ମୁମ୍ବାଇ: ଭାରତ ଏବଂ ଚୀନ୍ ବଜାରରେ ବିପୁଳ ସଫଳତା ହାସଲ କରିବା ପରେ ସୁପରହିଟ୍ ଫ୍ରାଞ୍ଚାଇଜ୍ ‘ଦୃଶ୍ୟମ୍’ ସର୍ବଭାରତୀୟ ସ୍ତରରେ ରିଲିଜ ହେବାକୁ ଯାଉଛି । ଫିଲ୍ମର କୋରିଆ ରିମେକ୍ ପରେ ନିର୍ମାତାମାନେ ଏକ ନୂଆ ନିଷ୍ପତ୍ତି ନେଇଛନ୍ତି । ଅଜୟ ଦେବଗନଙ୍କ ‘ଦୃଶ୍ୟମ୍’ର ହଲିଉଡର ରିମେକ୍ ପ୍ରସ୍ତୁତ ହେବାକୁ ଯାଉଛି ।
ବଲିଉଡ ଏବଂ ସାଉଥରେ ଧମାକା କରିବା ପରେ ସୁପରହିଟ ଫିଲ୍ମ ‘ଦୃଶ୍ୟମ୍’ ହଲିଉଡ ଫିଲ୍ମ ଇଣ୍ଡଷ୍ଟ୍ରିରେ ଧୁମ୍ ମଚେଇବାକୁ ପ୍ରସ୍ତୁତ । ବର୍ତ୍ତମାନ ଫ୍ରାଞ୍ଚାଇଜ୍ ‘ଦୃଶ୍ୟମ୍’ ବିଦେଶୀ ବକ୍ସ ଅଫିସରେ ମଧ୍ୟ ବହୁତ ଲାଭ କରିବାକୁ ଯାଉଛି । ପାନୋରାମା ଷ୍ଟୁଡିଓ ଗଲ୍ଫଷ୍ଟ୍ରିମ୍ ପିକ୍ଚର୍ସ ଏବଂ JOAT ଫିଲ୍ମସ୍ ସହିତ ହଲିଉଡରେ ‘ଦୃଶ୍ୟମ୍’ ନିର୍ମାଣ ପାଇଁ ହାତ ମିଳେଇଛି ।
ଏହି ଲୋକପ୍ରିୟ ଚଳଚ୍ଚିତ୍ରଟି ଆମେରିକା ଏବଂ କୋରିଆରେ ପୁନଃନିର୍ମାଣ କରାଯାଉଛି ଏବଂ ଏହା ବ୍ୟତୀତ ଖୁବ୍ ଶୀଘ୍ର ଫିଲ୍ମର ସ୍ପେନିସ ସଂସ୍କରଣ ପାଇଁ ଏକ ଚୁକ୍ତି ସ୍ୱାକ୍ଷରିତ ହେବ ।
ଫିଲ୍ମ ‘ଦୃଶ୍ୟମ୍’, କୋରିଆ ଏବଂ ଇଂରାଜୀ ରିମେକ୍ ପୂର୍ବରୁ ମାଲାୟାଲମ୍ ଚଳଚ୍ଚିତ୍ରର ରିମେକ୍ ହିନ୍ଦୀ, କନ୍ନଡ, ତେଲୁଗୁ, ତାମିଲ, ସିଂହଳୀ ଏବଂ ଚାଇନିଜ୍ ଭଳି ବିଭିନ୍ନ ଭାଷାରେ ବକ୍ସ ଅଫିସରେ ଭଲ ପ୍ରଦର୍ଶନ କରିଛି ।
ଫ୍ରାଞ୍ଚାଇଜ୍ର ଅଧିକାର ହାସଲ କରିଥିବା ପାନୋରାମା ଷ୍ଟୁଡିଓର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ କୁମାର ମଙ୍ଗତ ପାଠକ ସୋସିଆଲ ମିଡିଆରେ ଫିଲ୍ମ ‘ଦୃଶ୍ୟମ୍’ ର ହଲିଉଡ ରିମେକ୍ ଉପରେ ଏକ ଅପଡେଟ୍ ସେୟାର କରିଛନ୍ତି । ସେ ଏହି ପୋଷ୍ଟରେ ଲେଖିଛନ୍ତି ଯେ, ‘ଗଲ୍ଫଷ୍ଟ୍ରିମ ପିକ୍ଚର୍ସ ଏବଂ JOAT ଫିଲ୍ମ ସହ ସହଯୋଗ କରି ଆମେ ହଲିଉଡ ପାଇଁ ଇଂରାଜୀରେ ଏହି କାହାଣୀ ପ୍ରସ୍ତୁତ କରିବାକୁ ବହୁତ ଖୁସି ଅଛି । କୋରିଆ ଏବଂ ହଲିଉଡ ପରେ, ଆମର ମିଶନ ହେଉଛି ଆଗାମୀ ତିନି ରୁ ପାଞ୍ଚ ବର୍ଷ ମଧ୍ୟରେ 10 ଟି ଦେଶରେ ‘ଦୃଶ୍ୟମ୍’ କୁ ପୁନଃ ନିର୍ମାଣ କରିବା ।