ନୂଆଦିଲ୍ଲୀ: ଆମ ଦେଶରେ ପିତାମାତାଙ୍କ ବ୍ୟତିତ ଗୁରୁଙ୍କୁ ଭଗବାନଙ୍କ ସ୍ଥାନ ପ୍ରଦାନ କରାଯାଇଛି । କୁହାଯାଏ, ଜଣେ ବ୍ୟକ୍ତିର ଜୀବନରେ ଗୁରୁ ହିଁ ସାଜିଥାନ୍ତି ପ୍ରମୁଖ ମାର୍ଗଦର୍ଶକ ।
ଆଜି ଦିନରେ ଜନ୍ମ ଗ୍ରହଣ କରିଥିଲେ ଭାରତର ପ୍ରଥମ ଉପରାଷ୍ଟ୍ରପତି ତଥା ରାଷ୍ଟ୍ରପତି ସର୍ବପଲ୍ଲୀ ରାଧାକ୍ରୀଷ୍ଣନ । ଯାହାଙ୍କ ଜନ୍ମଦିନକୁ ସାରା ଦେଶରେ ‘ଗୁରୁ ଦିବସ’ ଭାବେ ପାଳନ କରାଯାଇଥାଏ । ଏପରିକି ସେ ଜଣେ ଛାତ୍ରବସôଳ ଶିକ୍ଷକ ଭାବେ ଖୁବ୍ ପରିଚିତ ଥିଲେ ।
ଏହି ଗୁରୁ-ଶିଷ୍ୟର ସମ୍ପର୍କକୁ ନେଇ ରୂପେଲି ପରଦାରେ ଅନେକ ଫିଲ୍ମ ନିର୍ମାଣ କରାଯାଇଛି।ଜାଣନ୍ତୁ…
ତାରେ ଜମିନ ପର୍-
୨୦୦୭ରେ ପରଦାକୁ ଆସିଥିବା ଏହି ଫିଲ୍ମଟିରେ ପ୍ରଦର୍ଶିତ ଗୁରୁ-ଶୀଷ୍ୟର କାହାଣୀ ଆପଣଙ୍କୁ ପୂରାପୂରି ଭାବବିହ୍ୱଳ କରିଦେବ । ଅମିର ଖାନ୍ ଜଣେ ଶିକ୍ଷକ ଭୂମିକାରେ ନଜର ଆସୁଥିବା ବେଳେ ତାଙ୍କ ଶିଷ୍ୟ ଇସାନ୍ ଅବସ୍ଥି ଜଣେ ଦୁର୍ବଳ ଛାତ୍ର ଥିଲେ । ଯେଉଁଥିରେ ଅମିର ଇସାନ ଭଳି କମଜୋର୍ ଛାତ୍ର ସହ ସମ୍ପୂର୍ଣ୍ଣ ଶିକ୍ଷା ବ୍ୟବସ୍ଥାର ଢାଞ୍ଚାକୁ ବଦଳାଇ ଦେଇଥିଲେ । ଏହି ଫିଲ୍ମର କାହାଣୀ ପରି ସତ ଜୀବନରେ ଶିକ୍ଷା ବ୍ୟବସ୍ଥାକୁ ସୁଧାରିବା ଲାଗି ଏହିଭଳି ଶିକ୍ଷକଙ୍କର ଆବଶ୍ୟକତା ରହିଛି । ଶିକ୍ଷକ ଚାହିଁଲେ ଜଣେ ଛାତ୍ରର ଜୀବନକୁ କିଭଳି ପରିବର୍ତ୍ତନ କରିପାରିବ, ତାହା ଚଳଚ୍ଚିତ୍ରରେ ଅତି ନଖୁଣ ଭାବେ ବର୍ଣ୍ଣନା କରାଯାଇଛି ।
ହିଚକି-
