ନିର୍ଦ୍ଧାରିତ ସମୟର ୪ଦିନ ପୂର୍ବରୁ ସରିବ ନ୍ୟାୟ ଯାତ୍ରା, ମାର୍ଚ୍ଚ ୧୭ରେ ମୁମ୍ବାଇରେ ହେବ ବିରାଟ ରାଲି

ନୂଆଦିଲ୍ଲୀ: ମାର୍ଚ୍ଚ ୧୬ ରେ ମହାରାଷ୍ଟ୍ରର ରାଜଧାନୀ ମୁମ୍ବାଇରେ ଶେଷ ହେବ କଂଗ୍ରେସର ‘ଭାରତ ଯୋଡୋ ନ୍ୟାୟ ଯାତ୍ରା’ । ଏହାର ପରଦିନ ଅର୍ଥାତ୍ ମାର୍ଚ୍ଚ ୧୭ରେ, ବିରୋଧୀ ଦଳର ଇଣ୍ଡିଆ ମହାମେଣ୍ଟ ମୁମ୍ବାଇରେ ଏକ ବିଶାଳ ରାଲି କରିବାକୁ ଯାଉଛନ୍ତି। ଇଣ୍ଡିଆ ମହାମେଣ୍ଟର ସମସ୍ତ ନେତା ଏଥିରେ ଭାଗ ନେବେ । ଭାରତ ଯୋଡୋ ନ୍ୟାୟ ଯାତ୍ରା ତା’ର ନିର୍ଦ୍ଧାରିତ ସମୟର ଚାରି ଦିନ ପୂର୍ବରୁ ଶେଷ ହେବ । ତେବେ ଏହା ପଛରେ ଲୋକସଭା ନିର୍ବାଚନ ପାଇଁ ପ୍ରସ୍ତୁତି ଥାଇପାରେ ବୋଲି ବିଶ୍ୱାସ କରାଯାଉଛି । ନିର୍ବାଚନକୁ ଦୃଷ୍ଟିରେ ରଖି ଏକ ରାଲିର ଆୟୋଜନ ମଧ୍ୟ କରାଯାଉଛି।

ସୂଚନା ଅନୁସାରେ, ଭାରତ ଯୋଡୋ ନ୍ୟାୟ ଯାତ୍ରା ଉତ୍ତର-ପୂର୍ବ ରାଜ୍ୟ ମଣିପୁରରୁ ୧୪ ଜାନୁୟାରୀ ୨୦୨୪ରେ ଆରମ୍ଭ ହୋଇଥିଲା। କାର୍ଯ୍ୟସୂଚୀ ଅନୁଯାୟୀ ଏହା ମାର୍ଚ୍ଚ ୨୦ରେ ଶେଷ ହେବାକଥା । କିନ୍ତୁ ବର୍ତ୍ତମାନ ଏହି ଯାତ୍ରା ୪ଦିନ ପୂର୍ବରୁ ଅର୍ଥାତ୍ ମାର୍ଚ୍ଚ ୧୬ରେ ଶେଷ ହେବାକୁ ଯାଉଛି । କଂଗ୍ରେସ ନେତା ରାହୁଲ ଗାନ୍ଧୀ ଏହି ଭାରତ ଯୋଡୋ ନ୍ୟାୟ ଯାତ୍ରା କରୁଛନ୍ତି। ଏହି ଯାତ୍ରାରେ କଂଗ୍ରେସର ସାଧାରଣ ସମ୍ପାଦକ ଜୟରାମ ରମେଶ ମଧ୍ୟ ତାଙ୍କ ସହ ଅଛନ୍ତି। ଏହା ବ୍ୟତୀତ ଦଳର ବହୁ ବରିଷ୍ଠ ନେତା ଏହାର ଏକ ଅଂଶ ହୋଇପାରିଛନ୍ତି।

କଂଗ୍ରେସର ଭାରତ ଯୋଡୋ ନ୍ୟାୟ ଯାତ୍ରା ମଣିପୁରରୁ ଆରମ୍ଭ ହୋଇଥିଲା, ପରେ ଏହି ଯାତ୍ରା ଅନ୍ୟ ଉତ୍ତର-ପୂର୍ବ ରାଜ୍ୟ ନାଗାଲାଣ୍ଡ, ଅରୁଣାଚଳ ପ୍ରଦେଶ, ଆସାମ ଦେଇ ପଶ୍ଚିମବଙ୍ଗରେ ପହଞ୍ଚିଥିଲା। ଉତ୍ତର ପୂର୍ବରେ ନ୍ୟାୟ ଯାତ୍ରା ସମୟରେ କଂଗ୍ରେସ ମଣିପୁରରେ ହୋଇଥିବା ହିଂସା ପ୍ରସଙ୍ଗ ଉଠାଇଥିଲା। ଏହା ପରେ ଯେତେବେଳେ ଯାତ୍ରା ଆସାମରେ ପହଞ୍ଚିଲା ସେତେବେଳେ ପୋଲିସ ଓ କଂଗ୍ରେସ କର୍ମୀଙ୍କ ମଧ୍ୟରେ ସଂଘର୍ଷ ହୋଇଥିଲା। ସେଠାରୁ ଯେତେବେଳେ ଆସାମ ଦେଇ ଏହି ଯାତ୍ରା ପଶ୍ଚିମବଙ୍ଗରେ ପହଞ୍ଚିଲା ସେତେବେଳେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏଥିରେ ଭାଗ ନେଇନଥିଲେ। ମମତାଙ୍କ କହିବା ଅନୁସାରେ, ଏହି ଯାତ୍ରାରେ ଯୋଗଦେବାକୁ ତାଙ୍କୁ ନିମନ୍ତ୍ରଣ ମିଳିନଥିଲା ।

ସେଠାରୁ ନ୍ୟାୟ ଯାତ୍ରା ବିହାର ଯାଇଥିଲା । ବିହାର ଗସ୍ତ ସମୟରେ ତେଜସ୍ୱୀ ଯାଦବ ଏହାର ଏକ ଅଂଶ ହୋଇଥିଲେ। ଏହି ଯାତ୍ରା ଝାଡଖଣ୍ଡ ଏବଂ ଓଡିଶା ମଧ୍ୟ ଦେଇ ଯାଇଥିଲା। ଏହି ଯାତ୍ରା ର କିଛି ଅଂଶ ଛତିଶଗଡରେ ମଧ୍ୟ ହୋଇଥିଲା | ତା’ପରେ ନ୍ୟାୟ ଯାତ୍ରା ପୂର୍ବ ୟୁପି ଦେଇ ଉତ୍ତରପ୍ରଦେଶରେ ପହଞ୍ଚିଥିଲା । ଏଠାରେ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ଏହି ଯାତ୍ରାରେ ଭାଗ ନେଇଥିଲେ। ବର୍ତ୍ତମାନ ଏହି ଯାତ୍ରା ମଧ୍ୟପ୍ରଦେଶରେ ଅଛନ୍ତି, ଯେଉଁଠାରେ ଦିଗବିଜୟ ସିଂ, କମଲ ନାଥ ଏବଂ ଜିତୁ ପାଟୱାରୀ ଏଥିରେ ଭାଗ ନେଇଛନ୍ତି।