କୋରାପୁଟ : ଉତ୍କଳ ଦିବସ ଅବସରରେ କୋରାପୁଟ ଗସ୍ତରେ ଅଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଆଉ ଠିକ୍ ଏହି ସମୟରେ କୋଟିଆକୁ ନେଇ ଉଭୟ କେନ୍ଦ୍ର ସରକାର ଓ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ସମାଲୋଚନା କରିଛନ୍ତି ବିଜେଡି ନେତା ପ୍ରଦୀପ ମାଝୀ । ପ୍ରଦୀପ କହିଛନ୍ତି, କୋଟିଆରେ ଯାହା ବି ବିକାଶ କରିଛନ୍ତି ରାଜ୍ୟ ସରକାର । କୋଟିଆ ପଞ୍ଚାୟତକୁ ୧୬୦ କୋଟିର ପ୍ରକଳ୍ପ ଦିଆଯାଇଛି । କିନ୍ତୁ କୋଟିଆକୁ କେନ୍ଦ୍ର ସରକାର କ’ଣ ଦେଇଛନ୍ତି ବୋଲି ପ୍ରଶ୍ନ କରିଛନ୍ତି ପ୍ରଦୀପ । କୋଟିଆ ପାଇଁ ସୁପ୍ରିମକୋର୍ଟ ଯାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ରାଜ୍ୟ ସରକାରଙ୍କ ଯୋଜନାରେ କୋଟିଆକୁ ଗମନାଗମନ ସୁବିଧା ସହ ଲୋକଙ୍କ ପାଖରେ ବିଶୁଦ୍ଧ ପାନୀୟ ଜଳ ଓ ବିଦ୍ୟୁତ ସେବା ପହଞ୍ଚିପାରିଛି । ଏକାଧିକ ବଡ଼ ଶିକ୍ଷାନୁଷ୍ଠାନ, ଫାଣ୍ଡି, ଚିକିତ୍ସାଳୟ ନିର୍ମାଣ କରାଯାଇଛି । ତେଣୁ କୋଟିଆରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନାଟକବାଜୀ ବନ୍ଦ କରନ୍ତୁ ବୋଲି କହି ପ୍ରଦୀପ କଡ଼ା ସମାଲୋଚନା କରିଛନ୍ତି । ବିଜେପିକୁ ରାଜ୍ୟବ୍ୟାସୀ ପ୍ରତ୍ୟାଖ୍ୟାନ କରିଆସିଛନ୍ତି ଓ ଆଗାମୀ ଦିନରେ ମଧ୍ୟ ପ୍ରତ୍ୟାଖ୍ୟାନ କରିବେ ବୋଲି କହିଛନ୍ତି ପ୍ରଦୀପ । କେନ୍ଦ୍ର ସରକାର ଖାଲି ମିଛ ପ୍ରତିଶ୍ରୁତି ଦିଅନ୍ତି, କିଛି ପୂରଣ କରନ୍ତିନି ବୋଲି ପ୍ରଦୀପ କହିଛନ୍ତି ।
ଧର୍ମେନ୍ଦ୍ରଙ୍କୁ ଟାର୍ଗେଟ କରି ପ୍ରଦୀପ କହିଛନ୍ତି, କେନ୍ଦ୍ରମନ୍ତ୍ରୀ ଗୋଟିଏ ଦିନ ବି କୋଟିଆ ପ୍ରସଙ୍ଗରେ ତ ଛାଡନ୍ତୁ ଆନ୍ଧ୍ର ସରକାରଙ୍କ ବିରୋଧରେ ମଧ୍ୟ ପଦୁଟିଏ ବି କହିନାହାନ୍ତି । ସେହିପରି କୋରାପୁଟ କେନ୍ଦ୍ରୀୟ ବିଶ୍ୱବିଦ୍ୟାଳୟ ପ୍ରସଙ୍ଗରେ ମଧ୍ୟ ସେ କେନ୍ଦ୍ରକୁ କଟାକ୍ଷ କରିଛନ୍ତି। କୋରାପୁଟ କେନ୍ଦ୍ରୀୟ ବିଶ୍ୱବିଦ୍ୟାଳୟକୁ ଅନ୍ୟତ୍ର ଉଠାଇ ନେବାକୁ ଉଦ୍ୟମ ହେଉଛି ବୋଲି କହିଛନ୍ତି ପ୍ରଦୀପ । କେବଳ ଅବହେଳିତ ଅବସ୍ଥାରେ ନୁହେଁ, ଶିକ୍ଷାଦାନ ପାଇଁ ଏଠାରେ ମାତ୍ର ୧୭ ଆସୋସିଏଟ୍ ଓ ୨ ଜଣ ସ୍ଥାୟୀ ପ୍ରଫେସର ଅଛନ୍ତି । ସେପଟେ ୧୩୮ଟି ଟିଚିଂ ଓ ୯୧ଟି ନନ-ଟିଚିଂ ସହ ମୋଟ୍ ୨୨୯ଟି ପୋଷ୍ଟ ଖାଲି ପଡ଼ିଛି ବୋଲି ସୂଚନା ଦେଇ ସମାଲୋଚନା କରିଛନ୍ତି ପ୍ରଦୀପ । ହରିୟାଣା କେନ୍ଦ୍ରୀୟ ବିଶ୍ୱବିଦ୍ୟାଳୟର ଉଦାହରଣ ଦେଇ ପ୍ରଦୀପ ପ୍ରଶ୍ନ କରିଛନ୍ତି, ସେଠାରେ ପାଠ୍ୟକ୍ରମ ବଢୁଛି କିନ୍ତୁ କୋରାପୁଟରେ କାହିଁକି ବିଭାଗ ବଢ଼ାଯାଉନି ।
କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଗସ୍ତର ମୁଖ୍ୟ ଉଦ୍ଦେଶ୍ୟ କୋରାପୁଟ ସେଣ୍ଟ୍ରାଲ ୟୁନିଭର୍ସିଟିକୁ ଅନ୍ୟତ୍ର ଉଠାଇ ନେବା ବୋଲି ପ୍ରଦୀପ ଆରୋପ ଲଗାଇଛନ୍ତି। ସେହିପରି ଆଦିବାସୀ ସମାଜକୁ ମାନ୍ୟତା ଦାବିକୁ କେନ୍ଦ୍ର ଅଣଦେଖା କରୁଛି ବୋଲି ବିଜେଡି ନେତା ପ୍ରଦୀପ ମାଝୀ କହିଛନ୍ତି।