଏବଂ ଭୁପେଶ ବାଗେଲ ରାଜ୍ୟର ମୁଖ୍ୟମନ୍ତ୍ରୀ ହୋଇଥିଲେ ।
୨୦୧୮ ତେଲେଙ୍ଗାନା ବିଧାନସଭା ନିର୍ବାଚନ
ତେଲେଙ୍ଗାନା ବିଧାନସଭାର କାର୍ଯ୍ୟକାଳ ୧୬ ଜାନୁଆରୀ ୨୦୨୪ରେ ଶେଷ ହେବାକୁ ଯାଉଛି । ଡିସେମ୍ବର ୨୦୧୮ରେ ୧୧୯ ସିଟ୍ ବିଶିଷ୍ଟ ତେଲେଙ୍ଗାନାରେ ବିଧାନସଭା ନିର୍ବାଚନ ଅନୁଷ୍ଠିତ ହୋଇଥିଲା ଏବଂ ତେଲେଙ୍ଗାନା ରାଷ୍ଟ୍ର ସମିତି ରାଜ୍ୟରେ ସରକାର ଗଠନ କରିଥିଲେ । ଏହାର ନାମ ବର୍ତ୍ତମାନ ଭାରତ ରାଷ୍ଟ୍ର ସମିତିରେ ପରିବର୍ତ୍ତିତ ହୋଇଛି । ଚନ୍ଦ୍ରଶେଖର ରାଓ ଦ୍ୱିତୀୟ ଥର ପାଇଁ ମୁଖ୍ୟମନ୍ତ୍ରୀ ହୋଇଥିଲେ ।
୨୦୧୮ ମିଜୋରାମ ବିଧାନସଭା ନିର୍ବାଚନ
ଚଳିତ ବର୍ଷ ଶେଷରେ ୪୦ଟି ସିଟ୍ ବିଶିଷ୍ଟ ମିଜୋରାମରେ ମଧ୍ୟ ନିର୍ବାଚନ ଅନୁଷ୍ଠିତ ହେବ। ମିଜୋରାମ ବିଧାନସଭାର କାର୍ଯ୍ୟକାଳ ୧୭ ଡିସେମ୍ବର ୨୦୨୩ରେ ଶେଷ ହେବାକୁ ଯାଉଛି। ନଭେମ୍ବର ୨୦୧୮ରେ ରାଜ୍ୟରେ ଶେଷ ବିଧାନସଭା ନିର୍ବାଚନ ଅନୁଷ୍ଠିତ ହୋଇଥିଲା ଯେଉଁଥିରେ ମିଜୋ ନ୍ୟାସନାଲ ଫ୍ରଣ୍ଟ ଜିତି ରାଜ୍ୟରେ ସରକାର ଗଠନ କରିଥିଲା। ତା’ପରେ ଜୋରାମଥାଙ୍ଗା ମୁଖ୍ୟମନ୍ତ୍ରୀ ହୋଇଥିଲେ।