Latest Odisha News

ଗୋଟିଏ ପରିବାରରୁ ଦୁଇଟି ଟିକେଟ୍ ପାଇଁ ସର୍ତ୍ତ ଲାଗୁ କଲା କଂଗ୍ରେସ

ନୂଆଦିଲ୍ଲୀ: ଗୋଟିଏ ପରିବାର ଗୋଟିଏ ଟିକେଟ । ଉଦୟପୁରରରେ ଚାଲିଥିବା ଚିନ୍ତନ ଶିବିରରେ କଂଗ୍ରେସ ଏପରି ନିଷ୍ପତ୍ତି ନେଇଛି । ହେଲେ ସେହି ପରିବାରରୁ ଆଉ ଜଣେ ଟିକେଟ ପାଇବାକୁ ହେଲେ ସଂପୃକ୍ତ ଆଶାୟୀ ଦଳ ପାଇଁ ଅନୂନ୍ୟ 5 ବର୍ଷ କାମ କରିଥିବେ ଏବଂ ଏହି ଅବଧି ମଧ୍ୟରେ ତାଙ୍କ କାମର ଚମତ୍କାର ପ୍ରଦର୍ଶନ ଦେଖାଯିବା ଦରକାର ବୋଲି କଂଗ୍ରେସ ନିଷ୍ପତ୍ତି ନେଇଛି।

କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ପ୍ରାରମ୍ଭିକ ମନ୍ତବ୍ୟ ସହିତ ଶୁକ୍ରବାର ଆରମ୍ଭ ହୋଇଥିବା ଚିନ୍ତନ ଶିବିରର ଶେଷରେ ଏହି ନିୟମକୁ ଗ୍ରହଣ କରାଯିବାର ସମ୍ଭାବନା ରହିଛି। ଗୋଟିଏ ପରିବାର ଗୋଟିଏ ଟିକେଟ୍ ନିୟମ ଗାନ୍ଧୀ ପରିବାର ସମେତ ସମସ୍ତ ବର୍ଗରେ ଲାଗୁ ହେବ ବୋଲି ସୂଚନା ରହିିଛି।

ଶିବିର ଆରମ୍ଭ ପୂର୍ବରୁ ଏଆଇସିସି ସାଧାରଣ ସମ୍ପାଦକ ତଥା ରାଜସ୍ଥାନ ଦାୟିତ୍ୱରେ ଥିବା ଅଜୟ ମାକେନ୍ କହିଛନ୍ତି ଯେ ତାଙ୍କ ଦଳ ଗୋଟିଏ ଟିକେଟ୍ ନିୟମକୁ ଆନୁଷ୍ଠାନିକ ରୂପ ଦେବା ଉପରେ ସହମତି ପ୍ରକାଶ ପାଇଛି। ଗୋଟିଏ ପରିବାର ଗୋଟିଏ ଟିକେଟ୍ ଫର୍ମୁଲାକୁ ନେଇ ପ୍ରାୟ ସହମତି ହୋଇଛି। ଗୋଟିଏ ପରିବାରରୁ ଦ୍ୱିତୀୟ ଟିକେଟ୍ ଆଶାୟୀ ଯଦି 5 ବର୍ଷ ଧରି ଦଳ ପାଇଁ ଚମତ୍କାର ଭାବେ କାମ କରିଥିବେ ତେବେ ଯାଇ ସେ ଟିକେଟ ପାଇପାରିବେ।

ସେହିପରି ଦଳ ତୃଣମୂଳ ସ୍ତରରେ ଭୋଟ୍ ମଜବୁତ କରିବାକୁ ଯାଇ ଯୁଗାନ୍ତକାରୀ ସଂସ୍କାର ଆଣିବାକୁ ଯାଉଛି । ବୁଥ୍ ଏବଂ ବ୍ଲକ୍ ମଧ୍ୟରେ ଆସିବା ପାଇଁ ‘ମଣ୍ଡଳ’ ନାମକ ଏକ ନୂଆ ସାଂଗଠନିକ ୟୁନିଟ ଖୋଲିବ କଂଗ୍ରେସ । ଏହା ଲୋକଙ୍କ ମୁଦ୍ଦା ପଢିବା ସହିତ ସେମାନଙ୍କ ନିକଟତର ପ୍ରସଙ୍ଗକୁ ସମର୍ଥନ କରିବା ପାଇଁ ଏକ ସଂଗଠନ ତିଆରି ହେବ।

ପ୍ରାୟ 60 ବର୍ଷ ଧରି ଦଳୀୟ ସଂଗଠନରେ ଅଚଳାବସ୍ଥା ଲାଗି ରହିଥିବା ସ୍ୱୀକାର କରି ମାକେନ୍ କହିଛନ୍ତି, “ଆମେ କୌଣସି ପରିବର୍ତ୍ତନମୂଳକ କାମ କରି ନାହୁଁ। ମତଦାନ କେନ୍ଦ୍ର ଓ ବ୍ଲକ୍ ମଧ୍ୟରେ ‘ମଣ୍ଡଳ’ ନାମରେ ଏକ ନୂଆ ସାଂଗଠନିକ ୟୁନିଟ୍ ଗଢ଼ିବା ଉପରେ ଏବେ ସହମତି ପ୍ରକାଶ ପାଇଛି। ଏବେ କଂଗ୍ରେସର ସବୁଠାରୁ ଛୋଟ ସାଙ୍ଗଠନିକ ୟୁନିଟ୍ ହେଉଛି ପୋଲିଂ ବୁଥ୍ ଏବଂ ତା’ପରେ ହଠାତ୍ ବ୍ଲକ୍ ବାହାରୁଛି। ପ୍ରତି ବ୍ଲକ୍ ପରେ ତିନିରୁ ପାଞ୍ଚଟି ‘ମଣ୍ଡଳ ସମିତି’ ଏବଂ ପ୍ରତି ମଣ୍ଡଳ ପରେ 15ରୁ 20ଟି ବୁଥ୍ ପାଇଁ ସର୍ବସମ୍ମତି କ୍ରମେ ନିଷ୍ପତ୍ତି ନିଆଯାଉଛି ।

ମାକେନ୍ ଆହୁରି ମଧ୍ୟ କହିଛନ୍ତି ଯେ ନିର୍ବାଚନ ପୂର୍ବରୁ ଲୋକଙ୍କ ମନର କଥା ବା ପ୍ରସଙ୍ଗକୁ ଜାଣିବା ପାଇଁ ସର୍ଭେ ଆରମ୍ଭ ହେବ । ଏବେ ଦଳର ଏକ ଆଭ୍ୟନ୍ତରୀଣ ବର୍ଗ ବିଚାର କରୁଥିଲା ଲୋକଙ୍କ ପ୍ରସଙ୍ଗ କଣ ହେବ ।

ହେଲେ ସମୟ ବଦଳିବା ସହିତ କଂଗ୍ରେସ ବଦଳି ପାରିନଥିଲା । ଏବେ ପରିବର୍ତ୍ତନ କରି ଦଳ ଲୋକଙ୍କ ଆସ୍ଥାଭାଜନ ହେବ ବୋଲି ଆଶା ରଖିଛି। ସେହିପରି ସଂଗଠନକୁ ଅଧିକ ମଜଭୁତ କରିବା ପାଇଁ କଂଗ୍ରେସ ଯୋଜନା କରୁଛି ଯେ ସବୁ ସ୍ତରରେ 50 ବର୍ଷରୁ କମ୍ ବୟସର ଲୋକଙ୍କୁ ନେଇ ଅଧା ସଂଗଠନ ତିଆରି ହେବ।

Leave A Reply

Your email address will not be published.