ବେଙ୍ଗାଲୁରୁ: ବେଙ୍ଗାଲୁରୁର ଖାଦ୍ୟ ପ୍ରେମୀଙ୍କ ପାଇଁ ଏକ ଆଶ୍ଚର୍ଯ୍ୟଜନକ ଖବର ସାମ୍ନାକୁ ଆସିଛି। ବିଶେଷକରି ଇଡଲିର ମଜା ନେବାକୁ ହୋଟେଲ ଯାଉଥିବା ଗ୍ରାହକମାନଙ୍କୁ ଏବେ ବହୁତ ସତର୍କ ରହିବାକୁ ପଡିବ। ଏହାର କାରଣ ହେଉଛି ଖାଦ୍ୟ ବିଭାଗ ଦ୍ୱାରା କରାଯାଇଥିବା ପରୀକ୍ଷାରେ ମିଳିଥିବା ତଥ୍ୟ। ଖାଦ୍ୟ ବିଭାଗର ତଦନ୍ତରୁ ନିଶ୍ଚିତ ହୋଇଛି ଯେ ବେଙ୍ଗାଲୁରୁର ଅନେକ ହୋଟେଲରେ ପ୍ରସ୍ତୁତ ଇଡଲି ଅସୁରକ୍ଷିତ। ଖାଦ୍ୟ ବିଭାଗ ବେଙ୍ଗାଲୁରୁର ବିଭିନ୍ନ ସ୍ଥାନରୁ ଇଡଲିର ନମୁନା ସଂଗ୍ରହ କରି ପରୀକ୍ଷାଗାରକୁ ପରୀକ୍ଷା ପାଇଁ ପଠାଇଥିଲା।
ଲ୍ୟାବ ରିପୋର୍ଟ ଅନୁଯାୟୀ, ୩୫ରୁ ଅଧିକ ଇଡଲି ନମୁନା ଅସୁରକ୍ଷିତ। ବେଙ୍ଗାଲୁରୁର ଅନେକ ସ୍ଥାନରେ ଇଡଲି ତିଆରି ପାଇଁ କପଡ଼ା ବଦଳରେ ପ୍ଲାଷ୍ଟିକ୍ କଭର ବ୍ୟବହାର କରାଯାଉଛି। ପ୍ଲାଷ୍ଟିକ୍ କେବଳ ଇଡଲି ତିଆରିରେ ନୁହେଁ, ବରଂ ଖାଦ୍ୟ ପରିବେଷଣ ଏବଂ ପ୍ୟାକେଜିଂରେ ମଧ୍ୟ ବ୍ୟବହୃତ ହେଉଛି। ଗରମ ସଂସ୍ପର୍ଶରେ ଆସିଲେ ପ୍ଲାଷ୍ଟିକ୍ ଚାଦରଗୁଡ଼ିକ କ୍ଷତିକାରକ ପଦାର୍ଥ ନିର୍ଗତ କରେ। ବିଶେଷଜ୍ଞମାନେ ଚେତାବନୀ ଦେଇଥିଲେ ଯେ ଏହା କର୍କଟ ରୋଗ ସୃଷ୍ଟିକାରୀ।
ବିଶେଷଜ୍ଞଙ୍କ ଚେତାବନୀ ପରେ, ଖାଦ୍ୟ ବିଭାଗ ବେଙ୍ଗାଲୁରୁର ଅନେକ ସ୍ଥାନରୁ ଇଡଲିର ନମୁନା ସଂଗ୍ରହ କରିଛି। ଖାଦ୍ୟ ଏବଂ ମାନକ ବିଭାଗ ବେଙ୍ଗାଲୁରୁର ବିଭିନ୍ନ ସ୍ଥାନରୁ ୫୦୦ରୁ ଅଧିକ ଇଡଲି ନମୁନା ସଂଗ୍ରହ କରିଥିଲା, ଯେଉଁଥିରୁ ୩୫ରୁ ଅଧିକ ଇଡଲି ନମୁନା ଅସୁରକ୍ଷିତ ବୋଲି ଜଣାପଡିଥିଲା। ତଥାପି କିଛି ନମୁନାର ଏବେ ବି ପରୀକ୍ଷଣ ଚାଲିଛି। ସମ୍ପୂର୍ଣ୍ଣ ରିପୋର୍ଟ ପାଇବା ପରେ ଖାଦ୍ୟ ବିଭାଗ ପ୍ଲାଷ୍ଟିକ୍ କାଗଜ ଉପରେ ପ୍ରତିବନ୍ଧକ ଲଗାଇବା ବିଷୟରେ ବିଚାର କରିବ।
ପୂର୍ବରୁ, କର୍ଣ୍ଣାଟକର ଖାଦ୍ୟ ବିଭାଗ ଗୁପ୍ଚୁପ୍ର ଗୁଣବତ୍ତା ଉପରେ ଚିନ୍ତା ପ୍ରକାଶ କରିଥିଲା। ଭାରତୀୟ ଖାଦ୍ୟ ସୁରକ୍ଷା ଏବଂ ମାନକ ପ୍ରାଧିକରଣ (FSSAI) ରାଜ୍ୟର ୨୬୦ଟି ସ୍ଥାନରୁ ଗୁପ୍ଚୁପ୍ ନମୁନା ସଂଗ୍ରହ କରିଥିଲା, ଯେଉଁଥିରୁ ୪୧ଟି ନମୁନାରେ କୃତ୍ରିମ ରଙ୍ଗ ଏବଂ କର୍କଟ ରୋଗ ସୃଷ୍ଟିକାରୀ ପଦାର୍ଥ ଥିବା ଜଣାପଡିଥିଲା। ଏହା ବ୍ୟତୀତ, ଖାଦ୍ୟ ବିଭାଗ କୋବି ମଞ୍ଚୁରିଆନ ଏବଂ ଅନ୍ୟାନ୍ୟ ଫାଷ୍ଟଫୁଡ୍ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରି କହିଥିଲା ଯେ ଏଥିରେ ରାସାୟନିକ ପଦାର୍ଥ ଏବଂ କୃତ୍ରିମ ରଙ୍ଗ ବ୍ୟବହାର କର୍କଟ ରୋଗର କାରଣ ହୋଇପାରେ। ରିପୋର୍ଟ ଆସିବା ପରେ, ସରକାର ରୋଡାମାଇନ୍-ବି ନାମକ ଖାଦ୍ୟ ରଙ୍ଗକୁ ନିଷିଦ୍ଧ କରିଥିଲେ।
Comments are closed.