ବଲିଉଡରେ ୨୦୧୮ ମସିହାରେ ‘ହିଚକି’ ଚଳଚ୍ଚିତ୍ରର ନିର୍ମାଣ କରାଯାଇଥିଲା । ଏଥିରେ ଗୁରୁ-ଶିଷ୍ୟର କାହାଣୀ ଅତି ନିଖୁଣ ଭାବେ ପ୍ରଦର୍ଶନ କରାଯାଇଥିଲା । ଫିଲ୍ମରେ ଅଭିନେତ୍ରୀ ରାଣୀ ମୁଖାର୍ଜୀ ଜଣେ ଶିକ୍ଷକର ଭୂମିକାରେ ନଜର ଆସିଥିଲେ । ଯାହାକୁ ସବୁବେଳେ ‘ହିକ୍କା’ ଆସୁଥାଏ, ଆଉ ସେଥିପାଇଁ ସବୁଠି ତାଙ୍କୁ ଅପମାନିତ ହେବାକୁ ପଡିଥାଏ । ପରେ ସେୁ ଦୃଢମନା ହୋଇ ନିଜର ସମସ୍ୟାକୁ ଶକ୍ତିରେ ପରିଣତ କରିଥିଲେ ଏବଂ ବିଦ୍ୟାଳୟରେ ଏକ ନୂଆ ଢଙ୍ଗରେ ପିଲାମାନଙ୍କୁ ପାଠ ପଢାଇଥିଲେ । ନିଜ ସମସ୍ୟାକୁ ନେଇ ନିନ୍ଦିତ ହେବା ବଦଳରେ ତା’କୁ ନିଜର ଶକ୍ତିରେ ପରିଣତ କରିବା ଲାଗି ସେ ପିଲାମାନଙ୍କୁ ପ୍ରେରଣା ଦେଇଥିଲେ ।
ଚକ୍ ଆଣ୍ଡ ଡଷ୍ଟର୍-
୨୦୧୬ରେ ରିଲିଜ ହୋଇଥିବା ‘ଚକ୍ ଆଣ୍ଡ ଡଷ୍ଟର୍’ ଫିଲ୍ମରେ ଅଭିନେତ୍ରୀ ଶାବନା ଆଜମୀ ଓ ଜୁହି ଚାୱଲା ଜଣେ ଶିକ୍ଷକ ଭୂମିକାରେ ଦମଦାର ଅଭିନୟ କରିଥିଲେ । ଏହି ଫିଲ୍ମଟି ଘରୋଇ ଶିକ୍ଷା ବ୍ୟବସ୍ଥାର ବ୍ୟବସାୟୀକରଣ ଉପରେ ଆଧାରିତ ଥିଲା । ସ୍କୁଲକୁ ପଢିବାକୁ ଆସୁଥିବା ପ୍ରତ୍ୟେକ ପିଲାକୁ ନିଜ ପିଲା ଭାବି ପଢାଇବା ଉଚିତ୍, ଯାହା ଫଳରେ ପାଠରେ ପଛୁଆ ପିଲାବି ପଢାରେ ଭଲ ପ୍ରଦର୍ଶନ କରିପାରିବ ।
ହିନ୍ଦୀ ମିଡିୟମ୍-
ହିନ୍ଦୀ ମିଡିୟମ୍ରେ ଇରଫାନ୍ ଖାନ୍ ଅଳ୍ପ ପାଠୁଆ ବ୍ୟକ୍ତି ଭାବେ ନଜର ଆସୁଛନ୍ତି । ଯିଏକି ନିଜ ଝିଅକୁ ଇଂଲିଶ ମିଡିୟମରେ ପଢାଇବାକୁ ବହୁ କସରତ କରୁଛନ୍ତି, ଯାହା ଫଳରେ ତାଙ୍କ ଝିଅବି ଅନ୍ୟମାନଙ୍କ ପରି ଇଂଲିଶ କହିପାରିବ ଏବଂ ତଥାକଥିତ ସମାଜରେ ଜଣେ ମାନ୍ୟଗଣ୍ୟ ବ୍ୟକ୍ତି ଭାବେ ପରିଚୟ ପାଇପାରିବ । ପରେ ସମୟସ୍ରୋତରେ ସେ ଅନୁଭବ କରୁଛନ୍ତି ଯେ କୌଣସି ମିଡିୟମ୍ ବିଦ୍ୟାଳୟ ନୁହେଁ ବରଂ ଜଣେ ଭଲ ଶିକ୍ଷକ ହିଁ ପିଲାର ଭବିଷ୍ୟତକୁ ଉଜ୍ଜ୍ୱଳମୟ କରିପାରିବ ।
