ତାଇୱାନର ସତର୍କତାକୁ କାହିଁକି ଅଣଦେଖା କଲ; ‘ଡବ୍ଲ୍ୟୁଏଚଓ’ ଉପରେ ପୁଣି ବର୍ଷିଲେ ଟ୍ରମ୍ପ୍ !
ନ୍ୟୁୟର୍କ: ଅନ୍ତର୍ଜାତୀୟ କୂଟନୀତିରେ ଏବେ ଚୀନ୍ ଏକଘରିକିଆ ହେବାରେ ଲାଗିଛି । ଚୀନର ୟୁହାନ ସହରରେ ପ୍ରଥମେ କରୋନା ଭୂତାଣୁ ସଂକ୍ରମିତ ହେବା ପରେ ଏହା କ୍ରମେ ସମଗ୍ର ବିଶ୍ୱକୁ ବ୍ୟାପି ଯାଇଥିଲା । ଏସମ୍ପର୍କରେ ବିଶ୍ୱ ସ୍ୱାସ୍ଥ୍ୟ ସଂଗଠନ (ଡବ୍ଲ୍ୟୁଏଚଓ) ଅବଗତ ଥିଲେ ମଧ୍ୟ ବିଶ୍ୱ ସମୁଦାୟକୁ ତୁରନ୍ତ ଜଣାଇବାରେ ଅବହେଳା କରିଥିଲା । ଯୁକ୍ତରାଷ୍ଟ୍ର ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ କିଛିଦିନ ପୂର୍ବରୁ ଉଭୟ ଚୀନ୍ ଓ ଡବ୍ଲ୍ୟୁଏଚଓକୁ ଏନେଇ କଡ଼ା ସମାଲୋଚନା କରିଥିଲେ । ଏବେ ତାଇୱାନ ମଧ୍ୟ ଡବ୍ଲ୍ୟୁଏଚଓ ଉପରକୁ ଅଙ୍ଗୁଳି ଉଠାଇଛି । କରୋନା ଭୂତାଣୁ ଭୀଷଣ ଭାବେ ସଂକ୍ରମିତ ହେବାର ଯଥେଷ୍ଟ ପୂର୍ବରୁ ତାଇୱାନ୍ ଡବ୍ଲ୍ୟୁଏଚଓକୁ ଏହା ସଂକ୍ରମିତ ହେବା ନେଇ ଚେତାବନୀ ଦେଇଥିଲା । ମାତ୍ର ଏବିଷୟରେ ଜାଣି ମଧ୍ୟ ଡବ୍ଲ୍ୟୁଏଚଓ ବିଶ୍ୱ ସମୁଦାୟକୁ ଭୂଲ୍ ତଥ୍ୟ ପ୍ରଦାନ କରିଛି ବୋଲି ଟ୍ରମ୍ପ୍ ସମାଲୋଚନା କରିଛନ୍ତି ।
Why did the W.H.O. Ignore an email from Taiwanese health officials in late December alerting them to the possibility that CoronaVirus could be transmitted between humans? Why did the W.H.O. make several claims about the CoronaVirus that ere either inaccurate or misleading….
— Donald J. Trump (@realDonaldTrump) April 17, 2020
ଡବ୍ଲ୍ୟୁଏଚଓକୁ କରୋନା ଭୂତାଣୁ ନେଇ ଦୋଷାରୋପ କରିବା ଏହା ଟ୍ରମ୍ପ୍ଙ୍କ ଦ୍ୱିତୀୟବାର ଲାଗି ପ୍ରଚେଷ୍ଟା । ଏହାପୂର୍ବରୁ ଡବ୍ଲ୍ୟୁଏଚଓ ପାଣ୍ଠିକୁ ଦେଉଥିବା ସହଯୋଗ ରାଶି ସମ୍ପୂର୍ଣ୍ଣ ବନ୍ଦ ମଧ୍ୟ କରିଦେଇଛି । ଚୀନକୁ ଅନାବଶ୍ୟକ ରୂପେ ସମର୍ଥନ କରୁଥିବା ଯୋଗୁଁ କରୋନା ଭୂତାଣୁ ବିଶ୍ୱବ୍ୟାପୀ ସଂକ୍ରମିତ ହୋଇଥିବାର ଦୋଷାରୋପ ମଧ୍ୟ କରିଛନ୍ତି ଟ୍ରମ୍ପ୍ ।
ସବୁଠାରୁ ବଡ଼ କଥା ହେଲା, ଏବେ ଏହି କରୋନା ଭୂତାଣୁ ସଂକ୍ରମଣକୁ ନେଇ କେବଳ ଆମେରିକା ନୁହେଁ ବିଭିନ୍ନ ରାଷ୍ଟ୍ର ସମୁଦାୟ ଚୀନ ଉପରେ ଦୋଷାରୋପ କରିବାରେ ଲାଗିଛନ୍ତି । ତାଇୱାନ, ସ୍ପେନ, ଇଟାଲୀ ଏବଂ ଆମେରିକା ଚୀନ ବିରୋଧୀ ଟିପ୍ପଣୀ ଦେବାରେ ଲାଗିଛନ୍ତି । କରୋନା ଭୂତାଣୁ ଯୋଗୁଁ ଯେ ଆମେରିକା କେବଳ ଅଧିକ କ୍ଷତିଗ୍ରସ୍ତ ହୋଇଛି ତାହାନୁହେଁ ବରଂ ଇଟାଲୀ, ସ୍ପେନ, ଜର୍ମାନୀ, ଫ୍ରାନ୍ସ ଓ ଇଂଲଣ୍ଡ ପରି ଅଧିକାଂଶ ମୁଷ୍ଟିମେୟ ୟୁରୋପୀୟ ରାଷ୍ଟ୍ର ସମଦଶା ଭୋଗୁଛନ୍ତି । ଏହା ଏବେ ବିଶ୍ୱ ଅର୍ଥନୀତି ଉପରେ କୁପ୍ରଭାବ ପକାଇବାରେ ଲାଗିଛି । ମାନ୍ଦା ଅବସ୍ଥା ସମ୍ପୂର୍ଣ୍ଣ ଆସିନଥିବା ବେଳେ ଏବେ ଅର୍ଥନୀତି ପ୍ରଭାବିତ ହେବାରେ ଲାଗିଛି ।
କରୋନା ଭୂତାଣୁକୁ ଆମେରିକା କହୁଛି ଚୀନ୍ ଭାଇରସ୍ । ଚୀନ ହିଁ ଏହି ପରିସ୍ଥିତି ଲାଗି ସମ୍ପୂର୍ଣ୍ଣ ଭାବେ ଦାୟୀ ଏବଂ ଡବ୍ଲ୍ୟୁଏଚଓ ମାଧ୍ୟମରେ ଚୀନ ଏହାର ସଂକ୍ରମଣକୁ ପ୍ରତିରୋଧ କରିପାରିଲା ନାହିଁ । ଯାହାଫଳରେ ଏହା ବିଶ୍ୱବ୍ୟାପୀ ଖୁବ୍ ଶିଘ୍ର ବ୍ୟାପି ଯାଇଛି ବୋଲି ଟ୍ରମ୍ପ୍ ଦୋଷାରୋପ କରିଛନ୍ତି ।