ପାଟନା: ବିହାରରେ ଦରଧା ନଦୀପାର ହେଉଥିବା ବେଳେ ପାଟଳିପୁତ୍ର ଲୋକସଭା ଆସନର ବିଜେପି ସାଂସଦ ତଥା ପୂର୍ବତନ କେନ୍ଦ୍ରମନ୍ତ୍ରୀ ରାମକ୍ରିପାଲ୍ ଯାଦବଙ୍କ ଡଙ୍ଗା ହଠାତ୍ ଓଲଟି ପଡିବାରୁ ସେ ପାଣିରେ ବୁଡୁବୁଡୁ ଅଳ୍ପକେ ବର୍ତ୍ତିଯାଇଛନ୍ତି ।
ନଦୀରେ ଡଙ୍ଗାଟି ଅଚାନକ ଓଲଟି ପଡିବାରୁ ସେଠାରେ ଉପସ୍ଥିତ ଲୋକମାନେ ସଙ୍ଗେସଙ୍ଗେ ତାଙ୍କୁ ଉଦ୍ଧାର କରିଥିଲେ ।
ମିଳିଥିବା ସୂଚନାନୁଯାୟୀ ବିହାରରେ ବନ୍ୟା ସ୍ଥିତି ସଙ୍ଗୀନ ହୋଇପଡିଥିବା ବେଳେ ନିଜ ନିର୍ବାଚନମଣ୍ଡଳୀର ସ୍ଥିତି ତଦାରଖ କରିବା ଲାଗି ରାମକ୍ରିପାଲ ନିଜ ସମର୍ଥକଙ୍କ ସହ ଟାୟାରରେ ନିର୍ମିତ ଏକ ଡଙ୍ଗାରେ ନଦୀ ପାର ହୋଇଥିଲେ ।
ତେବେ ଦରଧା ନଦୀରେ ଜଳସ୍ତର ବିପଦସଙ୍କେତ ଉପରେ ପ୍ରବାହିତ ହେଉଥିବା ଯୋଗୁଁ କୌଣସି କାରଣବଶତଃ କୂଳରେ ଲାଗିବା ପୂର୍ବରୁ ଡଙ୍ଗାଟି ହଠାତ୍ ଓଲଟି ପଡିଥିଲା ।
ତେବେ ସାଂସଦ ପାଣିରେ ବୁଡି ଯାଉଥିବା ବେଳେ ସେଠାରେ ଉପସ୍ଥିତ ସ୍ଥାନୀୟ ଲୋକମାନେ ତୁରନ୍ତ ତାଙ୍କୁ ଉଦ୍ଧାର କରି କୂଳକୁ ଆଣିଥିଲେ ।