ବିଜେପିର ଫୋକସ ଲୋକସଭା ଆସନ ବେଳେ ବିଜେଡିର ଅଧିକାଂଶ ସ୍ଥାନରେ ନୂଆ ଚେହେରା

ଭୁବନେଶ୍ୱର: ବିଜେପିର ଫୋକସ ଲୋକସଭା ଆସନ ରହିଥିବା ବେଳେ ବିଜେଡିର ଅଧିକାଂଶ ସ୍ଥାନରେ ନୂଆ ଚେହେରା ପ୍ରାର୍ଥୀ ହୋଇଛନ୍ତି। ଦୁଇଟି ପର୍ଯାୟରେ ୧୫ଟି ଲୋକସଭା ଆସନ ପାଇଁ ବିଜେଡି ପ୍ରାର୍ଥୀ ଘୋଷଣା କରିବା ପରେ ଏହାକୁ ନେଇ ନୂଆ ଚର୍ଚ୍ଚା ସୃଷ୍ଟି ହୋଇଛି। ୧୫ ଲୋକସଭା ଆସନରୁ ୧୧ଟି ଆସନରେ ନୂଆ ମୁହଁ ରହିଥିବା ବେଳେ ୪ଟି ସ୍ଥାନରେ ପ୍ରାର୍ଥୀ ରିପିଟ୍ କରିଛି ଦଳ। ଯଦି ଏହାକୁ ବିରୋଧୀ ବିଜେପି ସହ ତୁଳନା କରାଯିବ ତାହେଲେ ୧୮ଟି ଲୋକସଭା ଆସନରୁ ୪ଟି ଆସନରେ ଟିକେଟ୍ କାଟିଛି। ଅଧିକାଂଶ ସ୍ଥାନରେ ପ୍ରାର୍ଥୀ ରିପିଟ୍ କରିଛି ଦଳ।

ବିଶେଷ କରି କେନ୍ଦ୍ରାପଡ଼ା, ଭୁବନେଶ୍ୱର ଓ ସମ୍ବଲପୁରରେ ବିଜେଡି ରିସ୍କ ନେଇଛି। ନିକଟରେ କଂଗ୍ରେସ ଛାଡ଼ି ବିଜେଡିରେ ଯୋଗ ଦେଇଥିବା ଅଂଶୁମାନ ମହାନ୍ତିଙ୍କୁ କେନ୍ଦ୍ରାପଡ଼ାରେ ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡାଙ୍କ ବିପକ୍ଷରେ ପ୍ରାର୍ଥୀ ହୋଇଛନ୍ତି। ସେପଟେ ସମ୍ବଲପୁରରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବିରୋଧରେ ଲଢ଼େଇ କରିବେ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ। ଭୁବନେଶ୍ୱରରେ ବିଜେପି ପ୍ରାର୍ଥୀ ଅପରାଜିତା ଷଡ଼ଙ୍ଗୀଙ୍କ ବିପକ୍ଷରେ ମନ୍ମଥ ରାଉତରାୟଙ୍କୁ ଦଳ ପ୍ରାର୍ଥୀ କରିଛି।

ବିଜେଡି ଓ ବିଜେପି ମେଣ୍ଟ ଆଲୋଚନା ବିଫଳ ହେବା ପରେ ବିଶେଷ କରି ଯେଉଁ ଆସନରେ ପ୍ରଥମେ ମେଣ୍ଟ ପାଇଁ ବିଚାର କରାଯାଉଥିଲା, ସେଠାରେ ନାମ ଘୋଷଣା କରିବାରେ ତତ୍ପରତା ଦଳର ରଣନୀତିକୁ ନେଇ ପ୍ରଶ୍ନ ଉଠିଛି। ଭୁବନେଶ୍ୱରରେ ମନ୍ମଥ ରାଉତରାୟ, ପରେ ଉତ୍ତର ଓଡ଼ିଶାର ଟାଣୁଆ ନେତା ପ୍ରଣବ ପ୍ରକାଶ ଦାସ ପଶ୍ଚିମ ଓଡ଼ିଶାର ସମ୍ବଲପୁରରେ ପ୍ରାର୍ଥୀ ହେବା ଏହି ଚର୍ଚ୍ଚାକୁ ଖୋରାକ ଯୋଗାଇଛି।