ଗ୍ରୀଷ୍ମ ଋତୁରେ କାହିଁକି ଫାଟୁଛି ଏସି? ଜାଣନ୍ତୁ ଦିଲ୍ଲୀ ହୌଜ ଖାସ ଏସି ବିସ୍ଫୋରଣ ପଛର ପ୍ରକୃତ କାରଣ

ନୂଆଦିଲ୍ଲୀ: ଦିଲ୍ଲୀର ହୌଜ ଖାସ ଅଞ୍ଚଳରେ ଥିବା ଏକ ରେସ୍ତୋରାଁରେ ଏସି ବିସ୍ଫୋରଣ ହେବାର ଖବର ସାମ୍ନାକୁ ଆସିଛି। ପ୍ରଚଣ୍ଡ ଗରମ ସମୟରେ ଏସି ବିସ୍ଫୋରଣର ଏଭଳି ଖବର ଲୋକଙ୍କ ମଧ୍ୟରେ ଆତଙ୍କ ଖେଳାଇ ଦେଇଛି। ବିଶେଷକରି ଖରାଦିନେ ଏଭଳି ଘଟଣା ବାରମ୍ବାର ଦେଖିବାକୁ ମିଳୁଥିବାରୁ, ଏହା ପଛର କାରଣ ଜାଣିବା ଏବଂ ସତର୍କତା ଅବଲମ୍ବନ କରିବା ଅତ୍ୟନ୍ତ ଜରୁରୀ।

ଏସି ବିସ୍ଫୋରଣର ଅନେକ କାରଣ ରହିଛି। ବିଶେଷଜ୍ଞଙ୍କ ମତରେ କମ୍ପ୍ରେସରରେ ଅତ୍ୟଧିକ ଚାପ ସୃଷ୍ଟି ହେବା ହେଉଛି ଏହାର ଏକ ପ୍ରମୁଖ କାରଣ। ଲଗାତାର ଏସି ଚାଲିବା ଫଳରେ କମ୍ପ୍ରେସର ଗରମ ହୋଇଯାଏ ଏବଂ ଏଥିରେ ଗ୍ୟାସ୍ ଲିକ୍ ହେବାର ଆଶଙ୍କା ବଢ଼ିଯାଏ। ଏଥିସହ, କମ୍ପ୍ରେସର ଭିତରେ ମଇଳା ଜମିଗଲେ ଏହାର କାର୍ଯ୍ୟକ୍ଷମତା ହ୍ରାସ ପାଏ ଏବଂ ବିସ୍ଫୋରଣର ବିପଦ ସୃଷ୍ଟି ହୁଏ।

ଅନ୍ୟ ଏକ କାରଣ ହେଉଛି ଇଲେକ୍ଟ୍ରିକାଲ ସର୍ଟ ସର୍କିଟ୍। ଖରାପ ୱାରିଂ କିମ୍ବା ଲଗାତାର ଭୋଲଟେଜ୍ କମବେଶୀ ନରହିଲେ ସର୍ଟ ସର୍କିଟ୍ ହୋଇ ଏସିରେ ନିଆଁ ଲାଗିବାର ସମ୍ଭାବନା ଥାଏ। ଏସି ଭିତରେ ଥିବା ଗ୍ୟାସ୍ ମଧ୍ୟ ଅନେକ ସମୟରେ ବିସ୍ଫୋରଣର କାରଣ ପାଲଟିଥାଏ। ଯଦି ଏସିରେ ବ୍ୟବହୃତ ଗ୍ୟାସ୍ ନିମ୍ନ ମାନର ହୋଇଥାଏ କିମ୍ବା ଗ୍ୟାସ୍ ଲିକ୍ ହୋଇ କୌଣସି ଅଗ୍ନି ସଂସ୍ପର୍ଶରେ ଆସେ, ତେବେ ଭୟଙ୍କର ବିସ୍ଫୋରଣ ଘଟିପାରେ।

ଏସିର ରକ୍ଷଣାବେକ୍ଷଣ ଅଭାବରୁ ମଧ୍ୟ ବିସ୍ଫୋରଣର ଆଶଙ୍କା ଦେଖାଦିଏ। ନିୟମିତ ଭାବେ ଏସିର ସର୍ଭିସିଂ ନକରିବା, ଫିଲ୍ଟର ସଫା ନକରିବା ଏବଂ ପୁରୁଣା ପାର୍ଟସ୍ ବଦଳାଇ ନଥିବାରୁ ଏସି ଉପରେ ଚାପ ପଡ଼ିଥାଏ। ବିଶେଷକରି ବାହାରେ ଲାଗିଥିବା ଆଉଟଡୋର ୟୁନିଟ୍ ପ୍ରବଳ ଖରାରେ ରହିବା ଦ୍ୱାରା ଏହା ଶୀଘ୍ର ଗରମ ହୋଇଯାଏ ଏବଂ ବିସ୍ଫୋରଣର ବିପଦକୁ ଦ୍ୱିଗୁଣିତ କରିଥାଏ।

ଏଭଳି ଦୁର୍ଘଟଣାରୁ ବର୍ତ୍ତିବା ପାଇଁ କିଛି ସତର୍କତା ମୂଳକ ପଦକ୍ଷେପ ଗ୍ରହଣ କରିବା ଆବଶ୍ୟକ। ନିୟମିତ ବ୍ୟବଧାନରେ ଏସିର ସର୍ଭିସିଂ କରାଇବା ସହ ଫିଲ୍ଟରଗୁଡ଼ିକୁ ସଫା ରଖିବା ନିହାତି ଜରୁରୀ। ଏସି ଚାଲିଥିବା ସମୟରେ କିଛି ସମୟ ବ୍ୟବଧାନରେ ଏହାକୁ ବନ୍ଦ ରଖିବା ଉଚିତ୍। ଆଉଟଡୋର ୟୁନିଟ୍ ଉପରେ ଯେପରି ସିଧାସଳଖ ଖରା ନପଡ଼ିବ ସେଥିପ୍ରତି ଧ୍ୟାନ ଦେବା ଆବଶ୍ୟକ। ଉଚ୍ଚ ମାନର ଷ୍ଟାବିଲାଇଜର ବ୍ୟବହାର କରିବା ଦ୍ୱାରା ଭୋଲଟେଜ୍ ସମସ୍ୟାରୁ ମୁକ୍ତି ମିଳିପାରିବ।

ଦିଲ୍ଲୀର ହୌଜ ଖାସ ଘଟଣା ଏକ ସତର୍କ ଘଣ୍ଟି। ଗ୍ରୀଷ୍ମ ଋତୁରେ ଏସି ବ୍ୟବହାର କରିବା ବେଳେ ସମସ୍ତେ ସତର୍କ ରହିବା ଉଚିତ୍ ଏବଂ ଉପଯୁକ୍ତ ରକ୍ଷଣାବେକ୍ଷଣ ପ୍ରତି ଧ୍ୟାନ ଦେବା ଆବଶ୍ୟକ। ଅଳ୍ପ ଟିକିଏ ଅସାବଧାନତା ବଡ଼ ବିପଦକୁ ଡାକି ଆଣିପାରେ।