ଗ୍ରୀନ ଜୋନରେ ଗଡିବ ବସ୍ ! ମୁଖ୍ୟମନ୍ତ୍ରୀଙ୍କ ଗ୍ରୀନ୍ ସିଗନାଲକୁ ଅପେକ୍ଷା

ଭୁବନେଶ୍ୱର: ରାଜ୍ୟର ଗ୍ରୀନ ଜୋନରେ ଚାଲିପାରେ ବସ୍ । କେନ୍ଦ୍ର ସରକାର ଲକଡାଉନ୍ ୩.୦ ଗାଇଡଲାଇନରେ ଅନୁମତି ଦେଇଛନ୍ତି । ଏହାପରେ ରାଜ୍ୟରେ ବସ୍ ଚଳାଚଳ ନେଇ ବିଚାରବିମର୍ଶ ଚାଲିଥିବା ସୂଚନା ଦେଇଛନ୍ତି ରାଜ୍ୟ ପରିବହନ ମନ୍ତ୍ରୀ ପଦ୍ମନାଭ ବେହେରା । ଏନେଇ ରାଜ୍ୟ ବସ୍ ମାଲିକ ସଂଘ ସହ ଆଲୋଚନା ହୋଇଛି ।
କେନ୍ଦ୍ରର ନୂଆ ଗାଇଡଲାଇନ ଅନୁସାରେ ଘରୋଇ ଓ ସରକାରୀ ବସକୁ କିଭଳି ସୁବିଧା ଦିଆଯାଇ ପାରିବ ସେଦିଗରେ ଚିନ୍ତା କରୁଛନ୍ତି ସରକାର । ମୁଖ୍ୟମନ୍ତ୍ରୀ ଚୂଡାନ୍ତ ନିଷ୍ପତ୍ତି ନେବେ ବୋଲି ପରିବହନ ମନ୍ତ୍ରୀ ସୂଚନା ଦେଇଛନ୍ତି । ଗ୍ରୀନ ଜୋନରେ ୫୦ ପ୍ରତିଶତ ବସ୍ ଚଳାଚଳ ଓ ୫୦ ପ୍ରତିଶତ ଯାତ୍ରୀ କ୍ଷମତା ସହ ବସ୍ ଚଳାଚଳ ପାଇଁ ଅନୁମତି ଦେଇଛନ୍ତି କେନ୍ଦ୍ର ସରକାର । ପୂର୍ବରୁ କେନ୍ଦ୍ର ପରିବହନ ମନ୍ତ୍ରୀ ନୀତିନ ଗଡକରି ସବୁ ରାଜ୍ୟର ପରିବହନ ମନ୍ତ୍ରୀଙ୍କ ସହ ଆଲୋଚନା କରିଥିଲେ । ଏତିକିବେଳେ ବସର ବୀମା ଅବଧିକୁ ଛଅ ମାସ ବୃଦ୍ଧି ସହ ଟିକସ ଛାଡ ପାଇଁ ଦାବି ରଖିଥିଲେ ମନ୍ତ୍ରୀ ପଦ୍ମନାଭ ବେହେରା ।