ବାଲେଶ୍ବର: ପୁଣି ଜଣେ ଖଣି ବିଭାଗର ଅଫିସରଙ୍କୁ ଆକ୍ରମଣ। ଚାଲନ୍ତିଠାରେ ଡକ୍ୟୁମେଣ୍ଟ ଯାଞ୍ଚ ବେଳେ ବାଲି ମାଫିଆଙ୍କ ଆକ୍ରମଣ। ଜିତେନ୍ଦ୍ର ଦାଶ ନାମକ ଜଣେ ଖଣି ବିଭାଗ ଅଫିସରଙ୍କୁ ଆକ୍ରମଣ ହୋଇଥିବା ଅଭିଯୋଗ। ବିଳମ୍ବିତ ରାତିରେ ଆକ୍ରମଣ ହୋଇଥିବା ନେଇ ଜଳେଶ୍ବର ଥାନାରେ ଏତଲା।
ସୂଚନା ଅନୁସାରେ ଗତକାଲି ବିଳମ୍ବିତ ରାତିରେ ବାଲେଶ୍ଵର ଜିଲ୍ଲା ଜଳେଶ୍ଵର ଥାନା ଅଧୀନସ୍ଥ ଚାଳନ୍ତି ଗ୍ରାମରେ ବାଲି ଚୋରି ଖବର ପାଇ ଚଢ଼ାଉ କରିବାକୁ ଯାଇଥିବା ଖଣି ଏନଫୋର୍ସମେଣ୍ଟ ଟିମକୁ ଦୁର୍ବ୍ୟବହାର ପ୍ରଦର୍ଶନ କରାଯାଇଥିବା ନେଇ ଜଳେଶ୍ଵର ଥାନାରେ ଅଭିଯୋଗ ହୋଇଛି। ଜଳେଶ୍ୱର ପୋଲିସ ଅଭିଯୋଗ ପାଇବା ପରେ କେଉଁମାନେ ଏହି ଦୁର୍ବବ୍ୟବହାର ପ୍ରଦର୍ଶନ କରିଛନ୍ତି ସେନେଇ ତଦନ୍ତ ଆରମ୍ଭ କରିଛି।
ମହମ୍ମଦ ନଗର ପାଟଣା ଓ ଚାଳନ୍ତି ଗାଁ ସନ୍ନିକଟ ସୁବର୍ଣ୍ଣରେଖା ନଦୀ ଗର୍ଭରୁ ବେଆଇନ୍ ବାଲି ଉତ୍ତୋଳନ କରାଯାଉଥିବା ନେଇ ଗତକାଲି ରାତିରେ ଖଣି ବିଭାଗକୁ ଖବର ମିଳିଥିଲା। ଫଳରେ ବାଲେଶ୍ଵର ଜିଲ୍ଲା ଖଣି ଅଧିକାରୀ ସନ୍ତୋଷୀ ପ୍ରଭା ସେଠୀଙ୍କ ନିର୍ଦ୍ଦେଶରେ ଜଳେଶ୍ଵର କନିଷ୍ଠ ଖଣି ଅଧିକାରୀ ଜିତେନ୍ଦ୍ର କୁମାର ଦାସ ଓ ବସ୍ତା କନିଷ୍ଠ ଖଣି ଅଧିକାରୀ ସତ୍ୟ ଚିନ୍ମୟ ଜେନା ଏନଫୋର୍ସମେଣ୍ଟ ଟିମ୍ ସହ ଚାଳନ୍ତି ଗାଁରେ ବେଆଇନ ଭାବେ ଚାଲିଥିବା ବାଲି ଉତ୍ତୋଳନ ଉପରେ ଚଢ଼ାଉ କରିଥିଲେ। ଚଢ଼ାଉ ସମୟରେ ବାଲି ମାଫିଆମାନେ ବାଲି ଉତ୍ତୋଳନ କାମରେ ଲାଗିଥିବା ଯନ୍ତ୍ରାଂଶ ନେଇ ଚମ୍ପଟ ମାରିଥିଲେ।
ଏନଫୋର୍ସମେଣ୍ଟ ଟିମ ନଦୀପଠାରୁ ଫେରୁଥିବା ବେଳେ ରାସ୍ତାରେ ଟିମ୍ ର ଗାଡ଼ି ଆଗରେ ବାଇକ ରଖି ୧୦ରୁ ୧୫ ଜଣ ଯୁବକ ଘେରି ଯାଇଥିଲେ। ଦୁଇ ଖଣି ଅଧିକାରୀଙ୍କୁ ଗାଳିଗୁଲଜ କରିବା ସହ ଆକ୍ରମଣ କରି ଗାଡ଼ି ଭାଙ୍ଗି ଦେଇଥିଲେ। ଏପରିକି ଏନଫୋର୍ସମେଣ୍ଟ ଟିମ୍ ଭିଡିଓ ଓ ଫଟୋ ମଧ୍ୟ ଉତ୍ତୋଳନ କରିଥିଲେ। ଦୀର୍ଘ ସମୟ ଧରି ଏହି ଅସାମାଜିକ ଯୁବକଙ୍କ କାର୍ଯ୍ୟକଳାପ ପରେ ଏନଫୋର୍ସମେଣ୍ଟ ଟିମ୍ ଜଳେଶ୍ଵର ପୋଲିସର ସହାୟତା ନେଇଥିଲା। ଜଳେଶ୍ୱର ପୋଲିସ ଘଟଣାସ୍ଥଳରେ ପହଞ୍ଚିବା ପୂର୍ବରୁ ଯୁବକମାନେ ଚମ୍ପଟ ମାରିଥିଲେ। ଏନେଇ ଖଣି ଅଧିକାରୀ ଦାସ ଜଳେଶ୍ୱର ଥାନାରେ ଲିଖିତ ଅଭିଯୋଗ କରିଛନ୍ତି।
Comments are closed.