ଅକାଳୀ ଦଳ ସହ ହେବନି ମେଣ୍ଟ, ପଞ୍ଜାବରେ ଏକାକୀ ଲଢିବ ବିଜେପି

ଚଣ୍ଡିଗଡ: ପଞ୍ଜାବରେ ବିଜେପି ଏବଂ ଅକାଳୀ ଦଳ (ଏସଏଡି) ମଧ୍ୟରେ ମେଣ୍ଟକୁ ନେଇ ଚାଲିଥିବା କଳ୍ପନା ଜଳ୍ପନାର ଅନ୍ତ ଘଟିଛି । ବର୍ତ୍ତମାନ ରାଜ୍ୟରେ ଅକାଳୀ ଦଳ ଏବଂ ବିଜେପି ମଧ୍ୟରେ କୌଣସି ମେଣ୍ଟ ହେବ ନାହିଁ । ପଞ୍ଜାବରେ ଲୋକସଭା ନିର୍ବାଚନରେ ଏକାକୀ ଲଢିବ ବିଜେପି । ଏନେଇ ଆଜି ବିଜେପି ପକ୍ଷରୁ ଘୋଷଣା କରାଯାଇଛି ।

ପଞ୍ଜାବ ବିଜେପି ଅଧ୍ୟକ୍ଷ ସୁନିଲ ଜାଖର ନିଜ ସୋସିଆଲ ମିଡିଆ ଆକାଉଣ୍ଟରେ ଏକ ଭିଡିଓ ବାର୍ତ୍ତା ମାଧ୍ୟମରେ ଏହା ନିଶ୍ଚିତ କରିଛନ୍ତି । ସେ କହିଛନ୍ତି ଯେ, ଭାରତୀୟ ଜନତା ପାର୍ଟି ଏକାକୀ ପଞ୍ଜାବର ଲୋକ ସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଯାଉଛି । ବିଜେପି ରାଜ୍ୟର ସମସ୍ତ ୧୩ ସିଟ୍ ରେ ଏକାକୀ ନିର୍ବାଚନ ଲଢ଼ିବ ବୋଲି ଜାଖର କହିଛନ୍ତି ।

କହିଛନ୍ତି ଯେ, ‘ଲୋକଙ୍କ ମତାମତ, ଦଳୀୟ କର୍ମୀଙ୍କ ମତ, ନେତାଙ୍କ ମତକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନିଆଯାଇଛି, ପଞ୍ଜାବର ସମସ୍ତ କୃଷକ, ପଞ୍ଜାବର ବ୍ୟବସାୟୀ, ସହଯୋଗୀମାନଙ୍କ ଉଜ୍ଜ୍ୱଳ ଭବିଷ୍ୟତ ପାଇଁ ଏହି ନିଷ୍ପତ୍ତି ନିଆଯାଇଛି । ଏଠାକାର ଶ୍ରମିକ, ପଞ୍ଜାବର ପଛୁଆ ଶ୍ରେଣୀ ଆଦିଙ୍କ ପାଇଁ ପ୍ରଧାନମନ୍ତ୍ରୀ ମୋଦିଙ୍କ ନେତୃତ୍ୱରେ ବିଜେପି କରିଥିବା କାର୍ଯ୍ୟ ଆଉ ଲୁକ୍କାୟିତ ଅବସ୍ଥାରେ ନାହିଁ ‘।

BJP to contest the Lok Sabha elections alone in Punjab.

ਭਾਰਤੀ ਜਨਤਾ ਪਾਰਟੀ ਲੋਕ ਸਭਾ ਚੋਣਾਂ ਪੰਜਾਬ ਵਿਚ ਇੱਕਲੇ ਲੜਨ ਜਾ ਰਹੀ ਹੈ। pic.twitter.com/FbzfaePNj3

— Sunil Jakhar(Modi Ka Parivar) (@sunilkjakhar) March 26, 2024

ଅକାଳି ଦଳ ବିଜେପି ପାଖରେ ବହୁତ ଗୁଡିଏ ସର୍ତ୍ତ ରଖିଥିଲା । ହେଲେ ଏଥିରେ ସହମତି ନ ମିଳିବାରୁ ଉଭୟଙ୍କ ମଧ୍ୟରେ ମେଣ୍ଟ ଆଶା ମଉଳିଯାଇଛି । ଏବେ ବିଜେପି ସେଠାରେ ଏକା ଲଢ଼ିବ ବୋଲି ନିଷ୍ପତ୍ତି ନେଇଛି ।

ଏହା ପୂର୍ବରୁ ୨୦୧୯ ମସିହାରେ ଅକାଳୀ ଦଳ ଏନଡିଏରେ ରହି ନିର୍ବାଚନ ଲଢିଥିଲା । ଏହାପରେ ୨୦୨୦-୨୧ ଚାଷୀ ଆନ୍ଦୋଳନ ସମୟରେ ବିଜେପି ଠାରୁ ଦୂରେଇ ଯାଇଥିଲା ଅକାଳୀ ଦଳ ।