ଓଡ଼ିଶା ସମ୍ବାଦ ବ୍ୟୁରୋ: ଏନଡିଏର ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁ ଭୁବନେଶ୍ବରରେ ପହଁଚିଛନ୍ତି । ସକାଳେ ଦିଲ୍ଲୀରୁ ବାହାରି ଭୁବନେଶ୍ବର ବିମାନବନ୍ଦରରେ ଆସି ପହଁଚିବା ପରେ ତାଙ୍କୁ ଜୋରଦାର ସ୍ବାଗତ କରାଯାଇଛି । ବିଜେପି ସଭାପତି ସମୀର ମହାନ୍ତିଙ୍କ ସହ ଅନେକ ବିଜେପି ନେତା ତାଙ୍କୁ ପାଛୋଟି ନେଇଥିଲେ । ରେଡ କାର୍ପେଟରେ ତାଙ୍କୁ ସ୍ବାଗତ କରାଯାଇଛି ।
ବିମାନ ବନ୍ଦରରୁ ସେ ରାଜ୍ୟ ଅତିଥି ଭବନ ଯାଇଥିଲେ । ରାଜ୍ୟ ଅତିଥି ଭବନ ରେ ବିଜେପି ପକ୍ଷରୁ ଦ୍ରୈାପଦୀ ମୁର୍ମୁଙ୍କୁ ଭବ୍ୟ ସ୍ବାଗତ କରିବା ପାଇଁ ସମସ୍ତ ବ୍ୟବସ୍ଥା କରାଯାଇଛି । ସମସ୍ତ ବିଧାୟକ ଏବଂ ସାଂସଦ ବିଜେପିର ସେଠାରୁ ଦ୍ରୈାପଦୀ ମୁର୍ମୁଙ୍କୁ ସାକ୍ଷାତ କରିବେ । ଦ୍ରୌପଦୀଙ୍କ ଗସ୍ତକୁ ନେଇ ରାଜ୍ୟ ବିଜେପି ମଧ୍ୟ ଉତ୍ସାହିତ ଅଛି । ଏହାପରେ ବିଧାନସଭା ଯିବେ ଦ୍ରୈାପଦୀ ମୁର୍ମୁ । ବିଧାନସଭାର ୫୪ ନମ୍ବର ପ୍ରକୋଷ୍ଠରେ ବିଜେଡିର ବିଧାୟକ ଓ ସାଂସଦମାନଙ୍କୁ ଭେଟି ତାଙ୍କୁ ସମର୍ଥନ ଦେବାକୁ ଅପିଲ କରିବେ ।
ନିଜେ ମୁଖ୍ୟମନ୍ତୀ ରାଷ୍ଟ୍ରପତିଙ୍କୁ ଭବ୍ୟ ସ୍ୱାଗତ ଦିଆଯିବାକୁ ବ୍ୟବସ୍ଥା କରିଛନ୍ତି । ଏଥିପାଇଁ ବିଧାନସଭାରେ ସ୍ୱତନ୍ତ୍ର କାର୍ଯ୍ୟକ୍ରମର ମଧ୍ୟ ଆୟୋଜନ କରିଛି ଦଳ । ସେପଟେ ଦ୍ରୌପଦୀଙ୍କୁ ସମର୍ଥନ କରିବ ନାହିଁ ବୋଲି କଂଗ୍ରେସ ସଭାପତି ଶରତ ପଟ୍ଟନାୟକ କହିଛନ୍ତି ।
ସେଠାରେ କିଛି ସମୟ ରହିବା ପରେ ବିଜେଡି ସଭାପତି ନବୀନ ପଟ୍ଟନାୟକଙ୍କୁ ଭେଟିବେ । ନବୀନ ନିବାସରେ ମଧ୍ୟାହ୍ନ ଭୋଜନ କରିବେ ବୋଲି ମଧ୍ୟ ଜଣାପଡିଛି । 2017ରେ ରାମନାଥ କୋବିନ୍ଦ ମଧ୍ୟ ରାଷ୍ଟ୍ରପତି ପ୍ରାର୍ଥୀ ବେଳେ ଆସିଥିଲେ ଏବଂ ନବୀନ ନିବାସରେ ମଧ୍ୟାହ୍ନ ଭୋଜନ କରିଥିଲେ । ଯଦିଓ ପୂର୍ବରୁ ନବୀନ ସମର୍ଥନ ଘୋଷଣା କରିସାରିଛନ୍ତି ତଥାପି ସୈାଜନମୂଳକ ସାକ୍ଷାତ କରିବା ସହ ସମର୍ଥନ ନିହାତି ମାଗିବେ ।
ଏହି ଗସ୍ତ ସମୟରେ ଦ୍ରୈାପଦୀ ମୁର୍ମୁଙ୍କୁ ରାଜ୍ୟ ଅତିଥି ଭାବେ ମାନ୍ୟତା ଦେଇ ରାଜ୍ୟ ସରକାର ଅତିଥି ସତ୍କାର କରିବେ । ଦ୍ରୈାପଦୀ ମୁର୍ମୁଙ୍କୁ ରାଜ୍ୟ ଅତିଥି ମାନ୍ୟତା ମିଳିବ । ତାଙ୍କୁ ଏସକର୍ଟ ପାଇଲଟ୍ ଏବଂ PSO ସମେତ ଅନ୍ୟାନ୍ୟ ସୁରକ୍ଷା ଯୋଗାଇ ଦିଆଯିବ।